Margir eiga bágt.

Illskiljanleg er sú heift og sú illkvittni sem virðist hrjá marga svo mjög, að þeir finna henni útrás á samfélagsmiðlum, jafnvel yfir hátíðirnar og birtist í hatursfullum hótunum og mjög meiðandi og síendurteknum persónulegum svívirðingum.

Þannig stóð ég í því fram yfir klukkan tvö í nótt að verjast innrás eins þessara manna, sem hefur árum saman ofsótt mann úti í bæ, sem ég þekki ekki neitt, með því að nota athugasemdadálk þessarar bloggsíðu til að endurtaka í síbylju óvenju rætin og meiðandi svívirðingar um þennan mann.   

Þetta virðist vera að færast í aukana á samfélagsmiðlunum og ljóst að furðu margir þessara ofsækjenda hljóta að eiga bágt, því að hatur fer oftast verst með þann sem hatar. 

Með ósk um að þeir finni sálarfrið sendi ég öllum mínar bestu óskir um gleðilegt´og farsælt nýtt ár.  

 

Hafa fengið líflátshótanir

0 - 35 gráður í stað 60.

Í umfjöllun fjölmiðla um braut 06/24 á Reykjavíkurflugvelli hefur láðst að nefna aðalorsök þess að hún er notuð, þ.e. af hverju ekki er hægt sð lenda á hinum tveimur við ákveðnar aðstæður þegar "neyðarbrautin" bjargar málum.

Aðalástæðan er sú að í stað þess að hinar tvær brautirnar liggi hornrétt ( 90 gráður) hvor á aðra, eins og víðast er á tveggja brauta flugvöllum, er vinkillinn 120 gráður á milli brautarstefnanna 19 og 31 á brautunum 01/19 og 13/31 á Reykjavíkurflugvelli, sem þrýst er á að nota einar en leggja braut 06/24 niður.

Þetta þýðir að hámarks hliðarvindur á Reykjavíkurflugvelli án neyðarbrautarinnar getur orðið 60 gráður í suðvestanátt í stað 45 gr. á flugvelli með tvær brautir, sem liggja hornrétt í hreinan rétthyrndan (90 gr.) kross.

Því stærri sem flugvélarnar eru og ofrishraði eða lendingarhraði þeirra meiri, því meiri hliðarvind þola þær.

Þess vegna kemur hliðarvindur minna að sök hjá stórum millilandaþotum á Keflavíkurflugvelli en hjá margfalt minni sjúkraflugvélum í Reykjavík, auk þess sem hámarkshorn hliðarvinds á Keflavíkurflugvelli er 45 gráður en ekki 60 gráður eins og á tveggja brauta velli í Reykjavík. 

Þegar við bætist hálka og að lendingarbrun og hraði flugvélar upp í hvassan mótvind er miklu minni en í miklum hliðarvindi skýrir það ástæðu þess hvað braut 06/24 getur verið ómissandi í hvassri suðvestanátt sem stendur beint á þá braut ( 0 gráðu hliðarvindur) í stað þess að vera 60 gráðu hliðarvindur á hinar brautirnar ef neyðarbrautarinnar nyti ekki við. 

Á meðan 06/24 brautin er við lýði verður hámarks horn hliðarvinds á Reykjavíkurflugvelli 35 gráður í stað 60, ef brautin verður lögð niður.   

Staðbundnar aðstæður ráða oft miklu og bálhvöss og byljótt suðvestan átt með éljum að vetrarlagi er þekkt fyrirbæri í Reykjavík.

Þess má geta að samkvæmt gögnum veðurstofunnar var meðalvindur í suðvestanáttinni á Reykjavíkurflugvelli 35 hnútar um miðjan dag í gær en 47 hnútar í hviðum, en seinni talan er mikilvægari. Báðar tölurnar voru ofan við þolmörk flugvéla í innanlandsflugi í 60 gráðu hliðarvindi.     

Tvær lendingar á neyðarbrautinni

Blökkusöngkonur: Fágætir listamenn.

Aretha Franklin hefur verið kölluð drottning Soul-tónlistarinnar. Ekki þarf að hlusta lengi á söngkonur nútímans til þess að heyra hve mikil áhrif hún hafði.

Einhver ánægjulegasta dagskrárgerð í ljósvakamiðli, sem mér hefur hlotnast að gera síðustu árin, var 40 mínútna þáttur um blökkusöngkonur þar sem lífshlaup Nínu Simone var rauður þráður.

Nina var undrabarn í´píanóleik og kom fyrst fram í kirkju í Filadelfíu. Þar rak hún sig strax á mismunun kynþátta, því að meina átti foreldrum hennar að sitja fremst í kirkjunni, því að fremri hlutinn var ætlaður hvítu fólki eingöngu.

Sú stutta harðneitaði þá að spila, og fékk sínu framgengt.

Kynþáttamismunun varð til þess að eyðileggja þann draum hennar að verða konsertpíanisti þótt hún stæðist allar kröfur þar að lútandi.

Hún neyddist til að spila og syngja á búllum, en það átti eftir að reynast happ, því að þar vakti hún athygli sem skilaði henni upp í eitt af efatu aæti bandaríska vinsældalistans með lagið "I love you Porgy."

Eitthvert ólíklegasta lag til vinsælda í miðju rokklagaflóðinu.

Ég minnist enn þeirrar ógleymanlegu sutndar þegar ég sat einn í litla Prinzinum mínum og hlýddi sem bergnuminn á þetta lag með henni þar sem það hljómaði í Kananum.

Hvet alla til að hlusta á það í ró og næði í upprunalegri útgáfu á YouTbe.

Ein blökkukona og eitt píanó.

Nokkrum dögum fyrir andlátið var Nína sæmd heiðursnafnbót og fékk afsökunarbeiðni hjá tónlistarstofnuninni, sem hafði hafnað henni 40 árum fyrr. 

Veröldin hefði orðið fátækari án hennar og allra hinn blökkusöngkvennanna. 

 

      

Obama táraðist yfir söngnum

Og þetta var flokkur Abrahams Lincons.

Ein og hálf öld er liðin frá Þrælastríðinu í Bandaríkjunum. Það snerist um réttindabaráttu blökkufólks sem Abraham Lincoln forseti, leiðtogi Republikana, hafði fórnað lífi sínu fyrir.

Á þessum 150 árum hefur mikið vatn runnið til sjávar én samt hefði Lincoln varla órað fyrir því hvert flokkur hans myndi leita til að afla sér fylgis, en tengd frétt á mbl.is segir sína sögu um það.

Í aðdraganda kosninganna virðist yfirburðafylgi Donalds Trumps eflast við það að gefa æ svakalegri yfirlýsingar.

Það er eitt af of mörgum dæmum um það á hvaða mið flokkur Lincolns og fylgismenn hans freistast til að róa, því miður.  

Repúblikanar dekktu húðlit Obama

Nú myndi ég klappa, væri ég ekki brotinn.

Viðtöl Brodda Broddasonar við veðurfræðing og fleiri í hádegisfréttum Ríkisútvarpsins ættu að vera skyldunámsefni fyrir alla þá sem eru að læra fjölmiðlun.

Í stað landlægrar kranablaðamennsku leiddi styrk hönd afburða fréttamanns viðtölin, byggð á þekkingu, yfirsýn og hæfni, alla í gegnum viðfangsefnið, svo að unun var á að hlýða.

Að ekki sé nú talað um óbrigðult málskyn og málnotkun Brodda, rammíslenskt alþýðumál eins og það gerist best. Fátítt er að heyra slikt nú á dögum.

Þarna heyrðist til dæmis orðið "hábölvað" sem varla hefur heyrst í fjölmiðli árum saman. Rétt orð í réttu samhengi.

Heyra má þær raddir, að RUV sé nátttröll sem eigi ekki rétt á sér við nútíma aðstæður.

75% þjóðarinnar eigi heima á Suðvesturlandi og allt sé að færast yfir á netið.

Raunar heldur RUV uppi öflugri þjónustu á netinu, en þessa gagrýnendur varðar ekki um það. 

Ef slíkar röksemdir eiga að ráða má allt eins leggja mestalla íslenska fjölmiðlun og íslenska tungu niður í ljósi þess að aðeins rúmlega 1% Norðurlandabúa eða 0,05% Evrópubúa eigi heima á Íslandi. 

Þeir, sem miða alla sína sýn á Ísland á slík rök undir yfirskini víðsýni, ættu að íhuga hvort sjónarhóll þeirra sjálfra þar sem sem allt er innan sjóndeildarhringinn utan um tölvuna þeirra, beri ekki vott um þröngsýni.

Um afgreiðslu RUV á óveðrinu, sem ekki rúmaðist innan þessa sjóndeildarhrings, segi ég bara: Nú skyldi ég klappa, væri ég ekki axlarbrotinn!  

 

Veðrið hefur náð hámarki

Aldahvörf og dögun í orkumálum.

Lokaskeið og hnignunarskeið Olíualdarinnar er að ganga í garð. Tákn nýrra tíma, svo sem  fyrirtæki á borð við Apple og Tesla, eru að reisa nýjar höfuðstöðvar þar sem risavaxnir fletir af sólarsellum eru áberandi.

Bæði þessi fyrirtæki eru ávöxtur mikilvægustu auðlindar jarðarinnar, hugvitsins.

Risaverksmiðja Tesla er í Nevadaríki þar sem er gnótt sólarorku og sjá má skóg af vindmyllum í nágrenninu, en slíkt er algeng sjón á leiðinni milli Nevada og Kaliforníu.

Sannanlega hrein og endurnýjanleg orka eins og sólarorka og vindorka, er efst á blaði, en notkun litíums er ekki endanleg lausn í gerð rafhlaðna á meðan magn þess á jörðinni er takmarkað.

En í gangi er mikil þróun í gerð rafhlaðna og engin ástæða til að örvænta.

Forráðamenn beggja fyrirtækja hófu feril sinn með óvenju sterka og öfluga framtíðarsýn, staðráðnir í að framkvæma það sem talið var ómögulegt.

Þeir hafa þegar framkvæmt "ómögulega" hluti, en gera sér þó grein fyrir því að skíma þeirrar dögunar sem þeir hafa átt þátt í að kveikja, er aðeins örlítið brot af því sem framundan er.

 

Fyrstu myndir af risaverksmiðju Tesla

Eins og varað var við.

Við upphaf ferðar breska gönguhópsins, sem nú hefur bæst í hóp hinna fjölmörgu útlendinga sem hafa farið flatt á því að ganga þvert yfir Ísland að vetrarlagi, voru talin upp helstu atriðin sem mæltu á móti því að reyna þetta.

Einnig nefnd dæmi um fyrri tilraunir í svipuðum dúr.

Tímasetningin var efst á blaði þess sem mælti á móti því að reyna þetta, svartasta skammdegið með verstu veðurskilyrði ársins alla jafna.

Um þetta leyti árs er lægsti loftþrýstingur jarðar skammt suðvestur af Íslandi en næst hæsti loftþrýstingur jarðar yfir Grænlandi.

Ég minnist aðeins eins janúarmánaðar á Íslandi, árið 1997, þegar stillur voru í hálfan mámuð. 

En raunin varð núna, eins og varað var við, alþekkt illviðri vegna óveðurslægða í röðum, og vonandi verður ofætlan bresku piltanna og kvikmyndin um hana með fælingarmátt sem (veðra)víti til varnaðar.

Ótrúleg upplifun þrátt fyrir óhöpp

Þriðja byltingin í "nærflugi".

Nýju Dash 8 Q400 skrúfuþoturnar, sem Flugfélag Íslands fær í byrjun næsta árs, bera með sér þriðju byltingua, sem orðið hefur í því farþegaflugi, sem kalla mætti "nærflug", - en það felur í sér innanlandsflug og flug til Grænlands og Færeyja.

Fyrsta byltingin varð fyrir 70 árum þegar byrjað var að fljúga á DC-3, önnur byltingin þegar Fokker skrúfuþoturnar komu 1964, og nú er þriðja byltingin í vændum, sem er það gagnger, að hún gæti fært nærflugið út til Skotlands og vesturstrandar Noregs, því að nýju vélarnar geta flogið allt að 25% hraðar en Fokker F50 vélarnar, komist til Færeyja á 1 klst og 20 mín og til Björgvinjar og Glasgow á 2 klst og 20 mín. 

Það munar um minna en slíka styttingu flugtíma.

Auk hraðaaukningarinnar taka nýju vélarnar 40% fleiri farþega en Fokkerinn, og afkastaaukningin er því svo mikil, að hægt verður að fækka ferðum milli Reykjavíkur og Akureyrar úr fjórum á dag niður í þrjár en samt hægt að flytja fleiri farþega samanlagt.     

Nýtt útlit hjá Flugfélagi Íslands

Að skjóta fyrst og þurfa ekki að spyrja.

Nýlega skaut bandarísk lögreglan unglingspilt til bana með 16 skotum í bakið. 

Í fyrra sýndi myndband tvo lögreglumenn salla niður 12 ára blökkudreng 2 sekúndum eftir að stigið var út úr lögreglubílnum.

Einu sinni var sagt um byssugleði: Skjóta fyrst og spyrja svo.

Eftir að hafa séð myndskeið af drápum bandarískra lögreglumanna og síðan frétt af sýknudóminum í Ohio-ríki virðist ljóst að löggurnar vestra stfni í að fá þvílíkt byssuleyfi að hægt verði að segja: Skjóta fyrst og þurfa ekki að spyrja.

 

 

 

Ekki ákærðir vegna dauða 12 ára drengs

Allt hefur sín takmörk.

Piratar eru smám saman að reka sig á, að rétt eins og það hefur reynst takmörkunum háð að hrinda ýmis konar útópískum hugmyndum í framkvæmd í mannheimum gildir svipað í netheimum, þar sem Píratar lifa og hrærast.

Spjallsvæðið þeirra stóra og opna var einstakt að þvi manni skilst, en nú hafa þeir neyðst til að boða nýjan og lokaðan umræðuvettvang.

Tvennum sögum fer af aðalásræðu þessa. Annars vegar mikill hamagangur innan Píratanna sjálfra og hins vegar gefur Jónas Kristjánsson í skyn að liðsmenn Hannesar Hólmsteins, sem fyrir nokkrum árum voru meðal annars nefndir AMX eða náhirð, hafi gert mikla innrás á síðuna með flóði af athugasemdum um atriði utan umræðuefnisins og þannig hleypt síðuuni upp. 

Þetta fyrirbrigði er ekki alveg nýtt og hafa margir eigendur netsíðna þær alveg lokaðar fyrir athugasemdum eða með hörðum takmörkunum til þess að verjast þessu hvimleiða fyrirbæri.

Fá í staðinn oft orð í eyra fyrir ofbeldisfulla rítskoðun á síðum sem eru þó þeirra eign.

Píratar eru nú að ganga í gegnum það sem fellur undir rússneska máltækið: Þegar jörðin þiðnar koma ormarnir upp. 

Illdeilur á hópspjalli Pírata