Áratuga hefð í Suður-Ameríku.

Áratugum saman voru bæði etanól og bensín notið á bíla í Brasilíu og bílar framleiddir þar fyrir nokun beggja orkugjafanna.

Notkun etanóls hefur verð nefnd sem ein leið til að leysa olíu og bensín af hólmi en til þess þarf að fórna svo miklu af ræktuðu landi, að það getur aldrei annað nema litlum hluta orkuþarfar jarðarbúa.

Íblöndun þekkist við vissar aðstæður í ákveðnum hlutföllum.

Þannig getur verið gagnlegt í miklu frosti að blanda nokkrum lítrum af bensíni eða steinolíu út í dísilolíu til að vinna á móti því hve hún þykknar mikið í miklum kulda.

Vínandi í íslensku bensíni

Fullkomlega firrtar fyrirætlanir.

Nokkrar staðreyndir sem er haldið leyndum. Eða hve mörg prósent aðspurðra á förnum vegi myndu geta svarað eftirtöldum spurningum rétt:

1. Hvar eru Eldvörp?  Svar: 5 km suðvestur af Svartsengi.

2. Hvernig kemstu þangað?  Svar: Reyndu það ekki. Þú villist þótt þangað liggi fólksbþílafær vegur þvi að engar merkingar sýna þér leiðina.

3. Hvað eru Eldvörp?  Svar: 15 kílómetra þráðbein gígaröð.

4. Er eitthvað merkilegt við gígaraðir?  Svar: Já, þær finnast hvergi á þurrlendi jarðar nema á Íslandi. Gígaraðir myndaðar eftir ísöld má telja á fingrum annarrar handar. Það þarf að fara austur í Lakagíga til að finna jafnoka Eldvarpa.

5. Er ekki dýrmæta hreina og endurnýjanlega orku að finna í Eldvörpum?  Svar: Nei, því að undir Eldvörpum er sameiginlegt jarðvarmahólf þeirra og Svartsengis. Vinnsla í Eldvörpum er eins og að pissa í skó sinn til að halda á sér hita.

6. Er ekki gott mál að bora rannsóknarholur og láta það nægja?  Svar? Þetta er látið í veðri vaka, hvort sem svæðið heitir Eldvörp, Gjástykki, Trölladyngja eða Drekasvæðið. Við Trölladyngju var með samþykki Grindavíkurbæjar valdið miklum umhverfisspjöllum með árangurslausri "tilraunaborun". En einhverjar stundartekjur af verktökum hafði bærinn líklega.  Gefið hefur verið út leyfi, sem kallað er rannsóknarleyfi á Drekasvæðinu, en þess að engu getið,að um vinnsluleyfi er að ræða. Össuri Skarphéðinssyni tókst sem nýr iðnaðarráðherra að stöðva leyfi ráðherra Fransóknarflokksins tveimur dögum fyrir kosningar til að vaða með bora inn í Gjástykki.

7. Einhverjar tekjur koma samt af umsvifum við rannsóknar- og virkjanaframkvæmdir í Eldvörpum?    Svar:  Þetta eru tímabundnar tekjur verktaka, framkvæmdaaðila og peningaafla sem einskis svífast ef þröngir stundarhagsmunir eru í spilinu á kostnað komandi kynslóða. Takmörkuð orka orkuhólfs Svartsengis-Eldvarpa mun klárast fyrr en ella.  

Eldvörpum verði þyrmt

Ekki spurning um hvort heldur hvenær....

Dróninn, sem lenti um rúmum metra fyrir aftan Marcel Hirscher í kvöld, brotlenti svo nálægt Hirscher, að atvikið lítur svipað út og að um misheppnað banatilræði hafi verið að ræða.

Þetta leiðir hugann að því, að það hljóti að koma að því að því að alvarlegt slys verði vegna drónaflugs eða jafnvel að fleiri en bandaríski herinn telji það henta sér að nota þetta annars nytsamlega tæki til manndrápa.

Tillaga um nýyrðið mannleysa hlaut ekki brautargengi þegar leitað var að íslensku heiti yfir þessi flygildi, en þetta heiti væri vel viðeigandi begar því er beitt til sprengjuárása, sem á sumum átakasvæðum  hafa oftast misst marks en drepið saklausa borgara.

Skíðamaður rétt slapp við dróna (myndskeið)

Þarf ekki að banna öllum múslimum að ferðast, Trump?

Nú má ráða það af fréttum að tugir þúsunda fólks streymi frá Vesturlöndum til yfirráðasvæðis Ríkis íslams til að ganga til liðs við vígasveitir þeirra og hryðjuverkahópa.

Donald Trump, sem hefur yfirburðastöðu meðal forsetaframbjóðenda Republikana, hefur aukið fylgi sitt með yfirlýsingum um að banna öllum múslimum að ferðast til Bandaríkjanna, og vitað er að Trump á mörg skoðanasystkin í öðrum vestrænum ríkjum.

Nú er spurningin hvort Trump og hans líkar auka fylgi sitt enn meira með því að leggjs til að öllum múslimum verði bannað að ferðast frá Bandaríkjunum og öðrum ríkjum, svo að tryggt sé að þeir leggi hryðjuverkamönnum og vígamönnum lið.

Með því að kyrrsetja 1500 milljónir manna sé málið leyst á einfaldan hátt.    

Ríki íslams á leið til Indónesíu?

Gildi íslenskra varaflugvalla og -brauta.

Stundum má sjá og heyra upphrópanir hér á landi varðandi það, að það sé óþarfa bruðl að hafa fleiri en einn alþjóða millilandaflugvöll á Íslandi.

Þeir sem þessu halda fram líta hins vegar alveg framhjá því að Ísland er eyland langt fá öðrum löndum og sker sig alveg úr öðrum Evrópu- og Norður-Ameríkuríkjum varðandi að að frá Keflavíkurflugvelli er um 1300 kílómetra flugleið til næsta sambærilegs vallar erlendis, gagnstætt þvi sem er hjá þjóðunum sem beggja meginlöndin sitt hvorum megin Atlantshafsins þar sem stutt er að fljúga til næsta lands.

Þannig geta flugvellirnir í Reykjavík og á Akureyri og Egilsstöðum allir gegnt mikilvægum hlutverkum varðandi flugöryggi Keflavíkurflugvallar, hver á sinn hátt.

Þótt aðeins 37 kílómetrar séu í lftlínu milli Reykjavíkurflugvallar og Keflavíkurflugvallar eru þessir tveir flugvellir ekki á sama veðursvæði.

Því veldur skjólið sem Reykjanesfjallgarðurinn veitir Reykjavík í í vindáttum frá suðri til austurs.

Keflavíkurflugvöllur er berskjaldaður fyrir úrkomu í þessum vindáttum og í nótt var rakastigið þar lengst af um 100% og mikil snjókoma á sama tíma og allt annað veður var í Reykjavík.

Nú teljast geta verið talsverðar líkur á nýju eldgosi á áhrifasvæði Bárðarbungu á næstu misserum.

Skammt utan við lokað hættusvæði umbrotanna fyrir ári og utan Vatnajökulsþjóðgarðs er öryggisflugvöllurinn Sauðárflugvöllur sem með fimm flugbrautum sínum er opinn fyrir allar innanlandsflugvélar frá júní fram í nóvember.

Þetta er eini flgvöllur af þessari stærð á hálendinu og flugatvik haustið 2007 varpaði ljósi á gildi hans.

 

P.S.

Vegna athugasemdar, þar sem lítið er gert úr flugatvikinu 2007, má geta þess að það drapst á báðum hreyflum Fokker F50 vélar yfir Brúaröræfum og farþegum skipað að búa sig undir brotlendingu inni á hálendinu.

Flugmennirnir komu öðrum hreyflinum í gang og komust á honum til Egilsstaða, en farþegunum var veitt áfallahjálp eftir lendingu. Sjá nánar athugasemdirnar.   

 

Lenti ekki fyrr en 4 í nótt

Eilíf spurning smáþjóðar.

Allt frá því að Ísland varð frjálst og fullvalda ríki 1918 hefur nagandi spurning verið á sveimi um fullveldi landsins.

Danir önnuðust vörslu lögsögu okkar umhverfis landið, þ.e. 3ja mílna landhelginnar allt fram á fimmta áratug aldarinnar.

Þeir gátu, hvenær sem þeim sýndist, sent sín vopnuðu skip í hvaða aðgerð sem þeim sýndist, "jafnvel þótt ekki væri beðið um aðstoð".

Á stríðsárunum hélt lögregla þriggja þjóða, Íslendinga, Breta og Bandaríkjamanna, uppi löggæslu, eftir því sem við átti.

Sama ár og lýðveldið var stofnað, framseldum við hluta valdi okkar í flugmálum til Alþjóða flugmálastofnunarinnar og hefur svo verið síðan. 

Með aðild að NATO og varnarsamningnum við Bandaríkjamenn höfum við afsalað okkur hluta af gæslu í íslenskri lögsögu þegar aðstæður eru taldar gera það nauðsynlegt.

Allar svona ráðstafanir geta verið umdeilanlegar og eiga að sæta sífelldri og vandaðri rökræðu og skoðanaskiptum.     

 

„Jafnvel þó ekki sé beðið um aðstoð“

Hagsmunir oft yfirsterkari en hugsjónir hjá stórveldum.

Sagan sýnir að þegar beinir valda- og efnahagslegir hagsmunir eru knýjandi, víkja stjórnmálalegar og trúarlegar hugsjónir, sem ráðamenn þjóða bera fyrir brjósti, oft fyrir þeim. 

Vart verður tölu komið á þær spilltu einræðisstjórnir sem Bandaríkjamenn hafa stutt víða um heim í þágu beinna stórveldishagsmuna.

Stjórn Sádi-Arabíu er lýsandi dæmi um það.

Og fögur orð sovéskra og síðar rússneskra ráðamanna, "Sinatra-kenningin" svonefnda um sjálfsákvörðunarrétt þjóða í austanverðri Evrópu ( Sinatra-kenningin = My way), stóðst ekki áhlaup beinna hagsmuna, sem Rússar skilgreindu sem beina öryggishagsmuni sína.

Þeir hagsmunir eru sama eðlis og öryggishagsmunir Sovétríkjanna sálugu voru.   

Vilja ekki endurreisa Sovétríkin

Gildi varðveislu gamals borgarmynsturs.

Á uppbyggingarárunum eftir Seinni heisstyrjöldina reið yfir mikil endurreisn evrópskra borga, og voru farnar mismunandi leiðir í því efni en þó aðallega tvær.

Annars vegar með gagngerðri uppbyggingu með byggingu gler- og steinsteypuhalla þar sem loftárásir höfðu gereytt gömlum borgarhlutum eða þá niðurrifi á gömlum húsum og byggingu stórra steinsteypu-, stál- og glerhalla í staðinn.

Á Íslandi birtist þetta meðal annars í hugmyndum um niðurrif "ónýtra fúaspýtukofa" á borð við Bernhöftstorfuna þar sem átti í staðinn að reisa nútímalegan stóran steinsteypuklump yfir stjórnarráð Íslands.

Í Stokkhólmi og fleirum borgum ruddu steinsteypukassarnir lægri og vinalegri húsum burtu, og telja margir Svíar nú að þar hafi verið gengið of langt og að þessi hluti borgarinnar sé full kaldranalegur og fráhrindandi.

á hinn bóginn var í sumum eyddum borgarhlutum í Evrópu endurreist hin fyrri byggð.

Sumar borgir eins og Prag sluppu bæði við loftárásir og niðurrif í þágu steypukassastefnunnar og hafa notið síns gamla sjarma síðan.

Baráttan fyrir varðveislu hinnar aðlaðandi og vinalegu ásýndar og dýrmæts menningarsögulegs gildis hins gamla miðbæjar Reykjavíkur hefur staðið fram á þennan dag, en endurbygging húss í gamla miðbænum, sem greint er frá í tengdri frétt á mbl.is er vonandi eitt af táknum um að sú barátta hafi ekki verið háð til einskis.   

Endurbyggt í upprunalegri mynd

Auðræðið sterkasta aflið.

Þegar verið er að leggja mat á það hver séu valdahlutföllin í heiminum á milli lýðræðis og annarra stjórnarforma, milli trúarbragða eða á milli stórvelda eða ríkjahópa gleymist lang valdamesta fyrirbrigðið, - auðræðið.

Auðræðið, hið yfirgengilega vald gríðarstórra alþjóðlegra auðhringa, er jafn mikið og raun ber vitni, vegna þess að það teygir anga sína inn í króka og kima allra forma stjórnmála, trúarbragða, ríkja og ríkjahópa og stjórnar og drottnar yfir gangi alþjóða efnahagsmála.

Núverandi forstjóri Landsvirkjunar var áður forstjóri Marels  og vakti fyrst athygli mína á fundi Verslunarráðs í ársbyrjun 2007, þar sem hann tætti í sig þáverandi orkuverðstefnu Landsvirkjunar á hreinum viðskiptalegum forsendum.

Fyrir tveimur árum sagði hann á opnum fundi Lv að á öllum þeim hundruðum samningafunda fyrirtækisins, sem hann hefði setið, hefði hann aldrei heyrt orðið sanngirni nefnt.

Risastórir auðhringar eru að byrja að sýna Íslendingum klærnar vegna þess að nú loksins hefur Landsvirkjun uppi tilburði til þess að fá aanngjarnt og eðlilegt markaðsverð fyrir dýrmæta orku.  

Það er ömurlegt að sjá hvernig sumir, þeirra á meðal talsmenn verkalýðsfélaga, virðast kikna í hnjáliðunum og taka málstað hinna erlendu auðhringa með þeirra dðkku fortíð.        

Vilja ekki hugmyndafræði auðhringa

Gerir fjarlægðin fjöllin blá? Tvær holskefllur.

Stundum hefur verið sagt að tveir hópar fólks gefi þverskurð af þjóðinni: lögreglumenn og Alþingismenn. 

Þetta er síðan túlkað í tvær áttir, Sem gott - og slæmt. 

Slæmt vegna þess að fyrir bragðið sé of mikið af lélegum þingmönnum og lögreglumönnum.

En á sama tíma er sagt að í gamla daga hafi Alþingi speglað  betur margbreytilegan þverskurð þjóðarinnar, dvo sem góða og gegna bændur, verkafólk og sjómenn.

Hm?

Erum við ekki að tala um sama fyrirbrigðið á tveimur ólíkum tímum?

Er vist að óbreytt alþýðufólk hafi skilað miklu betri þingmönnum þá en nú? 

Eða gerir fjarlægðin fjöllin blá og mennina mikla?

Ef fleiri lélegir þingmenn eru nú en fyrr kann ástæðunnar að vera að leita í þvi, að í tvennum samliggjandi Alþingiskosningum komu holskeflur af nýju fólki inn á þing, sem ruddu út af þingi samsvarandi magni af þingreynslu.  

 

 

Mikið af lélegum þingmönnum