Það er erfitt að keppa við Ísrael.

Sérstaða Ísraelsríkis hefur verið ansi mögunuð eftir að Gyðingum tókst að komast hjá því hroðalega takmarki Hitlers að útrýma gersamlega þessum 10,5 milljónum manna, sem skilgreindu sig sem sérstaka Gyðingaþjóð, útvalda af Guði með til að byggja fyrirheitið land.

Þótt um sex milljón Gyðingar væru drepnir, komust um fjórar milljónir af en áttu samt heima í mörgum löndum sem aðrar þjóðir voru búnar að byggja í meira en þúsund ár.  

Gyðingum tókst að stofna sérstakt Ísraelsríki 1948 og vinna sigra í alls þremur styrjöldum. 

1967 hernámu þeir stórt landsvæði sem Sameinuðu þjóðirnar skilgreindu ólöglegt að alþjóðalögum en Ísraelsmönnum hefur tekist að halda bæði völdum og skipulegu "landnámi" æ síðan. 

Ísrael tekur þátt í Eurovision þótt landið sé ekki í Evrópu og Ísrael nýtur vaxandi verndar voldugustu þjóðar heims, Bandaríkjanna. 

Landið varð kjarnorkuveldi í trássi við allar samþykktir og alþjóðasamstarf um þau mál, og hefur í ofanálag ekki þurft að standa nein skil á þessari sérstöðu sinni í Miðausturlöndum. 

Það þarf því engum að koma á óvart að Ísraelsmenn tækju stöðu sína í heimsfaraldrinum föstum tökum og í stil við annað sem þeir setja á oddinn. 

Nú blasir við að þeir hafa skapað sér sérstöðu, sem engin önnur þjóð geti keppt við. 

Í keppninni um bóluefnið verða aðrar þjóðir að miða sig við hverja aðra og keppa að forystu á því sviði, en gleyma Ísrael, sem hefur þegar brunað fram úr öllum, líka fram úr Kára og Þórólfi. 

Ísrael tilraunaríki fyrir Pfizer

Svartsengi er ekki "á Reykjanesi".

"Jarðskjálfti á Reykjanesi" er ansi loðin lýsing á því hvar 4,1 stigs jarðskjálfti varð í nótt. 

Skjálftinn varð nefnilega ekki á Reykjanesi, sem er ferhyrnt nes yst á Reykjanesskaganum , heldur við Svartsengi þar sem Bláa lónið er. 

Þetta er hægt að sjá með því að lesa það í texta fréttarinnar, að skjálftinn hafi orðið um sex kílómetra fyrir norðan Grindavík. 

 

Jarðskjálfti 4,1 að stærð á Reykjanesi

Gerbylting á örfáum árum.

Strax í upphafi bílaaldar lá það ljóst fyrir að rafhreyfillinn hafði, sakir einfaldleika síns og afkasta, yfirburði yfir sprengihreyfilinn.  

Öld síðar hefur bensínhreyfillinn ekki komist lengra í þróun sinni en það, að rafhreyfillinn meira en tvöfalt betur. 

Sagt er að eiginkona Henry Ford hafi heimtað að fá að sleppa við að aka bensínbíl og heimtað rafbíl, sem Ford hafi síðan látið hana hafa, þó án þess að hætta við að þróa bensínbílinn, því að völd og áhrif olíukónganna réðu þar ferðinni í heila öld í viðbót.

Undir lok 20. aldar fór að vísu að rofa til, en þá gripu ráðandi öfl til þess bragðs að kaupa jafnóðum upp þá, sem voguðu sér að reyna að ryðja rafbílnum braut. 

Giskað hefur verið á að rafbíllinn hafi verið stöðvaður í tuttugu ár af þessum sökum. 

Loks fór þó svo að uppgötvanir, sem ekki var hægt að stöðva, svo sem að nýta liþíum-ion í stað blý- og zilisíum- og zink-geyma, breyttu stöðunni. 

Þegar Tesla S kom fram fyrir um áratug, voru ekki margir trúaðir á neina rafbilabyltingu. Bíllinn þótti of dýr til þess að það væri nein ógn af Elon Musk og hans afurðum. 

En mönnum sást yfir margt í þessum dómum, til dæmis það, að rafbílar fram að þessu höfðu verið hannaðir á svipaðan hátt og bílar með eldsneytisknúna hreyfla. 

En í Texla S var þessu umbylt á þann hátt, að engin leið er að setja í hann bensínvél vegna hugvitssamlegrar dreifingar rafhlaðna og aflbúnaðar í bílnum, sem aðeins miðast við eiginleika rafhreyfla og rafmagns. 

Þetta var svipuð byling og þegar bensínvélin tók við að hestinum á sínum tíma og síðar byltingin með Mini þegar langsum hestur/bensínvél var leyst af hólmi með þversum vél í bíl, sem engin leið var að knýja með þversum hesti! 

Tesla S var sem sagt tákn um þá tregðu í hugsun sem oft kemur í veg fyrir framfarir. 

Þegar Musk sagði frá því að Tesla 3 væri væntanlegur fékk hann heldur betur hrakspárnar yfir sig og misserum saman var því stanslaust haldið fram að hann stefndi í hrikalegt gjaldþrot. 

En hann stóð það af sér í krafti þess að það hafði tekist að framleiða rafbíl með stórbættri hönnun sem millistéttin gat eignast og notað.   

Þannig varð þetta samt og það gerðist svo hratt á örfáum árum, að undrum sætti. 

Síðuhafi hefur verið hefur dyggur lesandi þýsku bílatímaritanna Auto Motor und Sport og Auto Zeitung í hálfa öld, og nánast í hverju blaði hefur verið ítarlegur samanburður á sambærilegum bílum hvað snerti stærð og verð frá Benz, BMW og Audi "eðal" framleiðendunum. 

Hefur yfirleitt verið hnífjafn og harður slagur á stigatöflunni. 

Síðan kom að því fyrir ári amerískur bíll bættist inn í hóp þess besta, sem Audi, BMEW og Benz höfðu upp á á bjóða í neðri miiliflokknum, Audi 4, BMW 3 og Benz C. 

Eins og venjulega varð stigaslagurinnn harður í keppni hinna þriggja fræknu, en ekki um fyrsta sætið heldur annað sætiö. 

Þannig fór þessi slagur samt. 

Í fyrsta sæti tróndi sá ameríski, Tesla 3. 

Fáheyrð úrslit hjá einu virtasta bílatímariti Evrópu. 

 

P.S. Í athugasemd afgreiðir "Vagn" úr launsátri nafnleyndar sinnar þennan pistil sem "sögufölsun" og minnir með því á fyrirrennara sína hér á síðunni, "Hilmar" og "Hábein" sem afgreiddu pistla þessarar síðu á sinni tíð sem "lygar og rangfærslur."  Myndin hér við hliðina var birt á sínum tíma þegar keppinautar Tesla 3 fóru í gegnum ítarlegan og viðamikinn samanburð og er því dæmi um þá miklu "sögufölsun" sem Vagn talar um.    

 

 

Tesla 3 mest seldi bíllinn 2020

Hvernig væri að nefna dæmi, sem styðja gífuryrðin gegn þjóðgörðum?

Gífuryrðum um þjóðgarða almennt linnir ekki um þessar mundir, þegar rætt er um að stækka Vatnajökulsþjóðgarð og læra af öðrum þjóðumm varðandi fyrirkomulag þjóðgarðamála. 

Erlendar þjóðir hafa allt að 140 ára reynslu af þjóðgörðum og í landi einkaframtaksins, Bandaríkjunum, hefur myndast ákveðin samræming á skilgreiningum fyrirkomulags þeirra mála undir kjörorðinu "For the benefit and joy of the people". 

En hér á landi, nú síðast í dag, er fullyrt að í þjóðgörðunum felist ofbeldisaðför að fólki og að þeir, sem vinna að þessum málum hér á landi hati fólk en elski valdníðslu og kúgun. 

Þótt komin séu tólf ár síðan Vatnajökulsþjóðgarður var stofnaður er fullyrt að með stækkun hans verði farið í herför gegn þjóðinni á vegum valdaþyrsta alræðisseggja í Reykjavík og útivistarfólk á borð við göngufólk, jeppamenn, hestamenn, bændur og almenning allan verði hrakið burt og úthýst af eigin landi; það verði "skellt í lás." 

Síðuhafi hóf fyrir 22 árum að kynna sér þessi mál að fara um og skoða 30 þjóðgarða í Kanada, Bandaríkjunum, Noregi, Svíþjóð, Finnlandi, Íslandi, Portúgal og Spáni auk skoðunar 18 virkjanasvæða í þessum löndum. 

Í Bandaríkjunum er hægt að kaupa sér aðgang að öllum þjóðgörðum innan vébanda Þjóðgarðastofnunar þess ríkis með aðgangskorti gegn afar hóflegu gjaldi, þar sem á stendur: "Proud Partner." 

Í þessum ferðum hefur verið rætt við hundruð fólks án þess að hægt hafi verið að merkja neitt annað en ánægju og stolt yfir því að fá að vera þátttakandi í starfrækslu þjóðgarðanna og varðveislu sameiginlegra náttúruverðmæta Bandaríkjamanna. 

Einkar ánægjulegt var að kynnast norsku þjóðgörðunum Jóstedalsjökulsþjóðgarði, Harðangursheiðarþjóðgarði og Rondane þjóðgarði, en þar má sjá mjög athyglisverðar hliðstæður við íslenskar aðstæður og ekki síður að kynnast áhugaverðum og almennum sjónarmið varðandi mat á aðstæðum og fyrirkomulagi og gildi þessara náttúruverðmæta. 

Hér á landi er hins vegar fjasað um "auðmýkingu og niðurlægingu" sem fólk verði fyrir í þjóðgörðum hér og erlendis og fimbulfambað um það hve mikið ofríkið sé og valdníðslan í erlendum þjóðgörðum. 

Hvernig væri að nefna eitthvert dæmi um eitthvað sem styðji þessi gífuryrði? 

Ákvörðun um verndun náttúrunnar

Öll viðleitni til að skapa betra mataræði er góðra gjalda verð.

Flest nútímafólk þarf einhvern tíma á ævinni að reyna að skipuleggja matarneyslu sína yfir daginn. Allur gangur er á slíku, sumir fást við þetta alla ævi en aðrir sleppa jafnvel alveg. 

Þarfirnar eru afar misjafnar. Sumir eru með þannig meltingu að það liggur við að fæðið þurfi að vera svo fljótandi og gott fyrir meltinguna að það nálgist að vera barnamatur. 

Aörir vilja gjarna að morgunverðurinn innihaldi svo mikla næringu að það gefi fljúgandi start inn í orkueyðslu dagsins. 

En þá kunna þeir að reka sig á hinn endann á viðfangsefninu, að því meira sem innbyrt er strax í upphafi dags, því meiri hætta er á að neyslan yfir sólarhringinn leiði af sér fituvandamál. 

Af þessum sökum ber að fagna hverri þeirri viðleitni sem gefur möguleika á að leysa fæðuviðfangsefnið á sem farsælastan hátt. 

Heinz kynnir nýjan morgunverð í skál

Ferðatakmarkanir sem sýna hvað þjóðir eru háðar hver annarri.

Tilkynning frá utanríkisráðuneytinu varðand harðar ferðatakmarkanir um landamæri Danmerkur og Bretlands sýnir vel hve háðar þjóðir eru hver annarri varðandi sóttvarnarmál og mati á á því hve alvarlegt ástand ríkir í hverju ríki fyrir sig. 

Frá fornu fari hafa ferðir Íslendinga til útlanda legið mest um Bretland og Danmörku og enda þótt það hafi breyst í áranna rás geta hömlur á ferðum okkar til þeirra haft slæm áhrif fyrir okkur, jafnvel þótt ástandið sé skárri hjá okkur í augnablkinu en hjá þeim. 

 

Þetta gildir einkum um þann gríðarlega mikilvæga atvinnuveg sem alþjóðlega ferðaþjónustan er og er algerlega háður aðstæðum í sóttvarnarmálum þegar farið er á milli landa. 

Þá geta komið upp aðstæður á landamærum, þar sem annað landið er með hið fínasta ástand, en hitt með stóralvarlegt ástand, og þar með sú staða þegar litið er víðar yfir sviðið, að þau lönd sem eru með lægsta samnefnarann í sóttvarnarmálum dregur flest eða öll önnur lönd niður. 

Þar að auki sýnir þetta þörfina á sem mestri varfærni á heimavelli, þvi að til lítils er að ástandið batni allt í kringum okkur ef við erum á sama tíma á leið inn í nýja bylgju og vandræði.  

Vekur athygli á nýjum ferðatakmörkunum

Höfum við tíma fyrir að fást við nýja bylgju?

Bardaginn við kórónaveiruna hefur verið og verður tímakapphlaup.  Ekki bara við að fá bólefni til að nota heldur ekki síður til að fá ráðrúm til að viðhalda því hægt skánandi ástandi sem hér hefur verið svo að hægt sé að sigla inn í sumar með nógu góðu ástandi til þess að hægt verði að fá atvinnuvegina í gang og vinna bug á atvinnuleysinu. 

Ef ný bylgja byrjar að rísa og klukkunni þar með snúið til baka er óvíst hvort það verði tími til þess að vinna fyrst buga á henni og síðan að bólusetja nógu duglega. 

Þegar litið er til ófremdarástandsins í flestum öðrum löndum eru við enn í ótrúlega góðri stöðu, og því má ekki rasa um ráð fram og taka of mikla áhættu of snemma. 

Helmingur íbúa lést úr Covid-19

Hentistefnan áfram á hæsta plani.

Bandaríkjaforseti þurfti rúmlega sólarhring til að fatta, að sú niðurstaða stanslausrar hvatningar hans vikum saman til þeirra, sem komu á útifund hans til þess "að verða þátttakendur í einhverjum stærsta viðburði í sögu Bandaríkjanna" yrði einmitt fólgin í því að þessi múgur gerði það sem honum var ætlað með hvatningarhrópum forseteans, að "stöðva stuldinn" þ.e. staðfestingu Bandaríkjaþings á niðurstöðum forsetakosninganna. 

Það var ekki hægt nema að taka öll völd í þinghúsinu, í hverja einasta herbergi. 

Forsetinnn brýndi fundarfólk til að marséra niður götuna að þinghúsinu og láta til sín taka í þinghúsinu. 

Öll heimsbyggðin horfði því á hreint valdarán, sem var fullkomnað þegar einn af áhlaupsmönnunum stillti sér upp beint fyrir framan myndavélarnar í lok valdarásins og hrópaði hátt og snjallt: "Við stöðvuðum þingið!" 

Nú segist forsetinn skyndilega hafa kallað þjóðvarðliðið strax út þótt fyrir liggi að það gerði hann einmitt ekki heldur tregðaðist við svo að aðrir urðu að grípa til örþrifaráða til að fá hjálp til að valdaráninu yrði aflétt. 

Núna fordæmir forsetinn þá sem hann mærði hvað mest í tvitterávarpi sínu þegar valdaránið hafði verið fullkomnað, staðið í þrjár klukkustundir og verið svo algert, að sæti og skrifstofur þingmanna voru hertekin. 

Svo ótrúlegt sem þetta er, ætti það þó varla að hafa komið á óvart. 

Frægt var á sínum tíma þegar hann harðneitaði að fara á fund helstu iðnríkja heims vegna þess að hann væri búinn að mæla sér mót á fundi með Angelu Merkel og Indlandsforseta. 

Starfsmenn Hvíta hússins reyndu hvað þeir gátu til þess að útskýra þessi orð forsetans, en um það leyti sem það hafði tekist, sást á myndum, að stóll hans var auður á fundi iðnríkjanna rétt hjá Merkel og Indlandsforsetanum, sem þar sátu! 

Við þessa uppákomu tók við enn vonlausari viðleitni starfsfólks forsetans að útskýra þessa sjón. 

Hentistefna forsetans, byggð á þvi sem hann sjálfur heldur henta honum best í það og það skiptið, birtist í eins konar ofskynjunum og algerum ranghugmyndum og nær nýjum hæðum með nýjasta útspili hans; fordæmingu á þeim sem hann var einmitt búinn að mæra mest.

En í ljósi langrar reynslu af slíku ætti hún ekki að koma neinum á óvart. Þetta var fólkið sem hann talaði beint til frá sjónvarpskappræðunum í haust um að vera tilbúið og til taks þegar kall hans kæmi. 

Þeir sem fylgdust með þessum atburðum í sjónvarpi um víða veröld minntust þess þegar æstur lýður hertók sendiráð Bandaríkjanna i Teheran 1979 og hélt sendiráðsfólkinu í gíslingu. 

Þá tók það ekki meira en sólarhring fyrir þáverandi forseta Bandaríkjanna né neinn annan að sjá hvað væri í gangi.    

Trump fordæmir árásina

Árásin á þinghúsið: Rökrétt framhald sem hefði ekki átt að koma á óvart.

Þegar skoðaðar eru ýmis ummæli af ferli Donalds Trumps hefði nánast ekkert átt að koma á óvart af því sem gerst hefur í dag og hefur raunar verið rakið áður hér á síðunni. 

Í fyrri skrifum sínum hefur hann fullyrt að í fjölda gjaldþrotamála hans á viðskiptaferlinum (og fleiri blasa við) hafi hann unnið frækinn sigur. Í öll skiptin frækinn sigur. 

Til eru ummæli hans frá ýmsum tímum að um hundruð mikilvægustu málaflokka mannkynsins sem hann hefur tilgreint viti hann meira en nokkur annar. Einnig margítrekað að hann sé mikilhæfasti forseti og ofurmenni í sögu Bandaríkjanna síðan Lincoln leið. 

Að gáfnapróf fyrr og síðar hafi hann staðist með vísitölu ofurgreindar. 

Alla tíð hefur hann stutt og ræktað tengsl sín við hin valdamiklu samtök byssueigenda sem vilja veg almennrar vopnaeignar sem mesta og hann hefur hvatt þá til þess að notfæra sér þá grein stjórnarskránnar sem veitir hverjum borgara rétt til að bera vopn. 

Margstagast á þessari lagagrein. 

Hann varði gerðir byssudýrkena og annarra þeirra samtaka sem hafa gengið mest fram gegn minnihlutahópum og notað tákn nasista og Ku Kux Klan og hann varði alla þessa hópa enn í sjónvarpskappræðum við Biden

Í þeim krafði stjórnandinn Biden og hann um skýr svör og Biden svaraði því skýrt til að hann fordæmdi hvers kyns ofbeldi sem beitt væri hjá deiluaðilinum.

En Trump kom sér hjá þessu og sneri sér beint í gegnum myndavélina til þessara hópa og sagði þessum herskáu stuðningsmönnum að bíða rólegir en tilbúnir þegar þörf krefði. 

Það gerðist í dag og nú hefur verið rakið orðrétt að á útifundi Trumps hvatti hann fundarmenn skýrt og skorinort til þess að fara í "göngu til bjargar Bandaríkjunum" inn í húsið og taka þar völdin til að koma í veg að þingið afgreiddi úrslit forsetakosninganna. 

Í framhaldinu lagði hann sitt af mörkum eins lengi og hann gat til þess að koma í veg fyrir að lögreglumenn fengju rönd við reist.  

Hann byrjaði strax í fyrrasumar að stagast á því að kosningarnar framundan yrðu stórkostlegustu svik og prettir í sögu bandarískrar stjórnmála sem hann og stuðningsmen hans myndu berjast gegn með kjafti og klóm, og enn í ávarpi sínu á Twitter í dag var það aðalatriðið í ávarpi hans, hve gott fólk það væri sem risi upp gegn þessu "tröllaukna svindli.

Engar sannanir hefa fengist fyrir þessum ásökunum í fjölda kærumála Trumps og hans manna, enda hefur framkvæmd kosninga í Bandaríkjunum verið með þróaðasta hætti, sem vestrænt lýðræði hefur yfir að ráða, grunnfyrirkomulagi, sem hefur verið grundvöllur lýðræðisins í meira en 150 ár. 

Mótmælafundurinn í dag var haldinn til þess að koma í veg fyrir það að lögformleg afgreiðsla Bandaríkjaþings á niðurstöðu kjörmanna gæti farið fram. 

Sjálfur lagði Trump hart að Mike Pence varaforseta, sem formlega átti að tilkynna um valdaskiptin 20. janúar, að taka sér í krafti stöðu sinnar gerræðisvald án nokkurrar heimildar í stjórnarskránni til þess að lýsa ógilda formlega afgreiðslu þingsins og breyta þannig lögformlegum valdaskiptum í áframhaldandi völd Trumps. Það hefði verið hreint valdarán.  

Trump atyrti Pence fyrir heigulskap þegar Pence neitaði að brjóta stjórnarskrána og hvatti fundarmenn á mótmælafundinum til dáða með því að ítreka að aldrei skyldi linna látum í baráttunni við þá "sem stálu kosningunum." 

Ef við höldum áfram með að rekja hugsanlegt rökrétt framhald þessarar árásar á þinghúsið mun henni ekki linna núna, heldur mun hún breiðast út og enda með því að valdi verði beitt með öllum ráðum, til þess að koma í veg fyrir valdaskiptin og inntökuathöfnina 20. janúar. 

 

P. S. Síðustu fréttir herma að innan ríkisstjórnarinnar hafi verið rætt um möguleika þess að nota ákvæði í stjórnarskránni til þess að Trump verði vikið frá vegna þess sem nú er komið fram.

Á sama tíma hefur hann hörfað lítillega með því að heita því að valdaskiptin geti farið friðsamlega fram. Samt heldur hann fast við ásakanir sínar og segir að hann muni hann aldrei láta af baráttu sinni gegn þeim "mesta þjófnaði í sögu Bandaríkjanna".

Einn af þeim blaðamönnum sem ítarlega hafa kannað feril Trumps frá upphafi, hefur bent á gegnumgangandi atriði í hegðun hans, sem felst í því að hann fer alltaf eins langt og hann geti mögulega komist upp með og helst lengra. Það kemur til dæmis fram í því að hann hefur verið einkar naskur á að finna út, hverjir geti mögulega staðið helst í vegi fyrir honum í framtíðinni og útskýrir til dæmis, af hverju hann hundelti Barack Obama árum saman til þess að svipta hann möguleikum á að gegna forsetaembættinu. Og einnig hvers vegna hann beitti forseta Úkraínu ótvíræðum hótunum í símtali fyrir tveimur árum til þess að bregða fæti fyrir Joe Biden, en á þeim tíma var Biden siður en svo líklegur til þess að verða forsetaframbjóðandi.  

 

„Þetta er komið á annað stig“

Eru "Æ Dí For" og "Æ Dí Þrí" aðlaðandi og óhjávæmileg heiti á bílum?

Í tengdri frétt á mbl.is eru nefnd tegundaheitin MG og Tesla, og fer ekki á milli mála við hvað er átt, einkum heitið Tesla. 

Það heiti er borið eins fram um allan heim og þetta leiðir hugann að því hvernig við Íslendingar berum fram erlend heiti og hugtök. 

Íslendingar hafa borið MG og BMW fram "Emm Gé" og "Bé Emm Vaff" í meira en hálfa öld og þessi heiti hafa bæði verið nógu aðlaðandi í eyrum Íslendinga til þess að þessir bílar seldust jafn vel og verðleikar þeirra hafa stuðlað að. 

En nú eru breyttir tímar. Í útvarpi hljóma auglýsingar fyrir hinn nýja rafbíl Wolkswagen ID.3 þar sem heitið er borið fram "Vólgsvagen Æ Dí Þrí". 

Ef þessu verður ekki breytt er næsta skref að dynja yfir strax á næstu vikum, þegar Volkswagen ID.4 verður kynntur og seldur hér á landi. 

Þar með getur augljóslega stefnt í að aðförinni gegn þýskum framburði á heitum þýskra Volkswagen bíla ljúki með endanlegum sigri enskunnar, sem virðist vera á leið með að verða að aðal tungumáli Íslendinga sem allt verði að vikja fyrir. 

Nú þegar er hinn opinberi framburður á Íslandi á þýska orðinu Volkswagen að verða niðurnegldur í símsvörum umboðsins, þar sem ævinlega er sagt "Vólgsvagen" sem er algengur framburður hjá enskumælandi þjóðum sem segja Munich í staðinn fyrir Munchen, Cologne í staðinn fyrir Köln og Turin í staðinn fyrir Torino. 

Erfitt er að finna aðrar skýringar á þessari ásókn enskunnar en þá að auglýsingastofur og aðrir áhrifavaldar séu svo óskaplega snobbaðir fyrir enskri tungu, að framburður enskumælandi þjóða eigi að hafa algeran forgang fram yfir allar aðrar þjóðtungur. 

Og hér heima var nafn hins fyrrum mikla kappakstursmanns Mikaels Schumachers síðast þegar það var nefnt í sjónvarpi hér á landi borið fram "Mækael Schumacher." 

Síðuhafi átti stutt samtal við sölumann umboðsins í dag til þess að fræðast um hvernig dagskipun auglýsingarinnar ætti að hljóma í munni landsmanna, og frétti af því að fleiri hefðu hringt til að spyrja. 

Augljóslega af eðlilegum ástæðum. Fólk verður jú að vita til hvers er ætlast af því til að það beri þýsk og önnur heiti á erlendum tungum fram hér á landi samkvæmt kröfum enskunnar. 

Þetta verðum við, sauðsvartur almúginn að fá að vita, því að hjá umboðsmönnum BMW sem eru með BMW i3 til sölu, er framburður allra "Bé Emm Vaff i Þrír" en ekki "Bí Emm Dobbeljú Æ Þrí", og borgin með aðalstöðvum BMW heitir Munchen en ekki Munich. 

MG og Tesla þeir einu sem juku sölu