Borgarsamfélag sem var og er bandarískt-mexíkóst.

Bandaríska borgin El Paso og mexíkóska borgin Ciudad Juarez eru í raun eitt borgarsamfélag sem landamæri Bandaríkjanna og Mexíkó liggja í gegnum. 

1968 dvaldi síðuhafi í nokkra daga þarna á leið til að skemmta Íslendingum í Los Angeles og gat þar með skroppið yfir landamærin á afar þægilegum stað. 

Þetta sumar loguðu eldar í mörgum borgum Bandaríkjanna vegna óeirða og átaka milli hvítra og svartra og vegna Víetnamstríðsins. 

Allt var hins vegar með friði og spekt í El Paso og Ciudad Juarez þótt mikill munur væri greinilega á lífskjörum sitt hvorum megin við landamærin. 

Meir en þremur áratugum síðar þekkti ég Íslending sem hafði búið og starfað býsna lengi í El Paso og lét hann mjög vel af dvölinni, enda glæpatíðni lág og góð nágrannakynni og samgangur fólksins sitt hvorum megin landamæranna eins og verið hafði þegar síðuhafi var þar forðum tíð. 

Nú staðfestir borgarstjórinn að þetta sé enn svona og hafi ekkert breyst í áranna rás. 

En forseti Bandaríkjanna segist vita betur en hans eigin flokksbróðir á staðnum og segir El Pasó hafa verið einhver hættulegasta borg Bandaríkjanna vegna glæpa, áður en múr kom þar til sögunnar.  

Hann virðist ekki geta skilið, að tvær þjóðir geti búið saman í sátt og samlyndi í einu og sama borgarsamfélaginu. 

Ekkert neyðarástand við landamærin

Algert undanhald hvað varðar stærð Víkurgarðs.

Upphaf fréttatilkynningar frá Minjastofnun í kvöld ber vitni um viðleitni stofnunarinnar til þess að fela stórfellt undanhald í baráttunni fyrir almennilegum skrúðgarði og útivistarsvæði, sem Víkurkirkjugarður hefði getað orðið í fullri stærð.

"Fallist hefur verið á sjónarmið Minjastofnunar um verndun Víkurgarðs" segir þar, en í næstu setningu er undanhaldið hins vegar viðurkennt með því að segja að stofnunin hafi dregið til baka friðlýsingartillögu sína um stækkun friðlýsts svæðis.

Hvað stærð garðsins snertir er þetta 100 prósent undanhald´og auk þess samþykki fyrir því að hinn stóri hótelsteinkastali rísi í allri sinni yfirþyrmandi stærð í hlaðvarpa Alþingishússins í stað þess að láta þetta svæði gera nágrenni þinghússins að helgistað i formi skjólsæls og vinalegs minja-skrúðgarðs. 

Málamiðlunin í þessu máli er sögð falin í því að hinn smækkaði Víkurgarður fái að njóta þess að vera einn helsti helgistaður þjóðarinnar allt frá upphafi landnáms. 

Það er tímanna tákn að sjálf Minjastofnun skuli gefa í skyn, að slíkt hefði ekki getað orðið nema með jafn stórfelldu undanhaldi og nú blasir við.  

Ef líta á á þessa niðurstöðu sem árangur þess að "bjarga því sem bjargað verður" ber hins vegar ekki að vanmeta það að hin skelegga barátta heiðursborgara Reykjavíkur, sem seint verður fullþðkkuð, hefur áorkað því að fá viðurkenningu fyrir einstæðu gildi garðsins fyrir þjóð, sögu og menningu. 

 

 

Fallast á verndun Víkurgarðs

Líka fávísi um nasismann. Áunnin fáfræði og afneitun.

Áberandi er þegar tekin eru viðtöl við nýnasista og aðra, sem hafa flykkst til fylgis við róttækar öfgahreyfingar, hve mjög þeim vefst tunga um tönn þegar þeir eru inntir eftir þekkingu á þeim fyrirmyndum sem þeir hafa sett á stall í skoðun sinni og hegðun. 

Það varpar ljósi á ástæðu þess hvers vegna þessar hreyfingar ná miklu betri fótfestu nú en fyrr á árum. 

Síðuhafi er í síminnkandi hópi fólks, sem man eftir þeirri tíð þegar mál nasista og fasista voru gerð upp í stíðinu mikla og næstu árin á eftir því. 

Það þýðir, að hjá yfirgnæfandi og sístækkandi hluta þjóðfélagsins skortir á þekkingu á eðli og afleiðingum öfgastefanna, sem skóku heiminn á árunum 1930-1945. 

Að stórum hluta er þetta líka fyrirbæri sem síðuhafi hefur kallað "áunna fáfræði", sem hluti af þeirri afneitun, sem nauðsynleg er til þess að búa til nýja og aðra mynd af stefnunum, sem voru grunnur þeirra hrikalegu voðaverka sem unnin voru, svo sem Helförinni, sem margir nýnasistar afneita raunar með öllu að hafi átt sér stað. 

„Við vorum einfaldlega fávís“

"Víkurkirkjugarður - heilög vé", texti og lag á facebook.

 

VÍKURKIRKJUGARÐUR - HEILÖG VÉ. 

 

Blær í laufi berst um Víkurgarð. 

Blessun vefji þennan yndisarð. 

Listaskáldið góða gekk hér um

og glæddi aleflingu´á andanum. 

Frá ásatrú til kristni byggðu brú

bóndans helgu súlur, vígðar trú. 

Þjóðarsagan, kyni frá til kyns, 

kveikt á fyrsta degi landnámsins. 

 

Blómavin sem gefur frið og grið

gleðja skal um aldir mannfólkið. 

Órlög fólksins, forðum tíð og nú, 

fá hér vængi´er njótum ég og þú. 

Hérna greru sár og hjartamein. 

Hérna féllu tár við kaldan stein. 

Ótal minni´um unað hals og vífs; 

andar, bæði liðinna og lífs. 

 

Landsins vættir verji griðareit. 

Þeim voru unnin fögur trúarheit, 

er fornar súlur flutu hér á land

var friði lýst sem ekkert veiti grand. 

Sú sáttagjörð er hér, sem halda á, 

að helgistaðnum aldrei raska má. 

Um aldir alda virtur vel hér sé 

Víkurkirkjugarður, heilög vé!

Ákvörðun um friðun Víkurgarðs kynnt í dag

Víkurkirkjugarður - heilög vé.

Á tímum Ingólfs Arnarsonar var sá átrúnaður útbreiddur allt frá Skandinavíu og vestur í Ameríku varðandi landnytjar, að enginn maður ætti rétt til bess að marka sér land nema að friðmælast við vættir landsins. 

Enn eimir eftir af þessari hugsun hjá Grænlendingum, næstu nágrönnum okkar, varðandi það, að enginn viðurkenndur eignaréttur manna á landi er til þar í landi. Svonefndir landeigendur eru þar ekki til, - Grænland, þ. e. náttúra Grænlands, á sig sjálf. 

Ingólfur var mikill trúmaður og einn hluti ásatrúar hans var að hafa nokkurs konar heimilisguði i formi öndvegissúlna við öndvegi hans í eldhúsi. 

Í landnámsferð til Íslands hafði hann súlurnar með sér, sem í dag eru tákn og skjaldarmerki Reykjavíkur, sem voru á táknrænan hátt látnar fljóta á land í Reykjavík og haldin sérstök trúar- og fórnarhátið þar sem friðmælst var við landvættina. 

Hafstraumar voru og eru þannig, að það hlýtur að hafa verið seinni tíma misskilningur að súlunum hafi verið varpað fyrir borð fyrir sunnan eða suðvestan land, því að straumar á því svæði liggja í norðvesturátt til Snæfellsness.

Hið rétta hlýtur að vera, að súlunum var varpað í sjó upp við land í Reykjavík. 

"Þar fornar súlur flutu á land" er sungið í dag.

Þessi helgistaður, þar sem athöfnin fór fram, er því fyrsti og elsti helgistaður og síðar legstaður landsins, Víkurkirkjugarður, aðeins steinsnar frá húsi þar sem um hríð bjó listaskáldið góða Jónas Hallgrímson og átti þess kost að hefja þar andlega uppbyggingu dagsins með því að ganga út í þennan helga reit. 

Ingólfur Arnarson tali, að vegna þess að Hjörleifur fóstbróðir hans var trúlaus og vildi ekki gera sáttmála við landvættina, hefði hann goldið fyrir það með lífi sínu.

Vígður helgistaður, sem markar sögu og feril kynslóðanna allt frá landnámi til okkar daga hlýtur að falla flestum fremur undir hugtakið heilög vé. 

Líkt og Þingvellir eða Þjórsárver. 

Í hinum heilögu véum í Reykjavík voru öndvegissúlurnar varðveittar í eldhúsi fyrstu aldir eftir landnám, heilagar, jafnt í ásatrú eða kristinni trú, eins konar brú á milli trúarbragða þjóðarsögu í þúsund ár. 

 

VÍKURKIRKJUGARÐUR - HEILÖG VÉ.

 

Landsins vættir verji griðareit. 

Hér voru unnin fögur trúarheit

er fornar súlur flutu hér á land

og friði lýst, sem ekkert veitti grand. 

 

Sú sátt var hérna gerð sem halda á, 

að helgistaðnum aldrei raska má. 

Um aldir alda virtur vel hér sé

Víkurkirkjugarður, heilög vé!  

 

Hvetja ráðherra til að ljúka friðlýsingu

Refsingar eru grunnstef.

Athyglisvert er að skoða hvernig ferill núverandi Bandaríkjaforseta er varðaður orðum eins og "refsiagerðir", "viðskiptaþvinganir", "múr", "bann", "aðskilnaður"  o. s. frv. 

Hægt væri að setja upp langan lista mála af öllu tagi þar sem þetta er grunnstef. 

Í Bandaríkjunum er stærri hluti þjóðarinnar að jafnaði í fangelsi en í nokkru öðru landi á Vesturlöndum og í sumum ríkjunum er beitt dauðarefsingum. 

En Trump finnst það ekki nóg, heldur hrósar Kínverjum fyrir þeirra miklu hörku og miskunnarleysi hvað snertir dauðarefsingar og vill innleiða slíkt í sínu landi. 

Uppstilling hans á fíkniefnabölinu er einsleit: Það er allt erlendu glæpahyski að kenna, sem refsa á með beitingu dauðarefsinga. 

Ekki er minnst orði á þá staðreynd, að neyslan gæti auðvitað ekki orðið svona mikil nema vegna þess að það er eftirspurn eftir dópinu. 

Yfirvöld hamast aðeins á öðrum enda vandamálsins. 

Hægt er að vitna í skrif Trumps sjálfs þess efnis að það sé mikilvægt í viðskiptum að halda nákvæma skrá yfir keppinautana og þá sérstaklega yfir það sem þeir hefðu gert á hluta bókareigandans. 

Hann skyldi síðan hefna sín á þeim við fyrsta tækifæri. 

 

Hrósar Kínverjum fyrir dauðarefsingar

Von um að fá herinn aftur?

Misjöfn viðbrogð hafa sést við komu Mike Pompeo til Íslands. Nokkrar ungliðahreyfingar mótmæltu stefnu Trumps, en síðan mátti sjá bloggskrif, sem hægt var að túlka þannig, að ummæli Pompei um að Ísland yrði ekki vanrækt lengur, væru byggð á því að vegna umræðu hér á landi í boði Samfylkingar um inngöngu í ESB hefðu Kanar hrokkið héðan í burtu 2006. 

Sem hefði þar með verið hið versta mál að mati sumra netskrifara. 

Varðandi það hverjum væri að kenna að varnarliðið fór 2006 er rétt að íhuga það, að sú brottför varð þegar hér hafði setið ríkisstjórn Sjalla og Framsóknar í ellefu ár samfellt, sem hafði eindregið beitt sér fyrir því að hafa herinn áfram. 

Davíð skjallaði Bush forseta mjög í heimsókn i Hvíta húsið og hann og Halldór Ásgrímsson létu Íslendinga meira að segja setja Íslendiknga á lista yfir viljugar þjóðir til innrásar í Írak 2003. 

Engu að síðar fór herinn í september 2006 án þess að umræða um ESB hefði nokkurn tíma komið til umræðu né heldur stjórnarandstöðuflokkarnir á þeim tíma. 

Nú er engu líkara en að margir sjái von til aukinna hernaðarumsvifa Bandaríkjamanna hér á landi og láti sér vel líka yfirlýsingar Pompeo um það, hvernig uppskipting valda yfir heimskautssvæðinu verði á mili þjóðanna, sem að að því liggja. 

Ísland verði ekki vanrækt lengur

Slæmt fyrir ferðaþjónustuna almennt.

Procarmálið er slæmt fyrir íslenska ferðaþjónustu og orðspor hennar erlendis. 

Eigendur hennar gerðu málið menn verra en það þó var, með því að ljúga svo áberandi um það í upphafi og beita svo fleiri lygum undanfærslum við, að það gerði málið miklu verra í hvert skipti. 

Því verra sem málið er og þar með líkindi til umfjöllunar erlendis, því verra verður það fyrir ferðaþjónustuna og orðspor Íslands. 

„Þeir eru óheiðarlegir“

Gamalkunnug gjá og draugur.

Gamalkunnug gjá og forn draugur birtust í tilboði SA upp á 2,5% kauphækkun á ári næstu þrjú árin, sem í raun þýðir launalækkun, vegna þess að verðbólgan þessi þrjú ár verður augljóslega mun meiri en þessu nemur. 

20 þús krónur á ári er áreiðanlega eins og blaut tuska framan í fólkið, sem horfir á kauphækkanir til helstu forstjóra og bankastjóra, sem eru í kringum 500 sinnum meiri. 

"Ég veit hvað þetta fólk hefur og hvað það þarf" sagði Gvendur jaki hér í eina tíð þegar hann lýsti kjörum skjólstæðinga sinna. 

Gagntilboðið óaðgengilegt SA

Ríki, sem hafa áður farið í stríð og búa yfir kjarnorkuvopnum.

Barátta Gandhis fyrir sjálfstæði Indlands endaði með því að landið skiptist upp í þrjú ríki þar sem múslimatrú var í Pakistan og Bangladesh en Hindúatrú á Indlandi. 

Deilur um yfirráð í Kasmir hafa staðið alla tíð og meira að segja fóru þjóðirnar í stutt stríð árið 1971 út af sjálfstæðisbaráttu Bangladesh. 

Slík átök eru meira áhyggjuefni en ella vegna kjarnorkuvopnaeignar þessara þjóða. 

Eignarhald æ fleiri ríkja á kjarnorkuvopnum hefur verið kveikjan að viðleitni til þess að hefta frekari útbreiðslu slikra ógnarvopna, því að hættan á kjarnorkustríði verður augljóslega því meiri sem fleiri ríki ráða yfir þeim.  

Ætla að einangra Pakistan frá umheiminum