"Það var mikið!" En þetta er í raun gömul "ný þungamiðja."

Á síðustu áratugum hefur þróun byggðar á höfðuborgarsvæðinu markast af því, að byggðin hefur raðast í kringum tvær meginlínur sem mætast í krossgötum á svæðinu frá Elliðavogi til Smárahverfisins. 

En á sama tíma hefur verið í gangi sú hugsun, að þungamiðjan sé við Reykjavíkurtjörn og að þess vegna þurfi að leggja flugvöllinn niður. 

En, viti menn, þegar menn ætla að fara að leggja svonefnda borgarlínu kemur auðvitað í ljós, að það gengur ekki upp að hafa miðju hennar í Vatnsmýrinni, heldur verður Ártúnshöfði fyrir valinu með svonefnt Krossmýrartorg sem miðstöð verslunar og þjónustu,  enda aðeins rúman kílómetra frá þungamiðju byggðainnar, sem er núna austast í Fossvogi, skammt frá Blesugróf og Smiðjuvegarhverfinu. 

Og nú á dögunum datt það út úr einum þeirra sem að þessu verkefni vinna, að þessi breytta staða, sem kölluð er "ný þungamiðja", muni stuðla að því að ekki þurfi að flytja flugvöllinn,  - hann er á besta hugsanlega stað. 

Öfundsverðum stað miðað við erlendar borgir, hvað það snertir, að ef austur-vestur-brautin verður lengd, munu 80 prósent af umferð um völlinn fara um þá braut, sem hefur Skerjafjörð í aðra áttina í aðflugi og fráflugi, en hins vegar autt svæði í Fossvogsdal til austurs. 

Allir, sem hafa ferðast flugleiðis milli borga erlendis, þekkja það hvernig flogið er víðast hvar yfir mikið þéttbýli. 

 

Borgarlínustöð ný þungamiðja

Hraðari eða hægari en Eyjafjallajökull?

Það tók Eyjafjallajökul rúman áratuga að "undirbúa" hið sögufræga gos 2010. Það var fyrir aldamótin sem merki fóru að sjást í mælingum um að fjallið væri að komast í gosfasa. 

Síðasta gos í Öræfajökli varð 1727 og því liggja ekki fyrir neinar mælingar varðandi mælanleg gögn um aðdraganda goss í því mikla eldfjalli. 

Hvort aðdragandi goss nú verður jafn stuttur og hefur verið í Bárðarbungu og Grímsvötnum, jafn langur og í Eyjafjallajökli, eða jafnvel enn lengri, veit því enginn með vissu. 

Það var strax byrjað á að gera viðbragðaáætlanir vegna Eyjafjallajökuls áratug fyrir gosið 2010. 

Nú er slíkur undirbúningur líka hafinn varðandi Öræfajökul og eins gott að vera á tánum, því að hann er eitt af allra hættulegustu eldfjöllum landsins. 

En fegurð hans og mikilleiki er grípandi. Myndin hér við hliðina var tekin nú í morgun af Hvannadalshnjúki þarna vinstra megin á myndinni og gnæfir hærra en sýnist á þessari mynd, sem er tekin með aðdrætti frá þjóðveginum, og hnjúkurinn er fjærst á myndinni, þar sem myndavélinni er beint upp á við. 

Skjálftavirkni aldrei mælst meiri

Þörf fyrir að upphefja sig með því að lítillækka aðra?

Erfitt er að finna einhverja einhlíta skýringu á einelti í skólum og á vinnustöðum og allskyns áreiti og ofsóknir gegn hinsegin fólki og fólki af öðrum kynþáttum, þjóðum og trúflokkum. 

Ein ástæðan, sem nefnd hefur verið, er einhver þörf fólks til að lítillækka aðra til þess að upphefja sjálfa sig. 

Þetta fyrirbæri spannar yfir ótrúlega mörg svið og er á mjög mismuandi háu stigi, samanber nasistana á sínum tíma. 

Þeim nægði ekki að upphefja sig sem yfirburða kynþátt, heldur þurftu þeir í leiðinni að útrýma Gyðingum, sem Hitler líkti við rottur og meindýr. Lengra verður vart komist. 

Það má hugsanlega útvíkka hugtakið "hinsegin" og láta það ná yfir fleiri, þar með Rómafólk, Gyðinga og aðra trúflokka, sem tilheyra ekki þeim hópi, sem hatast við þá, sem eru "öðruvísi" á einhvern hátt.  

Svari fyrir kúgun hinsegin fólks

Drumbabótin og bæjarstæðin í Öræfum segja hrikalega sögu.

Á sléttlendinu fyrir neðan Fjótshlíð utanverða er svæði, sem heitir Drumbabót. Þar standa afhöggvin birkitré upp úr sandinum og vitna um gríðarlegt hamfaraflóð úr Kötluöskjunni, sem hefur vaðið niður allt sléttlendið til vesturs og líkast til alla leið vestur yfir Landeyjar og yfir neðsta hluta Rangárvalla. 

Skógurinn, sem verið hefur öflugur birkiskógur á þessu svæði, hefur kurlast eins og eldspýtur í þessu hamfaraflóði. 

Drumbabót segir óbeint söguna af hamförunum miklu í Öræfajökkulsgosinu 1362, sem eyddu svo blómlegu héraði, að það hét Litla-Hérað fyrir gos en Öræfi eftir gos. 

Þegar byggð komast aftur á að litlu leyti þegar frá leið, voru bæjarstæðin valin af kostgæfni og bæirnir hafði saman, svo sem á Hnappavöllum, Hofi og í Svínafelli. 

Ekki er virað hvað gos nú yrði stórt, kannski frekar lítið eins og gosið 1727 en hugsanlega stærra. 

Og hættan af hamfaraflóðum ef gosið verður stórt sprengigos, er ekki eina hættan, heldur ekki síður öllu eyðandi áhlaup öskku og eimyrju í líkingu við gosin í Vesuvíusi 79 f.kr, Krakatá 1883 og á Martinique 1902. 

Húsið færi allt undir jökulflóð