Löngu svikið og gleymt er stefnuloforð Pírata 2014.

Í aðdraganda borgarstjórnarkosninganna í Reykjavík 2014 var það yfirlýst stefna Pírata að beita sér fyrir beinu lýðræði á borð við það að halda atkvæðagreiðslur um mikilsverðustu málefni. 

Um leið og þeir áttu kost á því að komast í meirihlutasamstarf í borgarstjórn brá svo við að þetta stefnumál hefur verið sett ofan í skúffu síðan hjá þeim. 

Staðsetning stærsta og mikilvægasta flugvallarins fyrir innanlandflug er augljóst efni í almenna kosningu um það, og í öllum skoðanakönnunum síðustu 15 ára hefur verið drjúgur meirihluti fyrir núverandi staðsetningu, bæði hjá borgarbúum og allri þjóðinni. 

Kosningunni 2001 var klúðrað með því að seta reglur um lágmarksþátttöku fyrir því að hún væri gild, en þátttakan var bæði langt frá því að ná því marki, auk þess sem aðeins nokkur hundruð atkvæðum munaði um niðurstöðu. 

Illu heilli var hafður uppi sá málflutningur hjá áhrifamönnum í þáverandi minnihluta að þeir, sem vildu hafa völlinn áfram á sama stað, sniðgengu kosningarnar. 

Í ofanálag var hún rafræn á tíma þar sem það þýddi fjarveru þúsunda fólks á kjörskrá.  

Mótfallin þjóðaratkvæðagreiðslu um flugvöllinn

Nýtt gullaldarlið aðallandsliðsins í uppsiglingu?

U21-landsliðið sem nú stefnir á annað af tveimur stærstu mótunum sem í boði eru í vinsælustu íþróttagrein heims á ekki aðeins skilið hrós og heiðður heldur getur, ef rétt er á haldið og arkað að auðnu, verið í fæðingu hópur sem getur orðið að nýju gullaldarliði eftir nokkur ár. 

Verði þannig í stöðu tll þess að jafna árangur landsliðsins frá síðustu árum, en þar að auki stefnt að því að ná enn lengra. 

Til hamingju, strákar!  

Sæti Íslands á EM öruggt

Klettsháls er meira lokaður heldur en Hálsarnir.

Það á ekki að koma á óvart hve oft vegurinn um Klettsháls er lokaður. 

Það kom til dæmis vel í ljós í langvinnu norðanhreti sem gerði fyrir jól fyrir nokkrum árum. Þá voru fjallvegir á öllu norðanverðu landinu, allt frá Vestfjörðum til Austfjarða lokaðir mestan part og Klettsháls og Kleifaheiði voru ögn skárri. 

Hálsarnir þrír í Gufudalssveit voru hins vegar opnir alla daga nema einn, enda þótt þeir hafi, eins og Dynjandisheiði verið að mestu í sama horfi í meira en sjötíu ár án bundins slitlags. 

Raunar er hæpið að flokka Ódrjúgsháls sem fjallveg, því að þar nær vegurinn aðeins 160 metra hæð yfir sjó, aðeins 15 metrum hærra en Vatnsendahvarf hér syðra.

Hvaða meginbreyting á vegstæði þarna um sem til greina kemur, felst í því að losna við eina slæma og bratta beygju í austanverðum hálsinum og afnema brattar og krókóttar brekkur við Krossgil á vestanverðum hálsinsum. 

Vegurinn um Klettsháls var lagaður mikið þegar bundið slitlag var sett á hann, og því er ekki hægt að laga hann neitt að ráði.  

 

Lokað 40 sinnum á árinu

Græn hugsun og stefna eru hvorki hægri né vinstri.

Hugmyndir formanns breska íhaldsflokksins um græna iðnbyltingu eru dæmi um það að fólk þarf hvorki að vera hægri né vinstri menn til þess að sja kosti grænnar stefnu. 

Það hefur verið lenska lengi að núa þeim sem aðhyllast græna stefnu í efhagsmálum því um nasir að vera jafnvel "kommar" en það hljómar svolítið gamaldags og úrelt að segja slíkt um formann breska íhaldsflokksins.  

Á nýrri öld þar sem krafan um sjálfbæra þróun er forsenda lífs jarðarbúa er sá flokkur í skástum málum, hvort sem er til vinstri eða hægri, sem skynjar og úthugsar lausnir sem eru fyrst og fremst grænar. 

Johnson vill græna iðnbyltingu

Kynslóðaskipti hjá örþjóð. Kannski fimm ár í nýtt gullaldarlið.

Fyrir rúmum áratug eignuðust Íslendingar gullaldarlið í knattspyrnu í unglingaflokki, Gylfa Þór Sigurðsson, Kolbein Sigþórsson og kó. +

Þá spáðu margir því og þvi var spáð á þessari síðu, að ef þessi liðsheild héldi áfram að þroskast yrði möguleiki á fyrsta alvöru gullaldarliði Íslendinga í knattspyrnu eftir fimm ár. 

Sú varð raunin, svo ótrúlegt sem það var að þjóð sem gat rúmast við nokkrar götur í erlendri borg, gæti ungað út svona mörgum góðum leikmönnum sem gæti enst nógu mörg ár til að komast á eitt EM, hvað þá HM. 

Það spilaði með að við vorum afar heppnir með þjálfaratvíeykið Lagerbeck og Heimi Hallgrímsson auk einstaklega góðrar stemningar hjá þjóðinni. 

Í síðasta leiknum til að komast á næsta HM leiddu Íslendingar í 83 mínútur. 

Þegar skoðaðar eru myndir af þeim tíu mínútum sem þá voru eftir sést áberandi, að gömlu jaxlarnir og máttarstólparnir, sem eru búnir að afkasta einstaklega erfiðri leikaðferð án mistaka, eru að verða búnir með allt af tanknum, orðnir örlítið hægari og einn þeirra, hinn frábæri fyrirliði, verður að fara af velli og skipta út við frískari mann. 

Þetta var einfaldasta atriði í heimi íþrótta og lífinu sjálfu. Það voru komin kynslóðaskipti, aldurinn farinn að sækja á. 

Þetta eru eðlilegar fréttir og góðu fréttirnar eru þær, að nú hillir undir svipaða framtíðarkynslóð og 15 árum fyrr, sem er að gera góða hluti á stórmótum unglingalandliðsins. 

Þetta er von sem getur ræst ef allt fellur með okkur. 

En það er augljóst, að á tímum eins og núna þegar heimsfaraldur heggur skörð í hópa bestu afreksmanna þjóða, geta Íslendingar ekki krafist þess að vera með jafn stórt og víðfeðmt úrval af leikmönnum í hæsta gæðaflokki og stórþjóðirnar.  

Ísland steinlá í kveðjuleik Hamréns

Bandaríkjaforseti fullkomlega samkvæmur sjálfum sér?

Þegar núverandi Bandaríkjaforseti var kjörinn fyrir fjórum árum var ein helsta yfirlýsing hans sú, að reka úr starfi alla þá vísindamenn sem væru staðnir að því að kómast að röngum niðurstöðum í vísindasamfélaginu og ráða í staðinn "alvöru" vísindamenn sem kæmust að öðrum, réttari og betri niðurstöðum. 

Sem dæmi nefndi hann þá sem stunduðu mælingar og rannsóknir á lofthjúpi jarðar og náttúru og ynnu með því á einkar skaðlegan hátt gegn orkustefnu Bandaríkjanna. 

Minna hefur orðið af efndum þessa loforðs en ætlunin var, enda hefði það kostað gríðarlega fjármuni að fara í slíka herferð, þótt ekki væri nema að að brottrekstur fjölda af þessu fólki var ekki á valdi forsetans.   

Hins vegar ætti engum að koma á óvart þótt Trump reki hvern þann sem ekki þóknast honum til fullnustu og forsetinn hefur vald til að reka. 

Sumir þeirra hafa fengið að vera óáreittir þegar niðurstöðurnar í viðfangsefnum þeirra hafa verið forsetanum í vil, svo sem varðandi síðustu kosningar, en um leið og niðurstöðurnar eru honum ekki í vil, er hann fullkomlega samkvæmur sjálfum sér með því að nota brottrekstrarvald sitt til hins ítrasta, ekki satt?

Rekinn í kjölfar yfirlýsingar

Fer að verða kominn tími á nýja heilsíðuauglýsingu um sóttvarnir?

Þegar hert var á sóttvarnaraðgerðum hér á landi fyrir nokkrum vikum birtist heilsíðuauglýsing í Morgunblaðinu með allharðri gagnrýni á þær, og var það einkum ástandið, sem þá var í Þýskalandi, sem var tekið sem dæmi um það hvaða villur vegar væri verið að fara hér á landi. 

Nú hafa málin hins vegar skipast þannig, að Ísland er með næst fæstu smittölur í Evrópu og álfan eldrauð á kortum eins og því sem birtist fyrir nokkrum dögum. 

Kannski er kominn tími á það að birta nýja og endurskoðaða heilsíðuauglýsingu til þess að útskýra þetta mál betur í ljósi reynslunnar?

Óhætt að ferðast til Íslands

"Við erum að sjá aukningu í magni fjölda fólks..."

Ofangreinda setningu mátti heyra í einum fjölmiðlinum á dögunum. Sá, sem sagði þetta hefði getað komist að með tvö orð í stað níu til að segja frá fjölgun fólks:  

"Fólki fjölgar". 

Af einhverjum ástæðum datt þessi pistill út í gær á Degi íslenskrar tungu í tilefni þess dags. 

Það er ekki aðallega enskan með sína áætlunarflugleggi sem sækir að íslenskunni heldur rökleysur og málalengingar. 

"Við erum að sjá..." virðist orðið svo nauðsynlegt orðalag, að heyra má heil viðtöl þar sem viðmælendur geta ekki tjáð sig nema að byrja sem flestar setningar á þessum algerlega ónauðsynlegu málalengingum. 

Orðin "aukning" og "magn" eru líka hvimleið tískuorð og ætli hámarkið sé ekki setning, sem sögð var hér um árið: 

"Það hefur orðið aukning í neikvæðri fólksfjöldaþróun.."

í stað þess að segja: 

"Fólki hefur fækkað."

Markviss hjólabylting í gangi.

Markviss hjólabylting hefur verið í gangi erlendis undanfarinn áratug en er nú fyrst að skila sér hér á landi. 

Þó er þar langt í land hér á landi, því að í hinni óhemju flottur flóru rafknúinna hjóla allt frá rafhlaupahjólum upp í rafknúin bifhjól er önnur bylting í gangi, út um allan heim hvað varðar rafknúin léttbifhjól með útkiptalegum rafhlöðum.  

Það þarf ekki að vera neitt flóknara að hafa slíkar rafhlöður til útleigu en til dæmis gaskúta, eins og víða tíðkast á bensínstöðvum. 

Á myndinni hér við hliðina má sjá slíkt hjól í Tæpei á Tævan við einn af næstum þúsund sjálfsölum með útskiptalegar rafhlöður.        

Á öllum stigum rafknúinna hjóla bera þau af í hagkvæmni á alla  lund miðað við bíla. 

(P.S.  Og Volkswagen verksmiðjurnar eru að setja á fót miðstöð fyrir nýja tegund samgöngumáta í formi verksmmiðju og deildar SEAT í Barcelona fyrir tveggja manna bílinn SEAT Minimo, sem verður með útskiptanlegum rafhlöðum. Sjá mynd.) 

Þannig er orkukostnaður þriggja rafknúinna farartækja, sem ég hef prófað undanfarin ár þessi. 

Rafknúið reiðhjól:        0 ,30 kr/km.  Hraði 20 km klst. 

Rafknúið léttbifjól       0,80 kr. km.  Hraðar 45 eða 60 km klst. 

Minnsti rafbíll á Íslandi  2,80 kr km.  Hraði 90 km klst. 

Sparneytnustu eldsneytiskrúnir bílar eru með nær þrefalt meiri orkukostnað en svona rafbíll. 

Bensínstöð orðin hjólreiðaverslun

1,8 metra fjarlægð í stað þriggja metra: Hluti af mesta hneyksli sögunnar?

Í þættinum 60 mínútum sem sýndur var á Stöð tvö síðdegis reyndu fréttamenn þáttarins að velja sér viðtalsfólk, sem voru í hópi reyndustu kosningasérfræðinga repúblikana. 

Þar bar á góma það kæruefni Trumps sem hann hefur nefnt einna oftast, að eftirlitsmönnum á vegum framboðs hans hafi verið meinaður aðgangur að talningu atkvæða í Pittsburg. 

Sýnd voru ummæli Trumps um þetta. "Þeim var gert að vera fjarri talningunni, já, í mikilli fjarlægð, svo mikilli að þeir gátu ekki fylgst með þótt þeir reyndu að nota sjónauka." sagði Trump.  

Þetta framferði gegn þessum mönnum átti að vera hluti af því sem hörðustu fylgismenn Trumps hafa kallað mesta hneyksli og misferli sögunnar, hvorki meira né minna. 

Yfirmaðurinn, sem átti að hafa beitt menn Trumps þetta ofbeldi, gamalreyndur republikani á staðnum greindi frá hinum raunverulegu málavöxtum. 

Mennirnir máttu upphaflega ekki koma nær en 3 metra, en látið var eftir þeim að vera í 1,8 metra fjarlægð (6 fet)! 

Annar viðmælandi var einn reyndasti sérfræðingur Bandaríkjamanna í kosningum, búinn að vera yfirlýstur republikani í 40 og var aðalfulltrúi Bush í Flórida í talningunni 2000. 

Hann var ómyrkur í máli um málarekstur Trumps núna, þar sem væri gerð ófyrirleitin tilraun til að fara offari með rakalausum þvættingi og tilefnislausum stóryrðum til þess eins að eyðileggja kosningakerfi, sem búið væri að þróa í eina og hálfa öld. 

Krafan um að stöðva kosningarnar og talninguna hefði verið einn liður í því. 

Slíkt bæri aðeins vitni um einbeittan vilja til þess að eyðileggja grundvöll lýðræðisins, frjálsar kosningar þar sem rétt úrslit fengjust.  

 

Slagsmál á samkomu til stuðnings Trump