Vetrarfegurðin gefur sumarfegurðinni ekkert eftir.

Mörg svæði á Íslandi, svo sem Friðland að Fjallabaki, Kverkfjöll, Lónsöræfi og Hornstrandir búa yfir slíkri litadýrð og fegurð að sumarlagi, að þeir, sem aðeins þekkja þessar náttúruperlur að sumarlagi, eiga erfitt með að ímynda sér að þau njóti sín í hvitri umgjörð vetrarins. 

Stundum fylgir einhver dulúð tindum og fjöllum í vetrarbúningi sem lyftir huga áhorfandans. 

Það er hins vegar afar yfirborðsleg ályktun, slíkir eru töfrar þessara svæða í faðmi vetrarríkisins þegar alger dauðakyrrð, logn blá heiðríkja magna einstæðan seið, sem hrífur ferðamanninn jafnvel enn meira að vetrarlagi en sumarlagi. 

Þá birtast til dæmis andstæður íss og elds enn betur en á nokkrum öðrum árstíma. 

Þetta þekkja allir þeir sem veita sér þann munað að nálgast þessar gersemar, hver sem ferðamátinn er. 

Stundum má sjá vissa fordóma birtast í dómum þeirra sem einblína á ferðamátann og álykta út frá honum.  

Sem dæmi má nefna þá sem halda að jeppamenn geti ekki verið náttúruunnendur, en það er mesti misskilningur, því að í hverju ferðalagi er stansað iðulega og öræfakyrrðarinnar notið í botn. 

Annar misskilningur er sá að það sé aðeins á færi moldríkra að hafa efni á að flagga tíu milljón króna jöklajeppa. 

Á þeim 25 árum sem síðuhafi hefur vegna starfa síns haft yfir jeppa að ráða, sem kæmist í jöklaferðir, hefur farartækið verið langt innan við einnar milljónr króna virði en farið í langar og erfiðar ferðir um miðhálendið og jöklana. 

Núna eru jepparnir tveir, Suzuki Grand Vitara dísil 35 tommu breyttur, árgerð 1998. Hann vegur aðeins 1480 kíló og samkvæmt flotformúlu jökladekkja er hann með jafn mikið eða flot á snjó og Toyota Hi-lux á 38 tommu dekkjum. 

Hér sést hann á vetrarmorgni nálægt Setri með Kerlingafjöll í baksýn. 

Lipurð og léttleiki eru aðall þessa jappa sem og mikil sparneytni 2ja lítra dísilvélarinna. 

Almannavarnir og sýslumenn eiga það til að banna alla umferð á ákveðnum svæðum, nema ef jeppar eru með 38 tommu dekk eða stærri. 

Til að setja undir þennan leka hefur síðustu 17 ár verið tiltækur 48 ára gamall Range Rover með Nissan Laurel dísilvél á 38 tommu dekkjum, sem hefur fengið viðurnefnið Kötlujeppinn.  

Ef krafa er gerð um 38 tommu dekk er hægt að grípa í þennan gamla bíl, sem hér sést á Öskjuleið að vetri til með Upptyppinga í baksýn. 

 

Ævintýri undir Dyrfjöllum

Klofningur Repúblikana myndi færa Demókrötum forsetaembættið á silfurfati.

Línurnar, sem núna eru að byrja að skýrast varðandi Republikanaflokkinn, stefna honum í klofning; - með eða móti Trump.  

Fyrri klofningur í flokknum þegar Ross Perot bauð sig fram færði Bill Clinton forsetaembættið á silfurfati.  

Aðalástæðan fyrir því að flokkurinn klofni núna er sú gegnumgangandi hegðun Trumps á öllum hans ferli, sem hann hefur meira að segja lýst í eigin bók, að allir, sem keppa við hann um vinsældir og framgang, skiptist í tvo hópa, þar sem annar hópurinn hafi ekki viljað hlýða honum í einu og öllu, og því sé það ófrávikjanleg regla að að skrifa nöfn þeirra hjá sér í sérstaka bók og "refsa" slíkum mönnum með því að safna sem flestum málum, sem hægt sé"að hafa á þá." 

Af þeim toga var hið fræga símtal hans við forseta Úkraínu, þar sem hann var beðinn um að finna eitthvað á Joe Biden þar í landi og þessu jafnfram fylgt eftir með ákveðinni tegund af fjárkúgun, sem fólst að láta ógert að greiða umsaminn styrk Bandaríkjanna við Úkraínu.  

Nú um daginn heyrði heimurinn síðan allur hótanaviðtal hans við innanríkisráðherrann í Georgíu, sem vildi ekki hlýðnast Trump þótt hann væri flokksbróðir hans, og fékk framan í sig ítrekaðar og skýrar hótanir um að hann "væri að koma sér í hættulega stöðu fyrir hann sjálfan". 

Sama á við um alla þá Republikana sem Trump telur hafa brugðist sér eða að einhverju leyti staðið í vegi fyrir frama hans og skjálfa nú eins og strá í vindi af hræðslu við það, sem hann kynni að gera þeim til miska í refsingarskyni. 

Og flest virðist benda til að það muni hann geria. 

Og þetta á við flest svið stjórnmála, líka alþjóðastjórnmál, því að þegar Allsherjarþing Sameinuðu þjóðanna greiddi ekki atkvæði eins og Trump vildi, greindi hann frá því að nöfn þessara ríkja yrðu skráð niður og þeim refsað tilhlýðilega.   

Segja sig úr flokknum og kalla hann „Trump-söfnuð“

Miklar sviptingar í jarðgangagerð vegna breyttra aðstæðna.

Ef einhver hefði sagt það fyrir tveimur árum að jarðgöng í sitt hvora áttina frá Tálknafirði yrðu á blaði yfir nauðsynlegar framkvæmdir og jafnvel sett fremst í forgang á jarðgangaáætlun vegna brýnnar þarfar, er hugsanlegt að það hefði vakið furðu. 

Vestra hefur verið þrýst á jarðgöng milli Ísafjarðar og Súðavíkur vegna snjóflóðahættu á þeirri leið.  

Myndir af ástandi vegarins um Mikladal sem birtust í sjónvarpi í gær, segja hins vegar sína sögu um það hve hratt aðstæður geta breyst, og hvernig þessar aðstæður geta sprottið vegna breytinga í landflutningum af ýmsum ástæðum, og ekki aðeins haft mikil áhrif á jarðgangaáætlun viðkomandi landsfjórðungs, heldur á forgangsáætlun fyrir allt landið. 

Nú er til dæmis sívaxandi þrýstingur á göng milli Siglufjarðar og Fljóta, sem Héðinsfjarðargöng slógu út af borðinu um síðustu aldamót.   

Hyggjast forgangsraða jarðgöngum