Strik í eldsneytisreikninginn. Undirliggjandi orsök margs.

Eldsneytisverð er geysilega snar þáttur í flugi og hefur haft æ meiri áhrif síðustu árin.

Til þess að vera samkeppnisfær verða allir aðilar ao spila lúmskan áhættuleik. 

Það sést þegar skoðaðar eru undirliggjandi ástæður áfalla af ýmsum toga. 

1997 stóð Boeing á hátindi velgengni, sem hafði áunnist með því að komast hjá áföllum af völdum bilana með því að hafa alltaf sett öryggið ofar hagnaði. 

Eitt atriði þess var, að á meðan keppinautar höfðu lent í áföllum, eins og Douglas DC-10 áföllunum, hafði Boing getað staðið við sitt, til dæmis loforð um afhendingu nýrra véla. 

Að standa við slík loforð hefur mikil áhrif á traust framleiðandans. 

Í fróðlegum þætti Aljazzera sjónvarpsstöðvarinnar hafa verið birt gögn, sem benda til þess að árið 1997 eftir samruna Boeing og McDonnel Douglas hafi orðið áherslubreyting með því að bjóða framleiðsluna meira út og leyfa undir sérstökum kringumstæðum að láta hraðann í sðlunni að hafa forgang fram yfir ítrasta öryggi. 

Í þættinum voru leiddar líkur að því að þriggja ára töf á afhendingu Boeing 787 Dreamliner hafi verið partur af því að taka of bjartsýnislega áhættu af þessari pressu. 

Og nú virðast svipuð vandræði vera komin varðandi 737 Max vélarnar. 

Mjóþoturnar hafa þann kost fram yfir breiðþotur, að með þeim fæst ítrasta sparneytni með nýjum hreyflum sem henta þeim vel. Aðeins einn gangvegur er í þeim fyrir sex sæta sætaraðir, í stað tveggja gangvega fyrir sætaraðir, sem taka fleiri en sex farþega. 

Boeing stóð frammi fyrir því að þurfa að endurhanna stélið á Max vélunum til þess stýrisfletirnir á því að það réðu við alveg nýja þyngdardreifingu og flugeiginleika. 

Miðhluti bæði flugvéla og bíla eru dýrustu hlutar þessara tækja og því var ekki inni í myndinni að endurhanna miðhlutann allan á 737 til þess að koma fyrir hjólabúnaði með lengri hjólaleggjum, sem hefðu þurft aukið rými þegar hjól eru tekin upp og sett niður. 

Nógu dýrar voru samt endurbætur sem gera varð á vængjunum til að ráða við stærri, kraftmeiri og plássfrekari hreyfla og breytta þyngdar- og afldreifingu vegna þeirra. 

Þess vegna varð nýtt tölvustýrt stýrikerfi hannað, sem hefur valdið vandræðum. 

Það er stórmál í hinni gríðarlegu hörðu samkeppni ef mörg hundruð vélar, sem áttu einmitt að mala gull í sparneytni, eru nú kyrrsettar. 

Vélarnar, sem leysa þær af, eru dýrari í rekstri og eyðslufrekari og setja því slæmt strik í reikninginn. 

Loftflæði- og þyngdar- og afldreifningar vandamál geta vafist fyrir reyndustu flugvélaframleiðendum, jafnvel framleiðendum lítilla flugvéla. 

Sem dæmi má nefna Cessna 162 Skycatcher tveggja sæta vélina sem átti að leiða stór framför í kennsluflugi og koma í stað gömlu 152 kennsluvélanna.  

Vélin átti að falla inn i svonefndan LSA fisflugvélaflokk, en þúsundir véla í þeim flokki hafa verið framleiddar í heiminum. 

Eftir endurtekin slys, óhöpp og vandræði í reynsluflugi á 162 og sölu á aðeins nokkur hundruð stykkjum, gafst þessi framleiðandi vinsælustu og öruggustu smáflugvéla og kennsluflugvéla sögunnar upp og hætti við framleiðsluna á þessari vél. 

Taka 757-200 á leigu og fella niður flug

"Hvernig væri að líta á landakortið?"

Þessarar spurningar spurði kanadískur sérfræðingur í stórmerkilegu viðtali við Boga Ágústsson sem fór fram hjá samanlögðum fjölmiðlunum, þegar hann var spurður álits á stórskipahöfn í Finnafirði. 

Og þegar litið er á landakortið sést að siglingaleið frá austurströnd Bandaríkjanna til Japans liggur annars vegar um norðvesturleiðina vestan við Grændland og hins vegar meðfram strönd Noregs. 

Siglingaleið frá Evrópu til Japans og Austur-Asíu liggur annars vegar fyrir vestan Grænland, þannig að tekinn yrði stór krókur með því að fara norður til öfugs landshorns á Íslandi og síðan suður fyrir suðurodda Grænlands.

Hin leiðin liggur einfaldlega með strönd norðvestur Evrópu og yrði stór krókur að fara um Ísland. 

Kanadíski viðmælandinn benti á, að engin stórskipahöfn getur þrifist án rándýrra og viðamikilla innviða og þjónustu, upp á hundruð og jafnvel þúsundir milljarða sem skorti gersamlega í Finnafirði.

Allsherjar þjónusta vegna stórskipasiglinga kostaði meðal annars uppbyggingu í skipaviðgerðum og aðgang að umfangsmikilli þjónustu í tengslum við nútíma tæknivæðingu auk góðra samgangna á landi og í lofti. 

Meira að segja væri jafnvel Akureyri hvergi nærri með nægilegt umfang innviða og þjónustu, og eina svæðið sem kæmi til greina á Íslandi væri á suðvesturhorninu, ef ætlunin væri að lokka stórskipasiglingar út úr augljósum siglingaleiðum. 

Og í framhaldi af því má spyrja hvort verkefnin í samgöngum hér á landi séu ekki ærin nú þegar vegna núverandi samgöngumannvirkja. 

 

 

Félag stofnað um Finnafjarðarhöfn

Einstakt "haltu mér - slepptu mér" ástand.

Fáir hefðu getað spáð því fyrir þegar Bretar ákváðu í þjóðaratkvæðagreiðslu að ganga úr ESB, hvaða atburðarás væri að fafa í gang og ekki sér enn fyrir endann á. 

Því að niðurstaðan hefur í raun orðið einstakt "haltu mér - slepptu mér" ástand sem sífellt teygist á og viðheldur veru Breta í ESB. 

Um tíma trufluðu kosningar til Evrópuþingsins málið, en nú virðist það hefur það teygst fram yfir þá truflun þannig að Bretar sitja áfram í raun inni í ESB með því sem slíku fylgir. 

May samþykkir sex mánaða frest

Heimsklassa tilþrifum Arons Pálmarssonar sturtað niður.

Aron Pálmarsson skoraði 12 mörk, flest hver af hreinni snilld, og átti 8 stoðsendingar, flestar í sama klassa í leiknum við Norður-Makedóníumenn í kvöld. Hvílík unun að horfa á þessa  heimsklassaframmistöðu. 

Önnur skoruð mörk íslenska liðins voru 13 og á venjulegu kvöldi hefðu 33 skoruð mörk átt að nægja til sigurs auk þess sem að íslenski markvörðurinn varði vítakast á síðustu sekúndunum.

Það er ekki hægt að sjá eftir að hafa horft á þetta í kvöld og njóta þess, en, - 

en, -  

þess sárara var það, að þessu var öllu sturtað niður í klósettið með ömurlega grátlegu tapi, sem þar að auki var fyrsta tapið hjá landsliðinu í svona móti á heimavelli í 13 ár.

Því miður verða þær ófarir auk síðustu mínútu leiksins það sem á eftir að verða munað úr þessum leik.   

Dramatískt tap á síðustu sekúndu

Mergurinn málsins, sem þáttastjórnandi var ávíttur fyrir að nefna.

Mikil og réttmæt umræða hefur farið fram um álitið sem Friðrik Árni Friðriksson Hirst og Stefán Már Stefánsson gáfu stjórnvöldum vegna innleiðingar 3. orkupakkans. 

Þar kemur fram að Íslendingar létu hjá líða í maí 2017 á fundi sameiginlegu EES nefndarinnar að fara þá leið, sem hefði haft stjórnskipulegt gildi, að setja sérstöðu Íslands inn í texta innleiðingarinnar. 

Í staðinn sé nú farin hæpnari leið vegna þess að yfirlýsingar og fyrirvarar nú hafi ekki stjórnskipulegt gildi.  Sem sagt: Tekin áhætta á svipaðri niðurstöðu og orðið hefur í því að okkur sé skylt að flytja inn hrátt kjöt af dýrum, sem hafa orðið fyrir áhrifum af fjölónæmisbakteríum.  

Í bloggpistli í gær var fjallað um þau ómálefnalegu viðbrögð utanríkisráðherra í Kastljósi við því að þáttarstjórnandinn nefndi leiðina, sem ekki var farin, að ráðherrann dylgjaði um það að þáttarstjórnandinn hefði ekki lesið gögn málsins. 

Í tengdu viðtali við Friðrik Árna á mbl.is skýrir hann málið nánar og þá sést ástæðan fyrir því að reynt er að leyna því sem Friðrik Árni ræðir um. 

Felur í sér lagalega óvissu

Tækifæri til hindanalítils flæðis rann úr greipum í maí 1968.

Fram að svonefndum H-degi í maí 1968, þegar skipt var úr vinstri umferð í hægri umferð, var umferðin um þann hluta Reykavíkur sem afmarkast af Lækjartorgi, Laugavegi og Hverfisgötu, í góðu flæði í vinstri umferðinni. 

Hún lá sólarsinnis frá Hlemmi niður Laugaveg, í hægri beygju um Lækjartorg, upp Hverfisgötu og í hægri beygju til suðurs austan við Hlemm, eða Vatnsþróna eins og staðurinn var oft kallaður þá. 

Þegar skipt var í hægri umferð, hefði verið eðlilegast að snúa umferðinni við og fara niður Hverfisgötu, í vinstri beygju við Lækjartorg, upp Laugaveg og í vinstri beygju yfir á Hverfisgötu við Vatnsþróna. 

Hinum eðlilegu og hindranalitlu beygjum um þennan hring hefði verið við haldið.

En það voru of miklir áætlaðir hagsmunir kaupmanna og rótgróin íhaldssemi, sem komu í veg fyrir þetta. 

Kaupmenn við Laugaveg óttuðust að missa frá sér viðskiptavini til vaxandi verslunar við Hverfisgötu. 

En með því að skipta ekki um akstursstefnur og hafa hindranalítið hringflæði í hægri handar umferð með vinstri beygjum um þennan hluta borgarinnar, varð til sú flækja á götunum kringum Hlemm sem enn er við lýði. 

1968 sást mönnum líka yfir það, að Hverfisgatan var nýrri gata en Laugavegur og bauð upp á tvöfalda umferð, sem ekki var sett á fyrr en nokkrum áratugum seinna þegar menn áttuðu sig á þeim möguleika. 

Nú er að vísu að komast í framkvæmd meiri gangandi umferð en áður var, með tilheyrandi truflunum á flæði bíla, svo að slíkt flæði verður þá hvort eð er aldrei á þessu svæði. 

Umferð beint upp Laugaveg í sumar

Mistök, vanræksla og falið fúsk áratugum saman?

Hér á síðunni hefur áður verið fjallað um það tuga ef ekki hundraða milljarða tjón sem hefur viðgengist á húsakosti landsmanna vegna mistaka, vanrækslu og falins fúsks áratugum saman. 

Rannsóknir í þessum afnum og eftirliti hefur verið stórlega ábótavant, og fúskið falið og þagað yfir því. 

Síðuhafi hefur fengið upplýsingar í málinu frá aðilum, sem hafa sérþekkingu á því og byggt skrif um það á þeim. 

Það er því vel að Álfheiður Ingadóttir, skelegg stjórnmálakona komim nú til skjalanna til að setja á stofn ítarlega rannsókn á því hvernig á þessum óförum standi og fletti ofan af því sem hefur viðgengist.  

Vill rannsóknarnefnd vegna myglu

Hinn daglegi biti sem ræður úrslitum?

Leynitrixin, sem getið er um í tengdri frétt sem ráð við ofþyngd, felast meðal annars í því að forðast að hafa sæta og orkumikla bita eða gómsætt viðbit sjáanlegt eða handhægt. 

Nú er það svo, að þegar maður bætir á sig einum smábita eða einu glasi eða smáflösku, lítur það eitt og sér ekki út fyrir að geta haft afgerandi áhrif á holdafarið. 

En þá verður að líta til þess, að í langflestum tilfellum er aðeins um að ræða fá grömm að meðaltali á dag, sem fólk þyngist. 

Og þetta er svo lúmskt þegar það gerist hægt og bítandi. 

Aðeins fimm gramma þynging á dag gera næstum tvö kíló á ári eða 20 kíló á áratug og 50 kílóa þyngingu á 25 árum. 

Þegar bitinn góði eða glasið góða blasa við, getur verið gagnlegt að hugsa sem svo: Það verður einmitt þessi biti, eða þetta glas sem á eftir að ráða úrslitum um það hvort ég þyngist í dag eða þyngist ekki. 

Svipað leynitrix er að hafa vigt ævinlega sjáanlega, vigta sig tvisvar á dag, gera glímuna við aukakílóin líka samfelldu langhlaupi og miða við þyngdina þegar vaknað er á morgnana. 

Siðuhafi var orðinn 97 kíló fyrir tæpum sex mánuðum, og enda þótt þessi þyngd teldist samkvæmt alþjóðlegri formúlu þar um, vera nákvæmlega á mörkum ofþyngdar, en ekki ofþyngd, var tilhugsunin um það að vera í raun að rogast með tíu aukakíló allan daginn, eða sem svarar fimm tveggja lítra flöskur upp stiga, orðin óþægileg. 

Því var hafið átak fyrsta vetrardag í haust, sem miðaði að því að ná 10 kílóa léttingu á einu ári. 

En þetta getur verið meira en að segja það, þrátt fyrir vigtina og smámunasemina varðandi bitana og glösin. 

Axlarbrot í ársbyrjun truflaði, því að því fylgdu miklar legur og rýrnun vöðva, sem eru eðliþyngri en fitan. 

Aftur var hægt að auka hreyfingar þegar kom fram í febrúar og æfingar fyrir aukið afl, snerpu og þol, en þá truflaði aukinn vöðvamassi mælingarnar í hina áttina. 

20 mars var fimm mánaða afmæli léttingarinnar, þyngdin komin niður í 88 kíló og hlaupatíminn frá 1. hæð upp á 5. hæð með mælingu skeiðklukku kominn að nýju niður í 30 sekúndur.

En þá fór vöðvaþyngingin samfara slökun á aðhaldi að segja til sín, og nú er þyngdin komin upp í 90 kíló. 

Þessi ferill jafngildir tveggja mánaða töf á léttingunni og má ekki við svo búið standa. 

Þrjú leynitrix sem hjálpa þér að léttast

Meira en 50 ára draugur vakinn upp?

Fyrsta árið sem sjónvarpið starfaði hér á landi kom það fyrir að einstakir ráðherrar eða þingmenn vildu ráða því hvaða spurningar fréttamenn og þáttastjórnendur legðu fyrir þá og hvernig þær væru orðaðar. 

Þessum mönnum var kurteislega bent á að í erlendu sjónvarpi kæmi slíkt ekki til greina. 

Í gær var eins og gamall draugur væri vakinn upp í þessu efni þegar utanríkisráðherra skammaði þáttarstjórnanda Kastljóss fyrir spurningu sem hann spurði og bætti réðharrann um betur með því að ávíta þáttarstjornandann lika fyrir það að hafa ekki lesið gögnin sem umræðuþátturinn byggðist á.

Rétt eins og að ráðherrann hefði vaktað fréttamanninn og horft yfir öxlina á honum undanfarna daga. 

Þessi ásökun byggðist á hreinum dylgjum um störf þáttarstjórnandans af því tagi, sem engin leið er að afsanna og eru því ekki drengilegar. 

Þáttarstjórnandinn hélt ró sinni, enda tími þáttarins á þrotum.

Fyrr um daginn hafði ráðherrann fundið að því í umræðum á Alþingi að Sigmundur Davíð Gunnlaugsson hefði ekki sömu forgangsröð í storfum sínum fyrir Alþingi og ráðherrann sjálfur. 

SDG hefði valið á ámælisverðan hátt að fara ferð á vegum þingsins til Katar í stað þess að vera viðstaddur upphaf umræðu á þingi um þriðja orkupakkann eins og ráðherrann hefði valið.  

Hér er þó sá munur á að utanríkisráðherrann er eðli málsins samkvæmt beinn aðili að málinu í meðförum þingsins, starfs síns vegna. 

 

 

 

 

Tókust á um fjarveru Sigmundar

Tvisvar verður gamall maður barn?

Máltækið a´tarna er miskunnarlaust, en sú framkoma er líka miskunnarlaus og óvægin gagnvart öldruðum og öryrkjum, sem birtist í því að enda þótt nú sé í áratug búið að ræða um að láta linna þeirri atlögu að kjörum þessara þjóðfélaghópa sem falist hefur í eignaupptöku og stuldi á lífeyri hans, bólar ekkert á efndum eða úrbótum. 

Þótt aldraðir verið sífellt stærri hluti af þjóðinni, er erfitt að finna aðra skýringu á því ofríki, sem þeir eru beittir, að meirihlutinn meini ekkert með því að ræða um þetta óréttlæti, heldur láti sitja við orðin tóm. 

Nú stendur yfir önnur tilfærslan af tveimur á þessum áratug, þar sem um 80 milljarðar eru færðir til í hvort sinn, án þess að gamla fólkið sé virt viðlits. 

Þótt líklega sé lítil von til þess að embætti sérstaks hagsmunafulltrúa aldraðra í stíl við fullrúa barna breyti miklu, felst þó alltaf einhver von í slíkri viðurkenningu á því, að börn og gamalt fólk eigi rétt á að eiga sérstakan málsvara. 

 

Vilja hagsmunafulltrúa aldraðra