Túrbínutrixið í fullum gangi og orkan fer annað.

Túrbínutrixið, sem síðuhafi hefur kallað svo, á hálfrar aldar afmæli á næsta ári. Það byggðist upphaflega á því að byrja fyrirhugaðar stórframkvæmdir á því að kaupa strax túrbínur í komandi virkjun, þótt nánast allt annað varðandi hana væri óafgreitt og ófrágengið. 

Trixið gekk út á það að ganga sem fyrst svo langt í framkvæmdum og aðgerðum að ekki yrði aftur snúið, heldur öllum aðilum málsins stillt upp við vegg með hótunum um að ef þeir mökkuðu ekki rétt, yrði þeim kennt um að hafa valdið stórfelldu fjártjóni ef þeir reyndu að andæfa. 

Hvalárvirkjun átti upphaflega að verða 35 megavött og tiltölulega einföld, en hefur verið blásin upp í 55 megavött með mörgum stíflum og lónum og raski langt umfram allt meðalhóf. 

Þeir, sem hafa andæft, eru stimplaðir sem óvinir Vestfjarða sem séu á móti rafmagni í þeim landshluta. 

Þó blasir við, að raunverulegir fjárfestar og eigendur Hvalárvirkjunar eru í örvæntingu á ferli víða um land við að reyna að afla orku í stað hratt dvínandi orku í gufuaflsvirkjunum á Suðurnesjum. 

Þeir þurfa að afla nýrrar orku til þess að uppfylla orkusölusamninga við stóriðjuna á Grundartanga, þannig að á endanum verður langlíklegasta niðurstaðan sú, að Vestfirðingar muni ekki fá eitt einasta megavatt til sinna nota. 

„Miklu meiri framkvæmdir en þarf“

Líka bönnuð á gangstéttum í Þýskalandi.

Notkun lítilla rafknúinna hlaupahjóla, (sem ég sting upp að kalla "raftítlur"), á gangstéttum hefur verið bönnuð í Þýskalandi að því er sjá mátti í fréttum á netmiðlum um daginn.

Svo er að sjá af notkun þeirra í Brussel að margir aki þeim djarflega og á það við um skutlið á þeim inn á milli bílanna, en kannski eru þær ekki eins hættulegar og sýnist fyrir ókunnuga. 

Það blasir hins vegar við að fólkið á títlunum er gersamlega óvarið fyrir áföllum, hjálmlaust og oft afar léttklætt; meira að segja títlan sjálf veitir enga vörn ef árekstur verður.

Reynslan verður að skera úr um það hvort og hvaða takmarkanir þurfi að gera til þess að þessi mjög svo einfaldi og umhverfisvæni fararmáti verður stundaður. 

Þess má geta, að hönnuðir og framleiðendur Microlino bílanna nýju, sem eru byggðir á hugmyndinni að baki BMW Isetta fyrir 60 árum, urðu ríkir á framleiðslu á rafknúnum hlaupahjólum. 

Microlino byggist á afar snjallri hugmynd til að gera umferðina mun greiðari, en hefur einn ókost, sem varðar öryggi: Fætur þeirra tveggja, sem í rafbílnum sitja, eru alveg fremst í nefi hans og aðeins þunnur dyraþröskuldur og þunn hurð skilja að tærnar og ökklana frá því, sem hugsanlega yrði rekist á í árekstri.  

 

 

Ökumaðurinn undir áhrifum fíkniefna

Brúarbæirnir Selfoss, Hella, Klaustur, Egilsstaðir og Blönduós, - sömu lögmál.

Samgöngumannvirki á borð við brýr, vegamót, hafnir og flugvelli laða að sér byggð. 

Á þjóðvegi eitt urðu brýrnar yfir Ölfusá, Ytri-Rangá, Þverá, Skaftá, Lagarfljót, Héraðsvötn og Blöndu til þess að þéttbýli myndaðist við þær eða sem næst þeim, þ. e. Selfoss, Hella, Hvolsvöllur, Kirkjubæjarklaustur, Egilsstaðir, Varmahlíð og Blönduós. 

Breyttar aðstæður gátu á sumum stöðunum leitt til þess að það mynduðust umferðartafir í þessum þorpum eða þá að brúarstæðin urðu til þess að lengja þjóðveginn óhæfilega. 

Þannig var brúin yfir Ytri-Rangá, sem varð til þess að þorpið á Hellu myndaðist, afar mjó og leiðin að henni og frá þröng og krókótt þar sem hún lá í gegnum þorpið. 

Þegar hugmynd kom um að gera nýja brú talsvert neðar við ána, urðu miklar deilur og heyrðust setningar sem enn lifa góðu lífi annars staðar, svo sem að tilfærsla brúarinnar yrði "dauðadómur fyrir bæinn" og að öllu skipti "að leiða umferðina í gegnum bæinn."

Andstæðingar nýs brúarstæðis gáfu sér það að það að þorpið hafði myndast við brúna þýddi að þéttbýlið gæti hvergi verið annars staðar, ekki einu sinni við nýja brú. 

Ingólfur Jónsson, kenndur við Hellu, enda kaupfélagsstjóri þar, sá hins vegar í hendi sér, að ný brú myndi laða að sér nýtt þéttbýli, sem tryggði vöxt þorpsins og beitti sér fyrir því að hún yrði gerð. 

Málið var allt nákvæmlega eins vaxið og deilan um nýja Ölfusárbrú norðan við Selfoss er. 

Nú er talað um nauðsyn þess að "leiða alla umferð í gegnum bæjarmiðjuna í Selfossbæ, þar sem hefur verið vaxandi umferðaröngþveiti vegna þrengsla í áraraðir. 

Þetta umferðaröngþveiti á álagstímum hefur skapað mikla töf á umferðinni yfir Ölfusá, enda leiðin hvorki bein né greið nema síður sé. 

Rétt eins og var á Hellu, gefur auga leið að best sé að búa til greiðari og styttri leið yfir nýja brú fyrir norðan bæinn. 

Á Hellu kom í ljós, að tilfærslan á brúnni varð ekki til þess að fólk hætti að versla eða eiga erindi í þorpinu, heldur stansaði það þar ef á þurfti að halda.  

Og smám saman hefur atvinnu- og þjónustustarfsemi þorpsins færst að nýju brúnni, en munurinn samt sá, að í stað algers öngþveitis og þrengsla við gömlu brúna, er leiðin greiðari um nýju brúna, og þeir sem um hana aka, eiga val um það hvort þeir vilja stansa eða halda áfram í stað þess að reynt sé að neyða fólk til þess að stansa. 

En stefnan "að leiða umferðina inn í bæjarmiðjuna" lifir enn góðu lífi á tveimur til þremur stöðum við þjóðveg eitt, á Blönduósi, í Varmahlíð og á Egilsstöðum. 

Á Egilsstöðum var tækifæri til að stytta leiðina frá Seyðisfirði vestur yfir Lagarfljót í stað þess að þvæla ferðamönnum suður í þorpið og siðan aftur út úr því til norðurs inn á Lagarfljótsbrú. 

Ef þjóðvegur eitt yrði lagður beint frá Stóru-Giljá yfir í miðjan Langadal við Fagranes, yndi þjóðvegur eitt styttast um 14 kílómetra og það yrði arðsamasta vegaframkvæmd landsins. 

En í staðinn er öllum, sem koma að sunnan, gert að aka í norður út á Blönduós og síðan í suður um Langadal og greiða á leiðinni fram og til baka alls um 3000 krónur í aukinn aksturskostnað samkvæmt taxta ríkisins.  

Samt liggur fyrir, að við brúna hjá Fagranesi, sem er innan vébanda Blönduósbæjar, væri hægt að byggja upp þjónustu líkt og gert var á Hellu án þess að sveitarfélagið Blönduás missti þá starfsemi frá sér. Á Hellu var því til leiðar komið á sínum tíma að styrkja heimamenn til að aðlagast breyttri vegarlínu, og miðað við þá miklu fjármuni sem vinnast við styttinguna um Húnavallaleiðina, eins og hún hefur verið kölluð, er styrkur til breytinga vel hugsanlegur.  

Síðan er líka styttingarmöguleiki um Skagafjörð, þótt hann liggi ekki eins augljóslega við. Ef þjóðvegur eitt yrði lagður beinni leið en nú er,  austur úr Stóra-Vatnsskarði og á ská yfir í syðsta hluta Blönduhlíðar, yrði styttingin minnst 6-7 kílómetrar. 

Sú stytting, plús styttingin um Húnavallaleiðina er alls 20 kílómetrar, 40 kílómetrar samtals fram og til baka með um 4000 króna auka aksturskostnaði, og hálftíma lengri aksturstíma.  

 

 

 

 

 

Fjöleignahúsin stærsta hindrunin. Tæknileg orsök.

Á þeim fundum um rafbílavæðingu, sem síðuhafi hefur verið á, hefur komið fram að tregðan í fjöleignahúsum verði lang stærsta hindrunin varðandi rafbílavæðinguna.

Þeir, sem engan áhuga hafa á því að breyta til, leggjast oft að sjálfsögðu eindregið gegn því að farið sé út í kostnað við uppsetningu á hleðsluaðstöðu, og finna oft mörg fleiri atriði en kostnaðarhliðina til að leggjast gegn öllum breytingum.  

Ýmsar ranghugmyndir eiga greiðan aðgang að fólki, svo sem um stórfellda eldhættu af rafbílum og að það þurfi að hafa rafmótorinn í gangi allan sólarhringinn í kuldum til þess að hann og rafhlöðurnar eyðileggist ekki! 

Hefur meira að sést haldið fram á vefmiðlum. 

Og heyrst hefur það sjónarmið að það að ekkert heyrist í rafbílunum skapi stórhættu í umferð þeirra og að þessir "draugabílar" séu beinlínis óhugnanlegir og skapi óróa og ónæði í fjölbýli. 

Síðan er líka sagt að rafbílaeigendur geti einfaldlega látið sér nægja að hlaða bíla sína á hraðhleðslustöðvum og látið nágranna sína í friði. 

En það að hlaða bílana eingöngu á hraðhleðslustöðvum mun einfaldlega valda tjóni á rafhlöðunum þegar til lengdar lætur.  

Í handbókinni með Tazzari-bílnum, sem myndin er af, þar sem hann stendur við hliðina á Nissan Leaf, stendur skýrum stöfum, að nauðsynlegt sé að "djúphlaða" bílinnn rólega upp í topp og raunar helst hálftíma til tveimur tímum lengur á minnst tveggja vikna fresti. 

Ef það sé ekki gert, missi rafhlaðan geymslugetu miklu hraðar en ella með árunum. 

Hér er því um að ræða stórt efnahagslegt og tæknilegt atriði.

 

 

 

Hver rafbílaeigandi smiti tvo aðra

Viðskipti snúast um traust.

Síðuhafi er nógu gamall til að muna eftir því þegar hann og flugáhugafólk heimsins fylgdist með öndina í hálsinum með því þegar Boeing verksmiðjurnar létu hanna og smiða tvöfalt stærri farþegaþotur en nokkurn tíma höfðu verið smíðaðar áður. 

Einnig því hvernig sömu verkmsiðjur létu hanna tvöfalt stærri hljóðfráar þotur en Concorde og Tupulev 144. 

Hreyflarnir í þessar Boeing þotur voru tvöfalt stærri og aflmeiri en áður hafði þekkst og á þeim byggðist sú bylting sem var að ríða yfir.

Jafnframt þessu djarfa skrefi var hönnuð smærri þota en þriggja hreyfla þotan Boeing 727, og lét þessi minni tveggja hreyfla þota lítið yfir sér í fyrstu en átti smám saman eftir að verða langvinsælasta farþegaflugvél allra tíma: Boeing 737.  

Á þessum árum var Boeing með forgangsröð, sem var lykillinn af eindæma velgengni frá 1954 til aldamóta: 1. Öryggi. 2. Markaðsstaða. Þessi forgangsröð var undirstaðan að ómissandi hluta allra viðskipta: Trausti. 

Með þetta í huga hætti Boeing við smíði risastóru hljóðfráu þotunnar nógu tímanlega til þess að lágmarka kostnaðinn, sem lagður var í að kanna það verkefni. 

Smíði stóru Jumbo (Bumbu)þotunnar var hins vegar farsællega haldið áfram með þvílíkum glæsibrag að enn í dag er sú magnaða stórþota markaðshæfari en aðrar í stærðarflokki, sem hefur reynst afar erfiður eftir aldamót. 

Svo undarlega sem það hljómar, hefur farsæl. langvarandi og vaxandi velgengni 737 nú orðið þeirri þotu að falli, að minnsta kosti í bili, ef marka má sölutölur. 

Þegar fram komu mun stærri og sparneytnari hreyflar en áður þekktust kom í ljós, að smæðin í mikilvægum stærðarhlutföllum 737 réði ekki við þá á sama tíma og aðal keppinauturinn, Airbus 320, sem hafði verið hönnuð síðar og höfð aðeins stærri á þeim hluta hennar, sem mestu skipti fyrir það að koma nýju hreyflunum fyrir, gat nýtt sér þessa bráðnauðsynlegu hreyfla án of mikilla breytinga. 

Airbus 320neo gat notast við sama tegundarheiti og skilgreiningu og áður þótt nýir hreyflar væru á henni. Það sparaði mikla fyrirhöfn og fjárhæðir við að þjálfa áhafnir og fást við dýrt skráningarferli hjá FAA. 

Sennilega hefði verið skárra fyrir Boeing að gera annað tveggja, að hanna nýja þotu frá grunni, eða að breyta 737 nógu mikið um miðbikið og aftast til þess að hún réði við tilkomu nýju hreyflanna. 

Í staðinn var ákveðið að viðhalda tegundarheitinu og skilgreiningunni með því að setja í þotuna flókið sjálfstýrikerfi til að gera hana fullkomlega örugga. 

Því lengur sem það dregst að klára þetta erfiða viðfangsefni svo að fyllsta öryggis verði gætt, því verra.  

Framlenging á auglýstum töfum rýrir traust, nákvæmlega það sem viðskipti snúast um. 

Þess vegna er núverandi hvarf pantana hið versta mál. 

Engar nýjar pantanir í tvo mánuði

Takk! Spurningunum var svarað á vellinum í kvöld.

Í pistlinum á undan þessum var þess óskað að öllum spurningum um landslið Íslendinga og Tyrkja yrði svara að vellinum í kvöld en ekki í Leifsstöð, sendiráðum, ræðismannsskrifstofum eða öðrum stöðum utan vallar. 

Og svo sannarlega fengust svör, takk, takk, takk, okkar góða og gamalkunnuga landslið! 

Tyrkjum var komið niður á jörðina og sætur íslenskur sigur skapaður á liði, sem niðurlægði heimsmeistarana sjálfa fyrir nokkrum dögum. 

Ísland stöðvaði Tyrki í Laugardalnum

Spurningar og svör inni í á vellinum, takk!

Saga íþróttanna geymir mörg dæmi um það þegar ýmis atriðið utan vallar hafa orðið að stórum atriðum í leikjum eða bardögum. 

Þannig varð gæludýr George Foreman honum að fótakefli í bardaganum við Ali í Saír vegna þess að um var að ræða hund af sama kyni og Belgar notuðu í illræmdri kúgun þeirra á íbúum Kongó. 

Slakir kaðlar við hringinn urðu líka að miklu umræðuefni varðandi það hvort þjálfari Ali, Angelo Dundee, hefði látið slaka á þeim fyrir bardagann svo að Ali gæti notað þá til þess að halla sér út úr bestu bardagafjarlægð Foremans. 

Ýmis ummæli Alis utan vallar og fyrir bardaga hans orkuðu mjög tvímælis og urðu fyrirferðarmikil í umræðunni.  

Nú virðast uppþvottabursti og störf tollvarða í Leifsstöð, auk tölvuárása á kerfi Isavia og KSÍ stefna í að yfirskyggja leikinn sjálfan, sem fer senn að hefjast á Laugardalsvelli. 

Vonandi verður það knattspyrnan sjálf, sem leikin verður í leiknum, sem verður aðalatriðið í þessum mikilvæga leik. 

Spurningar og svör inni á vellinum, takk!

 

Hefnd fyrir móttökurnar í Leifsstöð

Hvaða áhrif höfðu tölvuárásirnar á flugumferðina?

Þannig vildi til að á sama tíma sem tölvuárásin á vefsíðu Isavia stóð í dag, var síðuhafi kominn út í brottfararrana á Barcelonaflugvelli til að fara um borð í þotu Norwegian air. 

Í fyrstu voru verðandi farþegar beðnir um að bíða þar til hægt yrði að fara af stað, en eftir að beðið hafði verið í um klukkustund fram yfir brottfarartímann var farþegun gert að fara í gegnun þvera og endilanga flugstöðina að öðrum brottfararstað. 

Þar tók ekki betra við, ekkert bólaði á brottför og að lokum var farþegum tilkynnt, að flug til Íslands hefði verið fellt niður og frestað til morguns. 

Var öllum smalað á veitingastað en síðan um borð í rútu, sem flutti þá 74 kílómetra norður fyrir Barcelona í strandbæinn Calella á hótel sem heitir Marblá (!), sem virkaði fyndið á okkur í ljósi þess að á leiðinni var ekið í gegnum bæinn Montgat (!)

Gæti það verið íslenskt nýyrði fyrir munn á söngvara sem er góður með sig. 

Hvað segir Baldvin Jónsson hinn mikli fimmaurabrandarameistari um það?

Þegar loks er komið hér í ró í Calella eru liðnar fimm klukkustundir síðan áætluð brottför átti að verða. 

Fréttir dagsins og þessi staða vekja ýmsar spurningar. 

1. Geta flugstjórar gert flugáætlun til lands lengst úti í norðurhöfum á flugvelli sem engar formlegar upplýsinnar er hægt að fá frá?

2. Er hugsanlegt að Ísland freisti tölvuhakkara eða erlendra afla sérstaklega vegna smæðar sinnar og þess, hvað hægt er að gera mikinn usla í ljósi þeirrar einhæfni, sem samgöngur landins búa yfir?

3. Var frestun flugs til Íslands í dag þess eðlis, að hún hefði hvort eð er orðið að veruleika, burtséð frá tölvuárásunum?

4. Sagt hefur verið að enda þótt Kalda stríðinu sé lokið sé að breiðast út ný tegund stríðs, sem kalla mætti tölvustríð og birtist meðal annars í ótrúlega fjölbreyttum aðferðum á margvíslegum vettvangi. Þurfa íslensk stjórnvöld ekki að vera sérstaklega á varðbergi vegna smæðar landsins og sérstöðu að mörgu leyti?

 

Tvær tölvuárásir gerðar á vefsíðu Isavia

Sífellt erfiðara að átta sig á uppruna bílanna.

Langdýrasti og flóknasti hluti hvers bíls er miðstykkið og meginlínurnar í "skelinni" sem bíllinn sem heild er myndaður af. 

Þannig eru bílarnir Kia Picanto og Hyundai i10 í grunninn sömu bílarnir og svipað gildir um fleiri bíla þessara bílaframleiðenda. 

Lengi vel voru nýi Fiat 500 og Ford Ka sami bíllinn, þótt ótrúlegt megi virðast, því að slíkur var útlitsmunurinn, Fiatinum í vil. 

Fiat og Chrysler hafa verið í samvinnu og það sést vel á úrvalinu af fjórhjóladrifnum bílum hjá umboðinu hér á landi, þar sem Jeep-bílar og sams konar Fiatbílar eru á boðstólum. 

Hjá mörgum framleiðendum er sami undirvagninn eða miðstykkið undir þremur mismunandi gerðum bíla, þ.e. megingerðinni eins og Volkswagen Polo eða Golf, síðan sams konar bíl nema að yfirbyggingin er hærri, og loks enn hærri bíl, sem býðst oft með fjórhjóladrifi en þó í æ minna mæli, því að fyrir kaupandann er það meira atriði að bíllinn sýnist vera "jeppi" heldur en að hann sé það!

Langvinsælasti bíllinn á Indlandi er Maruti, sem er í grunninn Suzuki Alto. Sá bíll í meginatriðum var seldur hér á landi sem ódýrasti og einfaldasti bíllinn á tímabili, og var framleiddur á Indlandi, þótt hann héti Suzuki Alto og nær allir héldu að hann væri framleiddur í Japan. 

Næsta stærð fyrir ofan, Suzuki Swift, er framleiddur í Ungverjalandi, en gott dæmi um það að jafnvel hjá íslensku bílaumboðunum komu fordómar í garð framleiðslulanda í veg fyrir það að bílar af Dacia gerð væru fluttir til Íslands einmitt þegar þeirra var mest þörf, en það var í Hruninu. 

Þá hefði verið hægt að bjóða barnafjölskyldum upp á sjö manna fjölskyldubíl fyrir lægra verð en Yaris! Að ekki sé minnst á Dacia Duster, en tafið var í áraraðir að sá bíll yrði boðinn hér á landi. 

Síðuhafi talaði við ýmsa menn í bilabransanum um möguleikana á því að flytja Dacia bílana inn en fekk bara gömlu svörin um "austantjaldsdrasl" rétt eins og kommúnisminn væri enn á fullu í Ungverjalandi og Rúmeníu. 

Aðeins þurfti að líta á sölutölur í Þýskalandi til að sjá hve góður markaður var fyrir þessa bila, enda er 1361 cc dísilvélin frá Renault einhver sú besta í heimi og varð hlutskörpust í sparaksturskeppni FIB 2016. 

Fyrir nokkrum árum ók síðuhafi á Suzuki Alto frá Reykjavík upp á Sauðárflugvöll á Brúaröræfum með bensíneyðslu upp á minna en 5 lítra á hundraðið, en einn skæðasti hælbíturinn í athugasemdunum klikkaði á því að líta á myndina af þeim litla á flugvellinum og hellti sér yfir það hvílíkt bruðl með eldsneyti ætti sér stað í ferðinni. 

Hefði verið gaman að setja hér inn mynd af Súkkunni, þar sem hún er komin langleiðina í Loðmyndarfjörð fyrir tveimur árum, en af tæknilegum ástæðum verður það að bíðá til morguns. 

 

Hætt við samruna Renault og Fiat Chrysler

Að vera aðili með aðilum!

Stundum er sagt til uppörvunar við fólk:  "vertu nú maður með mönnum" - eða "sýndu nú manndóm." 

Og það er stundum talað um að vera með mannalæti. En nú fer það í vöxt að helst má ekki nefna orðið maður, eða menn í fleirtölu, heldur er varla skrifuð sú frétt á bloggi og netsíðum, að ekki sé notað orðið "aðili".  
 

Í tengdri frétt er greint frá því að tveir aðilar hafi verið í lítilli þyrlu, sem hlekktist á. 

Það styttist í að aðilar séu með aðilalæti þegar þeir vilja vera aðilar með aðilum og sýna aðiladóm. 

Það þykir greinilega svo miklu fínna að nota orðið "aðila að fljótlega munu menn, - afsakið, aðilar, sjá, að mönnum, - afsakið, aðilum, verði ekki við bjargandi nema að um aðila sé að ræða. 

Söluaðilar munu selja fimm aðila bíla og handboltaaðilar vera með þrjá markaðila í handboltalandsliði. 

Eftir leikinn verður farið á dansstað þar sem verður fimm aðila hljómsveit. 

Og helsta verkefni útgerðaraðila er að aðilavæða skipin með góðum aðilaskap. 

Íslendingar verða áfram aðilar að aðilaréttindasáttmála Sameinuðu þjóðanna og ungaðilasáttmálanum líka. 

Orðið aðili flækir raunar mörg mál í stað þess að gera þau skýrari. 

Ef loðdýraflutningabíll lendir í árekstri hljóta loðdýrin líka að vera "aðilar" að árekstrinum ekki síður en "aðilarnir" sem sátu frammi í, ekki satt?  

 

 

Líkamsárás, þyrluslys og umferðarþungi