Umferðin minni á norðurleiðinni en austurleiðinni, bílaraðir í Reykjavík.

Eftir skrepp í gær á vespulaga léttbifhjóli norður á Blönduós og til baka aftur í hinu ágætasta ferðaveðri, virðist umferðin áberandi minni á þeirri þjóðleið til og frá Reykjavík heldur en á leiðinni austur fyrir fjall.  

Mikið er um umferð bíla með hjólhýsi á austurleiðinni, og á miðvikudaginn var, var umferðin ansi mikil á stofnbrautum í Reykjavík í allar áttir. 

Enn meiri umferð var innanborgar í rigningunni á föstudag, og langar bílaraðir víða, svo að minnti á umferðina fyrir COVID-19. 

Greinilegt að hinn daufi farsóttartími á útmánuðum hefur valdið því, að sinna þarf mörgum erindum, sem fórrust fyrir á þeim einstaka tíma.  

Líklega munar mestu um umferð í hina fjölmörgu sumarbústaði á Suðurlandi hvað varðar mikla umferð.  

Slangur var af umferð á vélhjólum á austurleiðinni, en minna um slíkt á norðurleiðinni.  

Það munar auðvitað gríðarmiklu um hvarf erlendra ferðamanna af íslenskum vegum.  

Myndirnar hér á síðunni eru teknar í gær í Staðarskála og á Blönduósi. 

Það var gott að ferðast í gær og hitta marga kunningja, sem voru á faraldsfæti þrátt fyrir að enn sé þjóðin stödd í baráttu við faraldur, sem á eftir að hafa mikil áhrif hér næstu árin.  

Tilefni ferðarinnar var að vísu dapurlegt, jarðarför Sigurbjargar Hafsteinsdóttur sem bjó í Hvammi en kveður nú eftir langt ævistarf og markar ákveðin kynslóðaskipti í dalnum fagra. 

En alltaf er jafn gefandi að koma norður í sveitina sína og blanda geði við það góða fólk, sem þar býr. 

Eldur við hliðina á Staðarskála

Sýnir hve staðan er tæp.

Sá mikli vandi sem örfáir menn geta valdið varðandi COVID-19 sýnir, hve mikils er um vert að missa ekki tökin á því að hafa stjórn á ástandinu.  

Hugsanlega var það ágætt, úr því að það þurfti að verða, að innrásin tvöfalda með mesta hópsmiti og sóttkví í mánuð varð  að veruleika, að hún gerðist þetta snemma, því að nú er vonandi hægt að ná yfirvegaðri og styrkri stjórn á ástandinu og átta sig betur á þvi, hvað örfáir einstaklingar geta valdið miklum usla. 

„Skipulögð glæpastarfsemi“: Annars hóps leitað

Renna Biden og Trump fyrir forseta?

Íslenskan hefur boðið upp á alls konar möguleika til að túlka tímaskort og það fyrirbæri að falla á tíma. 

En engin takmörk virðast vera fyrir því troða inn enskum hugsanahætti og enskri orðaröð í stað hins íslenska. 

Fyrirsögnin "Chelse að renna út á tíma" er eitt af ótald dæmum um slíkt.

Orðanotkunin er hrá og bein þýðing á ensku setningunni "running out of time" sem er á góðri leið með að útrýma allri þeirri orðanotkun, sem hingað til hefur dugað Íslendingum vel um skort á tíma. 

Stundum virðist hin enskættaða orðanotkun asnaleg í byrjun, en með síbyljunni vinnur hún smám saman sess. 

Næsta skref gæti orðið að segja að þeir Joe Biden og Donald Trump séu að renna fyrir forseta, þ.e. nota hráa þýðingu á "running for president." 

Þýðiningin á "running out of time" minnir á gömlu grínþýðinguna úr íslensku yfir á ensku "hot river this book?", sem vanhugsuð þýðing á íslensku setningunni "hver á þessa bók?" 

Hráum þýðingum fer sífjölgandi eins og sést á því að í tengdri frétt um knattspyrnufélagið sem rennur hvað hraðast út á tíma, er orðið klásúla eingöngu notað um ákvæði  ráðningarsamningi félagsins, sem fjallað er um í fréttinni.

Íslenska orðið ákvæði hefur hingað til verið fullboðlegt, enda á það við eitthvað sem kveðið er á um í samningum eða lögum.  

 

Chelsea að renna út á tíma

Gamalkunnugt álitamál og byltingarkennd kenning.

Í þeim umbrotum og Skeiðarárhlaupum, sem urðu á fyrri hluta síðustu aldar, urðu til tvær skýringar á þessum atburðum í Grímsvötnum, svo sem árin 1934 og 1937. 

Annars vegar að eldgos undir ísnum hleypti af stað hlaupum úr Grímsvötnum niður Skeiðará, eða öfugt, að farglétting fullra Grímsvatna, sem brytist út um útfallið við austanvert Grímsfjall, hefði þau áhrif á kviku undir vötnunum, að þrýsingsminnkunin framkalla'ði eldgos. 

Kenningin um að fargminnkun íss ofan á eldstöðinni gæti framkallað eldgos þótti afar nýstárleg þegar hún kom fram og umdeilanleg, en smám saman vann hún á var síðar útvíkkuð út í það að þegar ísaldarjökullinn hvarf fyrir 11 þúsund árum hafi eldgosavirkni á jöiulsæðinu orðið allt að 30 sinnum meiri á tímabili en áður. 

Og nú velta vísindmenn vöngum yfir því hvað gerist ef og þegar núverandi jöklar hverfa. 

Öllum mælingum á þessu umbrotasvæði hefur farið svo mikið fram, að núna vefst orsakasamhengið síður fyrir vísindamönnum en áður. 

Eldgos brjótist út í lok jökulhlaups

Hve lengi tæki það nýja bylgju að fara um heiminn?

Stóra bylgja COVID-19, sem enn er að rísa í löndum, sem eru einna fjarlægust Kína, gæti kannski gefið einhvern árangur í varnarstarfi gegn nýrri bylgju frá Kína. 

Vonandi hafa menn lært nógu mikið alls staðar, til dæmis með því að loka strax útimörkuðunum, sem fóstruðu upphaf faraldusins í vetur. 

Nú þarf heldur betur að bregðast hart við og auk þess að hraða sem frekast er unnt að koma bólefni á fót.   

Óttast nýja bylgju faraldurs í Peking

Fróðlegt að vera á ferli utan bæjar og innan þessa dagana.

Undanfarna daga hefur það verið áberandi þegar verið er á ferli bæði í borg og dreifbýli hve mikil umferð fólks er, hvar sem komið er. 

Langar biðraðir, bíla utanhúss og fólks innanhúss gefur til kynna mikla starfsemi þrátt fyrir að enn þurfi að hafa varann á vegna nálægðarreglunnar. 

Í dag stendur til að renna norður í land, og bera umferðina á þeirri leið saman við umferðina á Suðurlandsvegi sl. sunnudag og miðvikudag. 

„Gæti sést til sólar öðru hverju“ í dag

Kyrkingartak er ekki alltaf það sama og kyrkingartak.

Kyrkingartak er eitt af brögðunum í júdói, sem taka má, en þó er það notað svo allt öðru vísi og er svo allt annars eðlis en takið, sem hélt George Floyd niðri, að varla er um sambærilegt fyrirbrigði að ræða. 

Aðalmunurinn liggur í því, að júdómaður nær sínu taki þegar báðir glímumennirnir eru í gólfinu og sá, sem tekur takið, gerir það með armi sínum. 

Báðir, ásamt dómurunum, eru þrautþjálfaðir til þess að takið sé aðeins tekið örstutt augnablik þannig að allir sjái, hvers eðlis er, og um leið og sá sem er fastur í takinu, finnur hvernig "lásinn" er, slær hann hendi í gólfið til merkis um uppgjöf, og sleppir sigurvegarinn þá takinu samstundis. 

Kannski er þetta augnablik varla meira 1-2 sekúndur í stað 526 sekúndna langa taksins, sem beitt var á Georg Floyd og þar að auki með því að þrýsta öllum likamsþunganum með hnénu ofan á háls hins kyrkta.  

Trump ekki alfarið á móti kyrkingataki

Óvinir í hverju horni lykillinn að fylgi og nýjum kosningasigri?.

Já, því ekki það??  Trump er áberandi í fjölmiðlunum eins og jafnan, og margur valdamaðurinn í heimssögunni hefur komist til valda og haldið völdum með því að fylkja þjóðum sínum að baki sér í harðvítugu stríði við skæða óvini, oftast blóðþyrsta mjög og ógnvænlega. 

Þetta gerði Donald Trump skipulega fyrir forsetakosningarnar 2016 og óvinaþjóðin voru þá Mexíkóar, upp til hópa glæpahyski og múslimatrúar íbúar Bandaríkjanna, sumir af annarri eða þriðju kynslóð frá innflytjendum. 

Trump hikaði ekki við að kalla Hillary Clinton og Barack Obama stofnendur ISIS, sem heimsbyggðin öll vissi að skelfilegasta hryðjuverkafólk síðustu 80 ára. 

Þetta virtist svínvirka og skilaði Trump inn í Hvíta húsið

Nú er Trump að hefja kosningabaráttuna 2020 og grípur að sjálfsögðu til þeirrar tegundar málflutnings, sem reyndist svo vel 2016. 

Hann hótar, sem yfirmaður bandaríska hersins, að senda herinn til Seattle til að ná borginni úr höndum hryðjuverkafólks, sem þar er með samþykki borgarstjórans, en miðað við sögu Bandaríkjanna þarf ekki lítið til að voldugasti her heims fari í innanlandsherferð fyrir völdugasta mann heims. 

Trump er þegar búinn að sviðsetja meginsviðið og taka það upp sem einskonar heimildarmynd í einstæðri gönguferð sinni við Hvíta húsið, þar sem hann hafði í fylgd með sér hershöfðingja, undirmann sinn, í táknrænni gönguför til að ljá því réttan blæ þegar liðsmenn forsetans beittu táragasi, piparúða og gúmmíkúlum gegn því meinta ofbeldisfólki, ræningjum og ruplurum sem þarna var sagt vera að ógna innanlandsfriði og stofna til borgarastyrjaldar með því einu að vera statt þarna, án þess að neitt af því, sem því var kennt um, sæist framkvæmt á heimildarmyndinni.  

Lokaatriðið var stórbrotið, forsetinn veifandi biblíunni fyrir framan kirkju með yfirlýsingu um að vera búinn að kveðja til allt tiltækt herlið til að berjast við fólkið, sem þarna var, og hnýtti forsetinn síðan við hvatningu til almennings, að nýta sér 2. viðauka stjórnarskrárinnar sem kveður á um rétt hvers borgara til að vígbúast og beita vopnum. 

Nú hefur hershöfðinginn að vísu beðist afsökunar á því að hafa verið þáttakendi í þessum mikla herútkallsgerningi, en það skiptir auðvitað engu máli. Þetta er allt komið á mynd í dásamlegu "raunveruleikasjónvarpi."  

Ráðamenn kirkjunnar hafa líka viljað sverja af sér sína þátttöku, en það fellur í skuggann af hinni glæsilegu sviðsetningu mannsins, sem varð fyrst frægur sem þátttakandi í raunveruleikasjónvarpi. 

„Farðu aftur í byrgið“

Tvær tölur; fjöldi smita og dauðsfalla, ráða öllu.

Þegar rætt er um kórónaveirusmit og dauðföll hefur oft vilja gleymast, að smit berast ekki bara aðra leiðina á milli tveggja manneskja, heldur liggur möguleikinn í báðum smitleiðunum, fram og til baka. 

Þótt ekkert smitt hafi greinst hér á landi í viku er of snemmt að fagna algerum sigri og opnun fyrir fullan ferðamannastraum til landsins ef ferðamannaleiðirnar fram og til baka liggja til og frá löndum þar sem veikin náði meiri útbreiðslu en hér og er enn í gangi. 

Svíar gjalda þess nú að hafa hleypt veikinni svo langt með sinni sérsænsku stefnu, að land þeirra er í raun  að mestu lokað á meðan smit og dauðföll eru þar enn í gangi. 

Og ef eitthvert Norðurlandanna opnar fyrir flug til Svíþjóðar á undan hinum Norðurlöndunum, getur komið upp sá möguleiki að sænskt smit berist til okkar í gegnum það land. 

Hvern hefði órað fyrir því fyrir fjórum mánuðum að tvær, að því er virðist, sakleysislegar tölur, fjöldi smita og fjöldi dauðsfalla réðu nánast einar úrslitum um efnahag og þjóðlíf einstakra þjóða? 

Allir velkomnir nema Svíar

Oftast tveir árekstraraðilar. 3 helstu orsakir slysa: Ölvun, óvarið höfuð og ökklar.

Síðuhafi hefur stundum verið spurður að því, af hverju hann noti jafn stóran hjálm og hann gerir. "Þú þarft ekki svona stóran hjálm á reiðhjóli" er oft sagt. 

Svarið við því er einfalt: Aðilar að árekstrum eru oftast tveir, ekki satt? Og í flestum tilfellum ræður maður því ekki hvort maður lendir í árekstri við Yaris eða stóran vöruflutngabíl." 

Og almennilegur, lokaður hjálmur, veitir áberandi meiri vörn fyrir höfuð og andlit en léttur, opinn hjálmur. 

Eftirfarandi listi er athyglisverður yfir ástæður fyrir banaslysum eða alvarlegum slysum á hjólafólki:   

1. Ölvun eða víma, 50 prósent af stórslysunum, meira en tvöfalt hærri tala en á bílum. 

2. Ekki notaður fullnægjandi hlífðarhjálmur. 

3. Ekki notaðir vélhjólaklossar/stígvél með ökklavörn. Ökklabrot eru algengust beinbrota og eru oftast langverst viðureignar. 

Ef þetta þrennt er fyrir hendi; edrúmennskka, hjálmur, vélhjólaklossar,  ásamt aðalreglunni, að hjólafólk hegði sér í umferðinni sem líkast því sem það sé ósýnilegt, er ekkert meiri slysahætta við að vera hjóli heldur en á bíl. 

Svona ferðastu á hjóli með stíl