'Það lengdist og lengdist í flug 787. Hve mikið nú varðandi 737 MAX?

Þegar töf varð á afhendingu hinna glæsilegu Boeing 787 Dreamliner þotna á fyrsta áratug aldarinnar var eitt erfiðasta atriði seinkunarinnar, hve oft og lengi hún dróst. 

Það vekur óhjákvæmilega spurningar um hve mikið og hve oft það muni dragast að Boeing 737 MAX þoturnar fái að fara í loftið. 

Það stefnir greinilega í það að aðal ferðamannatíminn muni að minnsta kosti líða án þess að vélarnar fái að fljúga, en á sínum tíma skipti töfin árum varðandi 787 þoturnar. 

Vonandi verður samanlögð töfin ekki eins löng nú, þótt óneitanlega veki það slæmar minningar hve lengi þetta dróst varðandi 787. 

Fresta flugi Max-véla fram í september

Einn af þeim stóru á alla mælikvarða.

Helgi Tómasson er eitthvert fegursta dæmið í sögu okkar litlu þjóðar um það hvernig maður frá einu afskekktasta byggða bóli heims kemst til ítrustu frægðar og frama fyrir eigin verðleika í hinum stóra heimi. 

Síðuhafi hefur lengi haldið upp á litla sögu af honum, sem honum var sögð að væri sönn, en segir mikið. 

Blaðamaður spurði Helga: 

"Hver er besti ballettdansari í heimi?"

Helgi tregðast við að svara en blaðamaðurinn gefur sig ekki og spyr: 

"Er það kannski Nurejev?" 

Helgi svarar: 

"Það er ekki hægt að svara svona stórri spurningu. Við erum þrír."

 

 

Ekkert minna en það besta

Ágætt að greinin leiti jafnvægis.

Ef það að ferðamannafjöldinn hér á landi sé ígildi hruns af því að hann heldur ekki áfram að vaxa á stjórnlausum hraða, virðist hugarfarið sem olli raunverulegu hruni í efnahagslífinu 2008 enn vera lifandi, með sinni miklu kröfu um endalausan vöxt.

En þetta er hugarfar sem er að keyra rányrkju á auðlindum og þröngsýna skammmgræðgishugsun jarðarbúa út í raunverulegar ógöngur á heimsvísu. 

Segir tal um hrun í greininni kjaftæði

Hjólin sækja á; líka í Ameríku.

Þegar síðuhafi er spurður af hverju tvö hjól, rafreiðhjól og vespuhjól, sem kemst á yfir 90 km hraða, hafa tekið við meira en helmingi af ferðaþörf hans innanlands, er svarið: "Þegar ég var unglingur sleppti ég skellinöðrutímabilinu og hljóp 19 ára beint af reiðhjóli yfir á minnsta, ódýrasta, sparneytnasta og umhverfismildasta bíl landsins. 

Núna er ég að vinna upp glötuð unglinsgár á gamals aldri."

Og síðustu árin ekki fallið úr vika, flestar þeirra með nógu góðu veðri upp á hvern einasta dag. 

Og þar sem ég er nú staddur yfir hvítasunnuhelgina í Barcelona er í boði augnaveisla hvað snertir alla hjólamergðina af hinu fjölbreyttasta tagi, sem hér getur að líta. 

Og jafnframt les maður í fréttum um hjólasport í Ameríku, landinu sem sumir vilja að verði "great again" með skattfrjálsu bensíni, hver maður á átta gata dreka brunandi eftir átta akreina hraðbrautum af því að enginn þurrð muni nokkurn tíma verða á ódýrri olíu úr óþrjótandi olíulindum heimsins. 

 

Mörg hundruð hjóluðu frá Hafnarfirði í Bláa lónið

Nýfallinn snjór er miklu fljótari að bráðna en gömul snjóalög.

Í kuldakastinu, sem nú fer að ljúka og kom í kjölfar meira en þriggja vikna hlýindakafla þar á undan, hefur, samkvæmt mælingum, ekki fallið það mikill snjór að hann muni verði lengi að bráðna. 

Úrkoma í frosti, það er snjór, hefur verið lítil á veðurstöðvunum frá Hveravöllum til Kárahnjúka, svona í kringum einn metri samanlagt. 

Þetta er mjúkt nýsnævi, og inn á milli hefur verið álíka mikil úrkoma í hita, þ.e. rigning, svo að hlýindi yfir 10 stig munu vinna hratt á þessu nýsnævi, margfalt hraðar en nemur bráðnun snævar, sem hefur þjappast saman og orðið að hjarni yfir veturinn. 

Á Sauðárflugvelli, í 660 metra hæð yfir sjó, var allur snjór og klaki farinn fyrir þremur vikum mánuði, og klakamyndun í kuldakastinu að undanförnu hefur verið það lítil, að það á eftir að þorna hratt nú eftir hvítasunnuna og verða svipað yfir að líta og sást á myndum, sem þá voru teknar og sýndar hér á síðunni.  

Spáir 25 stiga hita í næstu viku

Slæmar fréttir fyrir okkur. Við verðum að vinna Tyrkina!

Tyrkneska landsliðið niðurlægði heimsmeistara Frakka í undankeppni HM í kvöld.

Á hinum óhemju sterka heimavelli sínum náðu Tyrkir slíkum heljartökum á heimsmeisturunum, að það var fyrst eftir 65 mínútna leik í miðjum síðari hálfleik, sem Frakkar náðu að skjóta á tyrkneska markið. 

Aðeins tvö efstu liðin í riðlinum komast á HM og ekki er hægt að gera sér vonir um umspil eða aðra leið til þess að láta HM-drauminn rætast í annað sinn. 

Þótt Frakkar hafi steinlegið í kvöld, er ólíklegt að þeir muni láta okkur Íslendinga komast upp með múður í leikjunum við okkur.  

Eina von okkar sýnist því að vera sú að vinna Tyrki og hinar þjóðirnar, og lífsnauðsynlegt að vinna Tyrki á heimavelli okkar á þriðjudag, því að í síðari leiknum við þá úti í Tyrklandi eiga í áhorfendunum á heimavelli sínum eitthvert allra magnaðasta stuðnigslið, sem til er. 

 

Ógnarsterkir Tyrkir skelltu Frökkum

"Beltið og axlaböndin" eru viðurkenning utanríkisráðherrans.

Fylgjendur 3. orkupakkans þurfa að útskýra hvers vegna Guðlaugur Þór Þórðarson líkti fyrirvörunum í þingsályktun um pakkann sem "belti og axlaböndum." 

Og þeir þurfa líka að útskýra orð Baudenbachers um að "stjórnmálaleg óvissa" fylgdi beltinu og axlaböndunum og orð Friðriks Árna Friðrikssonar Hirst um að "stjórskipuleg óvissa" fylgdi beltinu og axlaböndunum. 

Þessi ummæli benda eindregið til þess að fara eigi út í óvissuferð með orku landsins, sem er ekki síður stór auðlind en fiskurinn í landhelginni. 

Þegar EES samningurinn var gerður, var það algert og tryggt skilyrði, að auðlindin væri örugglega í íslenskum höndum. 

Fylgendur með það að stunda áhættuspil með orkuauðlindina skulda þjóðinni útskýringu á því, af hverju ekki er hægt að hafa ákvæði um eignarhald Íslendinga á orkuauðlindinni eins skýra og ófrávíkjanlega og eignarhaldið á fiskveiðiauðlindinni.  

„Þér er ekki boðið“

Gott ef búið er að vinna bug á lokamínútudraugnum.

Í leik Albaníu og Íslands í dag skipti mestu máli að halda íslenska markinu hreinu. 

Það eitt er afar dýrmætt og fagnaðarefni. 

Í of mörgum leikjum síðustu misseri hefur íslenska liðið tapað vegna marka, sem það fékk á sig undir lok leiksins, og það getur til dæmis stafað af því að leikaðferðin hafi útheimt svo mikla eyðslu orku  og úthalds, að einbeitingu og snerpu hefur skort á mikilvægum augnablikum undir lok leiksins. 

Mjög mikilvægt er að dreifa orkunotkuninni þannig, að hún endist leikinn til enda, og enda þótt eittvað kunni að hafa skort á glæsileika í spilinu, skiptir mestu að hala öll stigin þrjú innfyrir með tiltækum ráðum, útsjónarsemi og yfirvegun. 

Perla Jóhanns í mikilvægum sigri

Nýir, djarfir og öflugir straumar hjá konunum.

Gaman er að sjá og heyra til framsækinna kvenna á öllum sviðum þjóðlífsins. Það var fyrir löngu kominn tími til að slíkt gerðist. 

Og það gleður síðuhafa að hafa á sínum tíma átt smá þátt í að skapa slíka stemningu með því að setja saman textann "Ég á mig sjálf", sem varð með tímanum ekki aðeins að einu þekktasta lagi Þuríðar Sigurðardóttur í kraftmiklum og mögnuðum flutningi hennar, heldur eins konar stemningar- og baráttulag íslenskrar kvenna. 

Lög eins og "Woman is the nigger of the world" ruddu braut nýrri sýn í jafnréttismálum víða um lönd, og ennþá er þörfin svo æpandi fyrir breytingar meðal hinna fátækari þjóða heims, að skelfing er að horfa upp á það þegar komið er til þeirra landa og ferðast um þau. 

„Veistu hvað ég heiti?“

Hver maður á hjóli með ökuréttindi á bíl skapar rými fyrir einn bíl.

Greinilegt er af samræðum síðuhafa á vespuhjóli sínu við ýmsa bílstjóra, sem verða á vegi hans, sýna, að mjög skortir á að allir hafi hugsað samspil bíla og hjóla í umferðinni til fulls.

Sum af þessum samtölum hafa farið fram á þann veg, að bílstjóri, sem bíður eftir grænu ljósi á gatnamótum, þar sem ég hef beðið samhliða honum eftir grænu ljósi, hefur rúllað niður hliðarglugga og skammast yfir veru minni og skipað mér að hunskast aftast í bílaröðina fyrir aftan okkur. Þar beri mér að vera. 

Ég hef svarað þessu á þann veg að vespan (Honda PCX 125 cc) sé fullgild í umferðinni á við bíl, geti farið á hverjum löglegum hraða sem er um vegakerfið og sé tryggð til fullnustu. 

Þar að auki hafi vélhjólamaður, sem fer þannig í gegnum umferðina að hann trufli ekki nokkurn mann né raski stöðu hans í raun orðið til þess að skapa rými fyrir einn bíl. 

Ef vélhjólamaðurinn væri á bíl, myndi hann taka upp fullt rými fyrir þann bíl. 

Ekki þarf annað en að vera á ferð í erlendri borg, eins og síðuhafi er nú, til að sjá hvílík gagnsemi fyrir umferðina í heild felst í því að ekki séu allir á ferð á fullstórum bíl. 

Víða má sjá sérstök stæði fyrir vélhjól, þar sem fimm vélhjól taka álíka mikið rými og einn bíll. 

Í raun á hið sama við ef maður með réttindi til aksturs bíl ferðast reiðhjóli, rafreiðhjóli, rafmagns- eða bensínknúinni vespu um hjólastíga með 25 km hámarkshraða, ekur ekki á bíl sínum, heldur á ökutæki utan bílvegakerfisins. 

Af þeim sökum er full ástæða til að bæta stígakerfið, sem víða er bæði lélegt, ófullkomið og óhentugt þótt miklar framfarir hafi orðið í lagningu hjólastíga. 

Þess má geta að á leið í bíl um hraðbraut við Lyon í Frakklandi fyrir nokkrum árum, varð klukkustundar töf við borgina vegna umferðarþungans sem þar var. 

Til gamans og fróðleiks kastaði ég tölu á vélhjól sem smokruðu sér í gegnum þröngina í hálftíma, og voru hjólin 78 með rúmlega 100 manns. 

Ef þetta fólk hefði ekki valið þennan ferðamóta, hefðu verið 78 fleiri bílar í kösinni og töfin lengri. 

 

Leggja 2,4 kílómetra af hjólastígum