Raftítlur, liprar og handhægar, bakpoki fín viðbót.

Raftítlur, öðru nafni rafhlaupahjól, eru hluti af vaxandi flóru rafhjóla af öllum stærðum og gerðum. (Heitið raftítla vísar til heitisins veggjatítla.)

Aðal kostur rafhlaupahjólanna er hve handhæg þau eru. Og líkt og gildir um önnur vélhjól, því að hlaupahjólin eru knúin afli örlítils rafhreyfils, getur ökumaðurinn haft meðferðis lítilsháttar farangur í bakpoka. 

Títlurnar komast fyrir í einkabílum og hægt að hafa þær með sér í strætó. 

Svisslendingar, sem nú hafa byrjað að framleiða og selja örbílinn Microlino, hönnuðu raftítlu á undan honum og að sjálfsögðu er einn möguleikinn í ferðum að nýta örbílinn til þess að komast lengra og smjúga betur í stæði en venjulegur bíll, en fara síðan afganginn af leiðinni á raftítlu.   

Á myndinni er tveir mannanna með títlur meðferðis. 

Auðvitað skiptir miklu að fara að öllu með gát á raftítlunum, því að ökumaðurinn er ansi berskjaldaður. 

Engin rafhlaupahjólaslys hérlendis

Óhugsandi í Yellowstone. Trépalla ef þarf.

Í Yellowstone þjóðgarðinum bandaríska hafa menn meira en 120 ára gamla reynslu af rekstri hans. 

Þar eru víða svipaðar aðstæður og eru á hverasvæðum í Mývatnssveit og línurnar eru alveg hreinar:  Ekki eitt einasta fótspor að finna í viðkvæmum leirnum. 

Til þess að tryggja þetta, er gangandi umferð stýrt eftir trépöllum, líkt og gert er á Þingvöllum. 

Ljósmynd af hverasvæði vestra á borð við þá sem sýnd er í tengdri frétt á mbl.is væri óhugsandi. 

Svo einfalt er það. 

Er ekki eitthvað hægt að læra af þessu?

Takmarka umferð við náttúruperlur

Árangri Reykjavíkurfundarins ógnað?

1987 settu þeir Ronald Reagan og Michael Gorbatsjof hemil á fjölgun og útbreiðslu kjarnavopna risaveldanna tveggja, sem hafði þróast upp í ógnvænlega stærð samkvæmt MAD (Mutual Assured Destruction) lögmáli Kalda stríðsins. 

Íslendingar voru stoltir af sinni þáttöku í þessu með Reykjavíkurfundinum 1986. 

Nú eru við völd í BNA tveir menn, sem sakna fyrrum mikilfengleik risaveldanna tveggja og þrá að endurvekja hann. 

Slíkir ráðamenn eru oftast ógn við friðinn eins og dæmið frá upphafi Seinni heimsstyrjaldarinnar ber vitni um. 

Og kennisentingin GAGA (Gagnkvæm Altryggð Gereyðing Allra) sem grunnnur nýs kjarnorkuvopntakapphlaups getur fljótlega orðið mesta ógn mannkynsins ef ekki verður spyrnt við fótum. 

Nýtt vígbúnaðarkapphlaup í uppsiglingu?

Icelandair - eins konar viðlagatrygging?

Áfallið, sem Icelandair hefur orðið fyrir vegna missis 737 Max vélanna og sér ekki fyrir endann á, minnir um sumt á tjón vegna náttúruhamfara, sem engin leið var að sjá fyrir. 

Jafnvel þótt Max vélarnar komist aftur í gagnið á þessu ári, fýkur sumarvertíðin út í buskann. 

Í ljósi þess að í raun fékk WOW air lán upp á 2 milljarða í gegnum Isavia, væri ekki fráleitt þótt einhverjir teldu að Icelandair ætti að fá ríkisaðstoð, og þá kannski með þeirri röksemd að þar væri að greiða út skaðabætur svipaðar og gert er hjá viðlagatryggingu. 

Á móti er kannski sagt, að jafnvel þótt Icelandair rúlli, komi erlend flugfélög fljótlega inn í og fylli upp í skarðið, því að nú fljúgi miklu fleiri flugfélög til landsins en nokkru sinni fyrr. 

En það hefur ekki gerst nema að hluta til varðandi WOW gjaldþrotið að önnur flugfélög hafi fyllt það stóra skarð og yrði vafalaust enn hæpnara ef Icelandair fer yfir um.

Ef Icelandair gefst upp verður það í fyrsta sinn í millilandaflugsögu Íslands sem ekkert íslenskt flugfélag flygi til og frá landinu.  

Sérstaða Íslands er líka slík hvað varðar legu landsins, að íslenskt milllandaflug hefur mikla sérstöðu.  

Hálfsárstap Icelandair 11 milljarðar

Það var mikið! Hvenær einbreiðu brýrnar?

Stærstu áfangarnir í gerð Hringvegarins eru líkast til þessir eftir að bílaöld hófst í raun árið 1913:

1. Ca 1930: Bílfært um landveg milli Akureyrar og Reykjavíkur. 

2. 1974: Bílfært allan hringinn. 

3, 2019: Malbikað allan hringinn. 

24 ár liðu á milli 1. áfanga og 2. áfanga, en hvorki meira né minna en 45 ár á milli 2. áfanga og 3. áfanga. 

Næsti áfangi gæti verið að engin einbreið brú verði á Þjóðvegi nr. 1. 

Mun það taka 24 ár?  48 ár? Heila öld? Enn lengri tíma?

Umferðarþunginn er mismikill á einstökum köflum vegarins, og Ísland er ekki það eina af Norðurlöndunum, þar sem aðstæður eru þannig, að tekist hafi að afnema einbreiðar brýr. 

Er Noregur ágætt dæmi um slíkt. 

Malbik allan hringinn

Tollmúrar og höft eru oftast til hins verra.

Í kreppunni miklu á fjórða áratug síðustu aldar gripu ríki heims til þess ráðs, að reisa tollmúra og setja á innnflutningshöft í stórum stíl. 

Í fljótu bragði virtist þetta vera heillaráð hjá hverju og einu ríki. Með þessum múrum var samkeppnisaðstaða innfluttra vara skert og innlend framleiðsla styrkt. 

Fyrirbrigðið var gamalt frá fyrri öldum og nefnt búauðgisstefna á íslensku. 

Á Íslandi reis upp undra fjölbreyttur iðnaður sem á yfirborðinu virtist skapa þúsundir starfa. 

En ef farið var nánar í saumana á málum, kom í ljós, að hin innlenda framleiðsla, þótt góð væri, leið fyrir smæð hins örsmáa markaðar. 

Handsmíðaðar iðnaðarvörur voru augljóslega framleiddar á miklu óhagkvæmari hátt en fjöldaframleiddar vörur á færiböndum í öðrum löndum. 

Eftir stríð voru höftin við lýði í rúman áratug, en í ljósi reynslunnar fyrir stríð, hófst aflétting hafta og vaxandi alþjóðasamvinna og verkastipting, þar sem sem frjálsust samkeppni tryggði lægsta verð hverrar vöru. 

Þegar Trump tók við völdum gaf henn þegar miklar yfirlýsingar um að setja á ýmis höft í innflutningi til þess að "gera Bandaríkin mikil á ný. 

Má þar nefna að útrýma evrópskum bílum vestra, hætta að flytja inn olíu frá Mexíkó, setja refsitolla á kínverskar vörur og kanadískar flugvélar í flokki smærri farþegaþotna. 

Þetta síðasta er svolítið skondið, því að kjöroðið "make America great again" virtist þar með ekki gilda um Kanada. 

Trump gaf yfirlýsinguna um Benz, BMW aðra evrópska bíla, í þeim hluta Bandaríkjanna þar sem eru stórar verksmiðjur Benz og BMW, og gleymdi að taka það með í reikninginn, varðandi olíuna frá Mexíkó, að stöðvun innflutnings gæti skaðað Bandaríkin vegna hækkaðs olíuverðs. 

Nú segir Gary Cohn, fyrrverandi efnahagsráðgjafi Trumps, að viðskiptastríðið við Kína hafi verri áhrif á efnahag Bandaríkjanna en Kína, og í því felst, að viðskiptastríð í formi tolla og innflutningshafta sé engu betra nú en það var í kreppunni miklu og fyrstu árin eftir stríð.  

Hefur meiri áhrif á Bandaríkin en Kína

Hlýindin breyta ánum, farvegunum og leiðunum yfir þær.

Jökulsárflæður svonefndar á austanverðri Gæsavatnaleið hafa löngum verið einn skemmtilegasti kaflinn á slóðakerfi hálendisins.  

Þetta er vestasti hluti Jökulsár á Fjöllum sem flæmist eftir sandinum í óteljandi samliggjandi grunnum smákvíslum sem venjulega hafa verið ágætlega færar ef ekið er hiklaust áfram. 

Og bara gaman að spretta úr spori og láta gusurnar ganga yfir bílana. 

En ef mikill vöxtur er í ám á borð við þessa á,  vegna hlýinda, leysingar og aurburðar, geta aðstæður breyst mikið og lúmskt til hins verra. 

Ástæðan getur til dæmis verið sú, að ef mikil hreyfing er á sandinum, sem áin bert fram, má stundum alls ekki hægja á ferðinni á jeppanum, hvað þá að stansa. 

Þá safnast aur að hjólum bílsins svo að hann veður pikkfastur. 

Svo er að sjá af myndum að þetta hafi gerst á Flæðunum í gær. 

Þegar áin er í þessum ham, getur ástandið orðið þannig, að ekkert nema þyrla geti aðhafst til bjargar fólkinu í bílunum. 

 

Flúðu upp á þak eftir að bílar festust