Bæði verðlaun dagsins tengd fræðslu um náttúruverndar-og umhverfismál.

Bæði verðlaunin á Degi íslenskrar náttúru í dag tengdust fræðslu um náttúruverndar- og umhverfismál, því að þáttaröðin, sem Saga film fékk verðlaun fyrir, innihélt áhrifamikla og vandaða fjölmiðlun og fræðslu um þau mál í sjónvarpi. 

Umhverfisráðherra benti á það í morgun, þegar Jóni Stefánssyni kennara í Hvolsskóla, voru veitt verðlaun Sigríðar í Brattholti, að að baki Gretu Thunberg og öðru ungu fólki um allan heim, sem nú léti til sín taka í þessum málum, stæðu kennarar og uppalendur, sem hefðu með starfi sínu og elju lagt grunn að þeirri þekkingu um þennan mikilvægasta málaflokk þessarar aldar, sem nýst gæti til þess að ná sem mestum árangri. 

Verðlaun veitt á degi íslenskrar náttúru

Alveg ný hernaðarstaða, drónahernaður?

Drónahernaður gæti orðið nýyrði um þá möguleika, sem virðast vera að opnast varðandi á fjarstýrðan hernað, sem kallar á alveg ný viðbrögð. 

Á sínum tíma kom skæruhernaður til sögunnar sem gerði það að verkum við hentugar aðstæður að vinna hressilega á móti sterkri stöðu venjulegs herliðs. 

Svipað kann að vera að þróast um þessar mundir þar sem einföld og afmörkuð fjarstýrð herför kostar ekki eitt einasta mannslíf eða herflutninga en veldur ótrúlega miklu tjóni, sem hefur mikil áhrif um allan heim. 

 

Olíuverð byrjað að hækka

"Fyrsti vetrarsnjórinn" verður varla á vetur setjandi.

Þegar litið er á veðurspána fyrir næstu viku sést, að það sem kallað er "fyrsti vetrarsnjórinn" verður hugsanlega ekki vetrarsnjór, því að spáð er 8-12 stiga hita út vikuna í Reykjavík. 

Þar að auki sýnist þessi nýi snjór ekki vera þykkari en það að hann er þegar farinn að láta á sjá. 

Og hvarf skaflsins í Gunnlaugsskarði og fróðlegur pistill Trausta Jónssonar um það hvernig sumarið í Reykjavík, ef miðað er við 9 stiga meðalhita, hefur lengst um meira en þrjár vikur frá því sem áður var.  

Fyrsti vetrarsnjórinn fallinn á Esjuna

"Búnir að vita af þessu..." , já, af hættu í fimm ár! Ekki einsdæmi.

Er það furða þótt það ylli reiði hjá Sigurjóni M. Egilssyni að hlusta á það sem sjálfsagðan hlut hjá talsmanni Vegagerðarinnar, að hættulegt slitlag í hringtorgi sé búið að vera þar óhreyft í fimm ár og ekki enn komið að því að gera neitt í málinu. 

Sigurjón slasaðist illa á vélhjóli á torginu þegar hann féll á gölluðu og flughálu slitlagi fyrir fimm árum, missti vinnuna og er 75 prósent öryrki síðan. 

Og það mun vera slatti af fólki, sem hefur slasast þarna vegna þessara óafsakanlegu aðstæðna. 

Langflest meiðsl á vélhjólum verða á höfði og ökklum. Þess vegna eru hlífðarhjálmar og vélhjólastígvél með ökklavörn efst á lista vélhjólamanna. Þar á eftir geta komið hanskar með vörn, hnéhlífar, leðurgalli með vörnum, þar á meðal öflugri bakverju. 

En það er engin leið að sjá það fyrir hver meiðslin verða nákvæmlega, því að menn geta lemstrast og brotnað hvar sem er á líkamanum í vélhjólaslysum. 

Í tilfelli Sigurjóns voru það hvorki ökklar né höfuð, sem sködduðust, heldur rif og öxl. 

Og tilfellin eru fleiri og víðar, vegna þess, að þegar verið er að endurnýja slitlag, eru yfirleitt engin viðvörunarskilti sett upp þótt nýtt slitlag geti verið flughált eins og svell, ef það er blautt.  

Síðuhafa er kunnugt um dæmi þess að vélhjólamaður, sem kom óviðbúinn inn á slíkt slitlag, lenti í svo alvarlegu slysi, að hann glímdi við afleiðingarnar í áratug. 

Annar ökklinn brotnaði svo gersamlega í mél, að það þurfti margar og ítrekaðar aðgerðir til að koma honum í svipað horf. 

Að sjálfsögðu á að setja upp rækileg hálkumerki þar sem svona slitlag byrjar. 

Síðuhafi hefur reynslu af því, að á einum stað þar sem aka þurfti af stað upp brekku við byrjun slíks slitlags við umferðarljós, var erfitt að koma í veg fyrir það að spóla á hjólinu, jafnvel þótt gætt væri ítrustu varkárni. 

Litlu munaði í því tilfelli, og um vélhjól gildir einfaldlega annað en bíl; það er bannað að detta. Punktur. 

Síðan má bæta því við að síðuhafi axlarbrotnaði í upphafi árs vegna þess að annar maður á rafreiðhjóli hjólaði skyndilega í veg fyrir hann á hjólastíg, var aðalástæðan að vísu sú að maðurinn var upptekinn við að horfa beint niður fyrir sig til að lesa af mæli (!) og sá mig því ekki koma á móti sér,  en útmáðar merkingar á miðlínu vegna viðhaldsleysis, sem voru horfnar þar sem við mættust,  voru meðvirkandi orsök. 

 

 

Víða von á fyrstu hálku haustsins

Snjöll greining á geimveruruglinu við Snæfellsjökul.

Enn er í fersku minni margra þegar fólk og fjölmiðlar fóru fýluför upp undir Snæfellsjökul fyrir 30 árum til þess að sjá boðaðar geimverur koma þar til jarðar. 

Nú virðist eitthvað svipað í uppsiglingu í tveimur smábæjum í Nevada. 

Engin kom geimveran að Snæfellsjökli á sínum tíma, en nokkrum árum síðar þegar hópur fatlaðra og þroskaheftra í ferðahópnum Flækjufæti fór í draumaferð sína alla leið upp á tind hins fræga fjalls, hitti einn hinna fötluðu þátttakenda naglann á höfuðið í snjöllu tilsvari við spurningu minni þar uppi um það hvort við myndum hugsanlega sjá geimverur. 

"Jú, og við erum þegar búnir að sjá þær", svaraði hann.  

"Ha?" hváði ég, steinhissa. 

"Já, Ómar minn, við, sem erum hérna, erum öll geimverur." 

Einfalt og snjallt svar. Auðvitað eru allir jarðarbúar geimverur, úr því að þeir búa á einni af plánetum geimsins og alheimsins. 

 

 

Brandarinn sem gæti breyst í hörmungar

"Á skal að ósi stemma" sagði Þór. Þetta gengur ekki svona.

Með þessum orðum átti Þór við það, að ef menn ætluðu að stöðva flóð, yrði að gera það við upptök þess.  

Fyrir um 30 árum hrökk þjóðin við þegar henni var sýnd hin skelfilega ruslmengun á ströndunum í Strandasýslu. 

En það var fljótt að gleymast og það gerðist ekkert umtalsvert í málinu.

Fyrir nokkrum árum fékk Tómas Knútsson verðskuldað verðlaun Sigríðar í Brattholti á Degi íslenskrar náttúru fyrir brautryðjendastarf sitt með stofnun Bláa hersins og sérstaklega ósérhlífið hugsjónastarf í því að benda á sívaxandi mengun hafsins og strandanna og grípa til aðgerða. 

Í sjónvarpinu er nú búið að sýna myndir frá Jan Mayen þar sem hundruð tonna af rusli frá Íslandi þekur strendurnar.

Já, frá Íslandi, því að lesa má merkingar á þessu rusli, sem að stórum hluta er plastrusl, sem eyðist ekki. 

Og er komið þúsund kílómetra vegalengd frá upprunalandi sínu. 

Þetta gengur ekki svona lengur.  

 

 

Erlend aðstoð í strandhreinsun

Draumur um þjóðþrifaverk að rætast.

Eitt af mörgu, sem reifað var strax á fyrstu árum þessarar vefsíðu var þörfin á brú yfir Þverá á milli Odda á Rangárvöllum yfir á veginn, sem liggur meðfram Þverá frá austri til vesturs sunnan megin við ána og ber heitið Bakkabæjavegur.  

Þegar gaus á Fimmvörðuhálsi og í Eyjafjallajökli og órói var austar, var ljóst, að slík brú yrði forsenda þess að hægt yrði að rýma flatlendið ef mikil hamfaraflóðbylgja kæmi eftir gos undir austanverðum Mýrdalsjökli. 

Stólpatré í Drumbabót suður af Fljótshlíð, höggvin niður af slíkri bylgju fyrir Íslandsbyggð, sýndu hve óhemju eyðingarafl slík flóðbylgja gæti orðið. 

Og þar að auki verður Oddabrú mikið hagræði og lyftistöng fyrir alla umferð á þessu svæði. 

Styttist í Oddabrú yfir Þverá

Vaxandi rugl dag frá degi.

Fyrirsögnin á tengdri "frétt á mbl.is hefur fengið að standa óbreytt síðan í gær: "Rooney spáir því að Kane bætti markametið." 

Þetta er fullkomið rugl. Setningin byrjar í nútíð, "...Rooney spáir..." en fer síðan yfir strax í þátíð, "...Kane bætti..."  

Í fyrradag las fréttamaður í útvarpi: "Dómarinn sagði, að hann hættir eftir mánuð."

Setningin byrjar í nútíð: "...Dómarinn sagði..." en fer umsvifalaust yfir í nútíð: "...að hann hættir..."

Hingað til hafa aðeins nokkurra ára gamlir krakkar talað svona, en þetta er orðið daglegt brauð hjá fjólmiðlafólki, en það er ekki verst, heldur viðgengst þetta eins og ekkert sé.  

Rooney spáir því að Kane bæti markametið

Alltaf er skautað framhjá þverrandi auðlindum og stórfelldri rányrkju.

Í umræðum um loftslagsmál er það stór galli, að stöðugt er skautað framhjá þeirri staðreynd, að helstu orkuauðlindir jarðar og fleiri auðlindir fara þverrandi vegna hreinnar rányrkju. 

Núlifandi kynslóðir eru einfaldlega að hrifsa til sín auðæfi, sem fyrir bragðið munu ekki gagnast komandi kyslóðum, heldur verða þær látnar sitja uppi með afleiðingarnar af af því stófellda ranglæti sem felst í því að skila löndum og jörðinni allri í mun verra ástandi en hinir núlifandi tóku við því. 

Þessi stóra staðreynd er ein og sér næg ástæða til þess að stórtækra aðgerða til þess að koma á sjálfbærri þróun og stöðva rányrkju og eyðingu auðlinda jarðar.  

„Valkvæð túlkun á orðum mínum“

Vel innan marka atvinnusvæðis höfuðborgarinnar.

Vegalengdin frá Hveragerði til þunhamiðju höfuðborgarsvæðisins á stærstu krossgötum landsins er innan við 40 kílómetrar, eða sem svarar um hálftíma akstri. 

Hveragerði er því vel innan marka sameiginlegs atvinnusvæðis höfuðborgarinnar og býr því yfir margs kyns möguleikum fyrir atvinnu og búsetu. 

Mikil og samfelld fjölgun íbúa í Árborg, tólf kílómetrum fjær, sýnir þróun, sem virðist gerast af sjálfu sér en getur orðið enn örari þegar framkvæmdar eru ferskar og djarfar hugmyndir.  

Mikil uppbygging strax á næsta ári