Víðir víkkar út hugsunina á bak við 2ja metra bannhelgi: "Frelsi frá ótta við smit."

Víðir Reynisson víkkaði í dag út hugsun sína á bak við fyrri orð um 2ja metra bannhelgi. 

Hann rökstuddi þann möguleika, að þegar þessi afdráttarlausa regla verði vonandi aflögð, sitji eftir frelsi fólks, til að áskilja sér þessa reglu hvað varðar fólk, sem nálgast það. 

Þetta er hliðstætt því, sem var á bak við reykingabann á opinberum stöðum og innandyra eftir að sannað var, að óbeinar reykingar gætu haft sömu áhrif á bindindisfólk eins og beinar reykingar hefðu á reykingafólk.  

Reykingabannið var skilgreint sem hluti af frelsi bindindisfólksins til að fá að anda að sér hreinu lofti í stað þess að vera háð því að vera í reyklofti reykingafólks. 

Í fjórfrelsi Roosevelts Bandaríkjaforseta, sem hann setti fram í frægri ræðu í bandaríska þinginu 6. janúar 1942, eftir að Bandaríkjamenn fóru í stríð við Japani 1941, voru tvær af fjórum tegundum frelsis með upphafsorðin "frelsi frá..." en hin fyrstu tvö með upphafsorðunum "frelsi til..." 

Frelsin fjögur voru:  

1. Frelsi til skoðana, máls og tjáningar. 

2. Frelsi til trúar og tilbeiðslu.

3. Frelsi frá skorti. 

4. Frelsi frá ótta. 

 

2ja metra bannið getur fallið undir síðarstnefnda frelsið, því að það má skilgreina sem "frelsi frá smiti" en einnig sem "frelsi frá ótta við smit." 

Everton í áfalli

Það, sem allt snýst um: Tveir metrarnir og sprittunin.

Tveggja metra "mannhelgin" eins og Víðir kallaði hana svo réttilega, samanber orðið landhelgi, er nokkurn veginn, ásamt sprittuninni meginatriði alls þjóðlífsins um þessar mundir. 

Það eru þessir lífsnauðsynlegu tveir metrar sem hafa stöðvað hálft atvinnulífið og skapað djúpa kreppu, en voru óhjákvæmileg regla, eins og óvæntar hópsýkingar hafa bent til auk þess árangurs að koma í veg fyrir hrun heilbrigðiskerfisins og mikið mannfall. 

Á myndum af útilífinu á hinum góða degi í gær mátti sjá, að eftirsóknarlegt frelsi í blíðviðrinu skóp margfalt brot á tveggja metra reglunni þar sem samt hefði verið átt að vera tiltölulega auðvelt með góðum vilja, að fara eftir henni. 

Þetta var slæmt að því leyti, að það er hastarlegt fyrir burðarfyrirtæki á borð við Icelandair, svo að nærtækt dæmi sé tekið, að ekki sé talað um ferðaþjónustuna eins og hún leggur sig; áður með veltu upp á hundruð milljarða og störf í tugþúsundatali; -  að þurfa að sæta afleiðingum hinnar hörðu tveggja metra reglu á sama tíma og sjá má í sjónvarpi fjöldabrot á henni við aðstæður, sem ekki þurfa að koma í veg fyrir að hún sé virt. 

Fram að þessu hefur þjóðin í meginatriðum sýnt samvinnu og samstöðu, og þrátt fyrir vangaveltur um tilslakanir framundan, er mikilsvert að viðhalda sem mestri einingu um það sem gert er. 

„Óþarfi að kóróna það með svona aðgerðum“

Fallegur dagur kaflaskila. Jökullinn blandar sér í málið.

Fallegur dagur er liðinn.

Í gær lét Snæfellsjökull, sem á góðum degi vekur mann þegar litið er út úm gluggann, og svæfir mann þegar lagst er til hvílu á kvöldin, ekki sjá sig.

Leyfði fallegu sólarlagi að líða hjá.

En, ekki var Þórólfur Guðnason fyrr búinn að lýsa yfir kaflaskilum í dag, en jökullinn kom í gegn í mistrinu og tók þátt í sólarlaginu á fullum dampi eins og þessar myndir frá því um tíuleytið í kvöld sýna vel. 

Myndirnar verða sýndar í réttri tímaröð, teknar á meðan sólin settist. 

Þess má geta að jökullinn er nokkur hundruð metrum hærri en hann sýnist vera, séð frá Reykjavík á 120 kílómetra færi í loftlínu. 

Ástæðan er lag hnattarins, sem við lifum á, og myndar bungu á Faxaflóanum, sem skyggir á neðsta hluta jökulsins, jafnvel þótt staðið sé í um 70 metra hæð yfir sjó, eins og gert er, þaðan sem myndirnar eru teknar. 

Þetta fyrirbæri, að jökullinn sjáist allur í jafn mikilli fjarlægð uppi á Esju, er óræk sönnun á því að jörðin er hnöttótt en ekki slétt. 

En það var óhugsandi fyrir fólk fyrir aðeins nokkrum öldum að ímynda sér annað en að jörð og sjór væru flöt. 

Þess má geta að myndirnar eru tekna á myndavél, sem er svo lítil, að hægt er að fela hana í lófa sér, samt með 30 földu optical súmmi og hd upplausn. 

Og kostaði samt ekki nema um 50 þúsund krónur. 

Nú er hægt að fá jafn litlar myndavélar með 40 földu súmmi, 4K upplausn og kíki (wiewfinder), sem er alger forsenda fyrir því að geta tekið góðar myndir við erfið birtuskilyrði. 

En sú er auðvitað tvöfalt dýrari. 

Einum kafla í stríðinu er lokið

Að mæta móðum göngumanni á hægri göngu í eins metra fjarlægð? Nei, er það?

Það er úðinn úr munni fólks, sem ber smit á milli þess. Tveggja metra mannhelgin er miðuð við kyrrstöðu tveggja persóna andstæðis hvort öðru með eðlilega kyrrstöðuútöndun. 

En úðinn getur borist á ýmsa vegu. Fjarlægð getur oft verið minni þegar fólk mætist á göngu og  þá getur fjarlægðin á milli þess verið mannhelgisbrot, þótt það sé bara augnablik, sem úðarnir frá því mætast. 

Ef hliðarvindur er á gönguleið, berst úðinn aðeins með vindinum aðra leiðina á milli þeirra en ekki hina. 

Síðan fer það sjálfsagt eftir magni úðalofts, hve mikil smithættan er. Líklega er smithættan meiri ef móður göngumaður gengur rólega framhjá öðrum, heldur en ef hlaupari hleypur hratt fram hjá. 

Og í þröngum gangi getur kannski skort á möguleika til að minnka fjarlægðarmuninn. 

Þá er það bara eftir að halda niðri í sér andanum á meðan fjarlægðin er of lítil.  

Kvartanahrina vegna hlaupara

Forsendubresturinn frægi.

"Fors majeure" hugtakið ætti að vera Íslendingum hugleikið í landi, þar sem óviðráðanleg og óblíð náttúruöfl af ýmsu tagi geta sett heldur betur strik í reikninginn. 

Oft er um að ræða erfið matsatriði og má sem dæmi nefna það þegar hryðjuverk í flugstöðinni á Brusselflugvelli olli því að völlurinn var lokaður í tíu daga og ekkert hægt að nota hann til flugs. 

Í þrefi við flugfélagið urðum við hjónin innlyksa í Brussel í viku, og fenguð þó þá úrlausn að mega nota farmiðann í flugi heim frá einhverjum öðrum flugvelli í Evrópu, sem flugfélagið flaug til. 

En því var harðneitað að greiða ferðakostnað frá Brussel til þess flugvallar, og því síður að greiða gisti- og matar kostnað þessa daga í Brussel og á leiðinni þaðan til Amsterdam. 

Frekar en að fara út í málaferli til að fá þessu mati flugfélagsins hnekkt varð að una þessum málalokum, sem byggðust á þeirri skoðun flugfélagsins að um "fors majeure" hefði verið að ræða hjá því, sem það gæti ekki borið ábyrgð á. 

Á þessum árum var þrefað um svonefndan "forsendubrest" hér heima varðandi það fólk, sem hafði tekið lán vegna húsnæðiskaupa í aðdraganda Hrunsins og tapað stórum fjárhæðum af völdum þess. 

Niðurstaðan voru aðgerðir byggðar á "forsendubresti" sem námu samtala um 80 milljarða króna tilfærslu fjár. 

Þegar leigjendur húsnæðis báru fyrir sig forsendubresti, sem hefði valdið þeim stórtjóni í hækkun húsaleigu af völdum Hrunsins var þeirri ósk hins vegar hafnað. 

Og við það sat.  

Hóteleigendur kanna vígstöðuna

Sólarmyndir til uppörvunar fyrir Sólir. Gleðilegt sólarsumar!

Það er margföld ástæða til þess að birta tvær myndir af sólarlagi kvöldsins. 

Ekki aðeins til uppörvunar og hvatningar fyrir alla þá, sem nú hafa lent í svörtu éli kórónaveirunnar, heldur líka vegna fegurðar sólarinnar og sólarlagsins. 

Það kom á táknrænum tíma, vegna þess að á þessum öðrum sumardegi og fyrsta virka sumardegi ársins 2020, var einstaklega fallegt sólarlag í kvöld, og einnig vegna nafnsins á jógastöðinni góðu, sem nú berst gegn illviðri veirunnar. 

Á neðri myndinni sést, hvernig sólarlagið lýsti upp blokkirnar við Sóleyjarríma í Grafarvogshverfi í kvöld, en núna eru það ekki síst heimili landsmanna, sem þurfa á geislum og birtu að halda. 

Gleðilegt sólarsumar! 

Jógastöðin Sólir berst fyrir lífi sínu

Alræðisríkið sýndi klærnar.

Í alræðisríki er ýmislegt mögulegt, sem ekki gengur upp í góðu lýðræðisríki. Það kom glögglega í ljós í Kína við upphaf farsóttar þar og hefur komið enn betur í ljós í Norður-Kóreu. 

Li Zehua hlaut heimsfrægð fyrir að streyma myndum í gegnum farsíma sinn af niðurbrotnu kerfi, sem birtist í röðum af sjúkrabílum, líkbílum, grímuklæddu örvæntingarfullu heilbrigðisstarfsfólki og öðru því sem fylgir drepsótt af skæðustu gerð, þar sem allt hefur farið úr böndunum. 

Á samfélagsmiðlum hafa sumir haldið því stíft fram að alþjóðavæðing og alþjóða samvinna hafi átt sök á COVID-19 faraldrinum. 

Í því sambandi má benda á að frjáls og almenn notkkun snjallsíma og annarra byltingarkenndra samskipta- og fjarskiptatækja á borð við netið er hluti af þeirri alþjóðavæðingu sem einkennir okkar tíma.  

Það var sú alþjóðavæðing sem varð til þess, að Kínverjar neyddust til að snúa við blaðinu í þessu máli málanna um þessar mundir. 

 

„Týndur“ kínverskur blaðamaður birtist á nýjan leik

Stóra-bóla fylgdi Íslendingum alla 18. öldina.

Stóra-Bóla, sem geysaði á árunum 1707-1709, drap næstum þriðjung þjóðarinnar. Heimildir um þetta eru góðar, vegna þess að afar vandað manntal var tekið fjórum árum fyrr og eftir það búa Íslendingar að betri heimildum og til lengri tíma um þjóðina og samsetningu hennar en nokkur önnur þjóð. 

Í jafn harðbýlu landi og Íslandi tók langan tíma að jafna sig eftir slíkt áfall, enda var loftslagið í landinu hluti af löngu kólnunartímabili.  

Þegar leið á öldina sáu menn í danska stjórnkerfinu undir stjórn konunga, sem töldust vera í hópi menntaðra einvalda, velviljaðir Íslendingum, að eitthvað mikið var að í landinu. 

Mannfjöldinn hafði verið um 50 þúsund við aldamótin 1700 og komast ekki upp fyrir þá tölu fyrr en 1830!

Á 18. öldinni fjölgaði Norðmönnum mikið á meðan mannfjöldinn á Íslandi hélt áfram að hanga á horriminni, um eða neðan við 50 þúsundin.  

Upp úr miðri öld á tímum Skúla landfógeta voru hafðar uppi máttlitlar tilraunir til að gróðursetja vaxtarsprota í formi Innréttinganna í Reykjavík og gerð fyrstu steinhúsanna. 

Og á stuttum valdatíma Sruense í konungstíð Kristjáns 7, sem taldist í hópi svonefndra menntaðra einvalda, var sett á fót svonefnd Landsnefnd undir forystu Norðmanns, til þess að kynna sér ástandið á Íslandi og setja fram tillögur til úrbóta á grundvelli tíu atriða í skipunarbréfi. 

Íslendingum sjálfum var gefinn kostur á að koma fram með tillögur frá einstaklingum, en nánast engar breytingar urðu þegar búið var að taka Struense af lífi og snúa til baka. 

Þegar síðan Móðuharðindin dundu yfir hafði Íslendingum ekkert fjölgað í 80 ár og voru eins illa undir þau ósköp búnir og hugsast gat. 

Þessar staðreyndir frá 18. öldinni, sem er lang ömurlegasta öld Íslandssögunnar, eru að vísu ekki vitund sambærileg við okkar tíma hvað snertir efnahagsleg kjör, en sýna þó vissa samsvörun í því, að faraldurinn nú getur átt eftir að fylgja okkur í lengri tíma en við höfum haldið.    

„Faraldurinn mun fylgja okkur í langan tíma“

Mótsögnum hrúgað upp í herferð gegn samvinnu þjóðanna.

Í dag hefur mátt sjá menn fara mikinn í fjölmiðlum varðandi það, að allt illt í veröldinni, líka kórónuveikifaraldurinn, sé alþjóðavæðingunni og alþjóðasamvinnu að kenna. 

WHO og öðrum alþjóðastofnunum er lýst sem alræðisstofnunum sem fari fram með ofbeldi gegn ríkjum og þjóðum. 

Þarna er alhæft úr hófu fram og raunar farið með rangt mál varðandi WHO, sem hefur ekkert vald til þess að taka völdin af ríkisstjórnum í löndum heims. 

Raunar hefur þvert á móti verið kvartað yfir því að WHO hafi ekki aðhafst sem skyldi gagnvart Kína. 

Mótasögnum er hrúgað upp í þessu efni í herferðinni sem er og hefur verið í gangi gegn samvinnu þjóða og þeirri sýn, sem John F. Kennedy lýsti nokkrum mánuðum fyrir dauða sinn með setningunni: "Við lifum öll á sömu plánetunni, öndum að okkur sama andrúmsloftinu, er annt um afkomendur okkar og erum öll dauðleg."  

Trump vill bíða örlítið lengur

Yfirburðastaða Norðmanna.

Ekki þarf annað en að líta snöggt á íbúatölur þeirra þriggja landa, sem eru í EFTA og eiga aðild að EES ti að sjá, hvílíka yfirburðastöðu Norðmenn hafa þar á bæ. 

Íbúar Noregs eru 5,2 milljónir, en íbúar hinna landanna tveggja í EFTA, sem eiga aðild að EES, er aðeins 0,4 milljónir, því að EFTA þjóðin Sviss felldi það í þjóðaratkvæðagreiðslu að taka þátt í í EES-samstarfinu 

Norðmenn eru sem sagt 13 sinnum fleiri en íbúar Íslands og Lichtenstein samanlagt. 

Gagnrýnir Norðmenn harðlega