Heilmikið mál að "kópa við" "trendin", sem "trenda" 2022 á "háum leveli."

Dæmi um "trendin" sem nú komast á æ hærri "level" í íslenskri málnotkun má sjá í viðtengdri frétt á mbl.is um "heitustu eldhústrendin fyrir 2022" eins og það er kallað.

Þessi svonefndu "trend" í sókn enskunnar inn í íslenskt mál lauma sér víða inn, og hafa áður verið nefnd dæmi úr máli íþróttafréttamanna á borð við hina mjög svo misháu "levela" út um allar koppagrundir í íþróttunum, hina nýju sögn "að kópa við" og sögnin "að ranka" um það hve hátt afreksfólkar "rankar".  

Úr því mætti finna út eftirfarandi setningu, sem lýsi stöðu áskoranda nr. e9tt í þungavigt:

"Nú er spurningin "hvernig hann trendar á nýju ári og kópar við andstæðinga

á svona "háum leveli" sem "ranka" svona hátt þar sem heitustu boxtrendin eru."

Heitustu eldhústrendin fyrir 2022

"Jólastemning" kallast á við reginöflin.

Rauður er litur jólanna og nú eru rauð jól þar sem við mannfólkið ræktum með okkur jólastemningu með kærum kveðjum og óskum.

En rauður er líka litur eimyrjunnar sem nú þrýstir sér upp á við nokkra kílómetra norðaustur af Grindavík. 

Þetta minnir á að ræktun æðruleysis og trúar er nauðsynlegst þegar við erum minnt svona rækilega á ógnir undirdjúpanna. 

Með kærum jólakvæðjum er hér textinn "Jólastemning" við lagið "Christmas time is near" sem er að finna á plötunni "Jólalög" sem Sinfóníuhljómsveit Íslands gaf út fyrir sex árum, þar sem Bernhard Wilkinson stjórnaði hljómsveitinni, Margrét Pálmadóttir stjórnaði í Stúlknakór Reykjavíkur og Hulda Björk Garðarsdóttir söng einsöng.  

 

JÓLASTEMNING. 

 

Jólastemning er 

yfir öllu hér; 

gleðitíð, sem börnin blíð

nú biðja´að veitist sér. 

 

Snjókorn blærinn ber. 

Boðskap flytja mér 

dýrðarsöngvar dægrin löng, 

sem dilla mér og þér. 

 

Sögur, ljós og ljóð

ljúft við tónaflóð. 

Mitt í dróma myrkurs ljómar 

minninganna glóð. 

 

Jólastemning ber

birtu, ósk mín er, 

að alla tíð, já ár og síð

allt árið ríki´hún hér; 

 

að einlæg gleði´og ástargeð

æ gæfist mér og þér.

 

p.s.  Á tónlistarmyndbandinu á facebook síðu minni er í lok 3. erindis lesið "...minninganna flóð."  En á að vera  "...minninganna glóð."

 

 

 

 

 

 

 

 

 

 

 

 

 

2  

 

Skjálftinn var 4,7 að stærð

Loftslagsmálin snúast um núverandi aðstæður, - ekki fyrir þúsundum ára.

Á samfélagsmiðlum er furðu oft rökrætt um áhrif loftslagsbreytinga í nútímanum með því að fara þúsundir og jafnvel milljónir ára aftur í tímann. 

En viðfangsefni nútímanst snúast hins vegar um þær breytingar, sem eru að gerast núna, við núverandi aðstæður og framundan. 

Hundruð mlljóna manna búa nú á láglendissvæðum á borð við Maldivieyjar eða borgarstæðum milljóna íbúa hafnarborga.  

Bráðnun jökla og hækkun sjávar hafa því allt aðrar og meiri afleiðingar en samsvarandi breytingar í löndum þar sem örfáir bjuggu, miðað við það sem nú er.  

Meðalhiti tæplega 20 stigum hærri á Grænlandi

Baráttan við sýkla og veirur er langhlaup án enda.

Ókeypis og óvæntur fyrirlestur sérfræðilæknis um borð í Fokkervél sem flaug frá Akuryri til Reykjavíkur fyrir um  aldarfjórðungi veitti sýn, sem þá var spánný um þá heimsstyrjöld, sem í vændum væri á 21. öldinni milli þjóða heims og sýkla og veira. 

Hingað til hefur allt umræðuefnið gengið eftir. Læknavísindamenn hamast við að þróa mý og ný lyf í kapphlaupi við ný og ný afbrigði af sýklum og veirum, sem spretta upp með fjölónæmi, sem eingkum er vegna gáleysilegrar meðferðar á lyfjunum og / eða með stökkbreytingum.  

Þrátt fyrir framfarirnar í lyfjsgerð er afar vafasamt að "endalok plágunnar séu í augsýn. 

Rétt eins og sýklar og veirur aðlaga sig sífellt að nýjum og öflugri lyfjum, þurfa þjóðir heims að alaga sig að hinu nýja styrjaldarástandi sem ekki mun linna.  

Endalok plágunnar mögulega í augsýn

Gömul þjóðsaga: Þegar Búnaðarþingsfulltrúinn fann jeppann sinn of seint.

Best er greina frá því í upphafi að það getur svo sem komið fyrir hvern sem er að muna ekki hvar hann hafi lagt bílnum sínum, líka þann sem þessar línur skrifar. 

Áhrifamaður í félagsmálum úti á landi, sem við skulum bara kalla Kristján, lenti í ýmsum uppákomum, sem varð að hálfgerðum þjóðsögum og meðal margra þeirra er þessi hér. 

Hann var fulltrúi á Búnaðarþingi, sem haldið var í Bændahöllinni, en í lok dagskrár fóru fulltrúar til boðs þáverandi landbúnaðarréðherra, sem var haldið annars staðar í borginni.

Brá þá svo við að Kristján fann ekki jeppann sinn; mundi ekki hvar hann hafði lagt honum. 

Hann var auk þess búinn að gleyma sérkennum jeppans sem var af algengustu gerð jeppa sem þá voru á landinu og því keimlíkur mörgum öðrum jeppum á svæðinu. 

Óku aðrir nú á brott, en þegar hinn gleymni félagsmálafrömuður var spurður að því af hverju hann væri hættur að leita að bílnum en samt ekki farinn til boðs ráðherra, sagðist hann ekki sjá annað ráð en að bíða þangað til allir bílar væru farnir af svæðinu, og ef einn stæði þá eftir, hlyti það að vera hans. 

Hann kynni ekki við það að fara að prófa lyklana, sem hann var með, á bílunum sem þarna voru. 

En svo fór að lokum að það leið svo langur tími þar til þap gerðist, að einn bíll var eftir, og reyndist sá rétti, að loksins þegar hann ók í burtu á þessum eina bíl sem eftir stóð, hafði hann misst af móttökunni góðu. 

Verst að sofa yfir sig og muna ekki hvar bílnum var lagt

Nokkurra alda eldgosatímabil hafið?

Strax í upphafi hinna löngu skjálftahrinu utarlega á Reykjanesskaga fyrir tveimur árum var það nefnt hér á síðunni að hugsanlega væri nýtt nokkurra alda tímabil eldvirkni hafið á skaganum eftir 800 ára ládeyðu.  

Skjálftahrinan nú gefur tilefni til að endurtaka þetta: Nokkura alda eldgosatímabil líkt því sem var frá landnámstíð til tólftu aldar. 

1.700 skjálftar mælst á síðasta sólarhring

Þarf þá ekki að reka sóttvarnarlæknana í öðrum löndum líka?

Eftir að Covid-19 hefur grasserað í tæp tvö er algengasta mynd faraldursins í grófum dráttum sú, að eftir að slakað hefur verið á sóttvarnarráðstöfunum, hefur riðið yfir ný bylgja farsóttarinnar, svo að orðið hefur að herða sóttvarnaraðgerðir á ný. 

Þetta hefur gerst hvað eftir annað í flestum ríkjum, meðal annars hér á landi haustið 2020 og svo aftur núna. 

Í viðtengdri frétt á mbl.is um þetta mál kemur fram í viðtali við lögmann samtaka um frelsi og afnám ráðstefana sóttvarnarlæknis, að nú eigi hann að segja af sér og "taka ábyrgð" á ástandinu. 

Er þróun mála hér þessa dagana þó ekkert frábrugðin því sem er og hefur verið í fjölmörgum öðrum löndum á undan okkar landi þar sem sóttvarnarlæknar þeirra landa sitja sem fastast.

Það þarf aðeins nánari útskýringu á því hvers vegna besta ráðið hér á landi gegn heimsfaraldri sé að aflétta öllum varnaraðgerðum og reka sóttvarnarlækninn.   

 

 

Finnst að Þórólfur eigi að segja af sér

Verða fleiri á faraldsfæti og ný mynd í borginni?

Brotthvarf Eyþórs Arnalds úr borgarpólitíkinni gæti verið hluti af víðtækari undirliggjandi straumum á þessum vettvangi. 

Bogarstjóri hefur til dæmis ekki tekið endanlega af skarið um sitt frammboð, og þar sem mannaskipti hjá stjórnarandstöðunni virðast geta orðið hvar sem er, er slík afstaða Dags ekki bara skiljanleg, heldur fullkomlega eðlileg. 

Eyþór Arnalds gefur ekki kost á sér

Órói við Hamarinn í aðdraganda Gjálpargossins 1996. Smágos 2011?

Órói við Hamarinn mánuðum á undan Gjálpargosinu 1996 byrjaði þótti út af fyrir sig ekki benda til þess að eldgos væri í vændum.  

Þó voru reyndar uppi vangaveltur að einhver kvika hefði komist upp úr jörð þar um slóðir en síðan ekki söguna meir. 

Í júlí 2011 voru hræringar undir jökli; og vísindamenn voru ekki alveg sammála; hugsanlega smágos en líka hugsanlega vaxandi jarðhitavirkni. 

Óvissa um svona fyrirbrigði er alveg í samræmi við það, að skjálftar og skjálfahrinur enda hvergi nærri alltaf með eldgosi. 

Jarðskjálfti af stærðinni 2,5 við Hamarinn

Eitthvað annað drepur þig fyrst.

Þótt niðurstöður "blóðskimunar til bjargar" virðist við fyrstu sýn ekki uppörvandi, gat síðuhafi séð margar jákvæðar hliðar á þessu dýrmæta framtaki. 

Blóðeitrun í fæti, sem lagði viðkomandi í rúmið í nokkrar vikur, reyndist heppni, þegar að var gætt, ekki bara að unninn var bugur á henni, heldur vegna þess að í tengslum við hana var boðið upp á ókeypis "blóskimun til bjargar" sem leiddi síðan af sér bréf, sem tilkynnti um niðurstöðuna: "Forstig að mergæxli." 

Hægt var að segja sínum nánustu frá þessu með þeim orðum að þetta væri góð frétt. Nú, hvernig þá? 

Jú, ef þessi skimun hefði ekki verið gerð, væri ekkert vitað um þetta, en í staðinn fór í gang ferli þar sem fylgst yrði sem best með stöðunni. 

Nánari skoðun leiddi líka annað í ljós, sem útaf fyrir sig voru góðar fréttir, svo kaldhæðnislega sem það hljómar: 

"Þetta er á miklu frumstigi og þú skalt ekki hafa of miklar áhyggjur af þessu; þú ert orðinn svo gamall, að langlíklegast er að eitthvað annað drepi þig fyrst." 

Við hliðina á blóðskimunarstaðnum í húsi Krabbameinsfélagsins eru dyr með áletruninni "Lífið er núna", aðsetur samtaka sem bera heitið "Kraftur". 

Meðan beðið var eftir blóðskimuninni þarna, sköpuðust fróðlegar og gefandi umræður um málefnin, sem þarna voru á sveimi og gáfu tilefni til þess að gera hughreystingar- og uppörvunarþrungið lag og ljóð undir heitinu "Lífið er núna". 

Það felur í sér einfalda alþýðuheimspeki, en samt var þetta það snúið, að gerð lags, ljóðs og tónlistarmyndbands, sem nýlega birtist á facebook síðu minni, tók þrjú ár.  

Um fjögur þúsund með forstig æxlis