Virkasta eldstöðin hlýtur að vera líklegust núna.

Hekla getur gosið hvenær sem er.

Bárðarbunga er miðlæg megineldstöð, sem virðist vera í svipuðum undirbúningi að gosi og sumarið 2014.

Öræfajökull sýnir margt svipað og Eyjafjallajökull sýndi síðasta áratuginn fyrir gosið 2010.

Katla er á listanum yfir líkleg eldgos. 

Reykjanesskagi er að minna á sig. 

En Grímsvötn eru einfaldlega virkasta eldstöð landsins og með flest gosin, ekki síst vegna þess að þau eru komin inn á nokkurra áratuga tímabil aukinnar virkni eftir nokkurra áratímabil minni virkni þar á undan.  Þetta tímabila fyrirbrigði er nokkuð sérstakt fyrir Grímsvötn. 

Nú hefur hækkun viðbúnaðarstig í gult gefið til kynna, að Grímsvötn séu að færast efst á lista líklegra eldgosa hjá sérfræðingunum.  

 

Viðbúnaðarstig hækkað úr grænu í gult

Trump var sólbrúnni og sællegri, en sígjammandi og frekur.

Stjórnandi kappræðnanna í kvöld þurfti margoft að minna forseta Bandaríkjanna á þær reglur um einvígið, sem höfðu verið samþykktar af báðum aðilum fyrirfram.  

Engu að síður var Trump svo ágengur að meira að segja þegar báðir áttu að fá tvær mínútur alveg út af fyrir sig í lok hvers málaflokks, óð hann fram með frekju og yfirgangi og gjammaði á stundun stanslaust frammi í fyrir Biden. 

Lægst komst hann í að hjóla í manninn en ekki málið með því að núa honum því um nasir, að sonur hans hefði fyrr á árum átt við fíkniefnavanda að stríða og þurft að fara í meðferð. 

Biden átti í vandræðum með að komast að til að svara þessari lágkúrulegu árás, en tókst þó að komast í beint augnsamband við sjónvarpsáhorfendur til að segja þeim að kosningarnar snerust um bandarísku fjölskyldurnar og foreldra heima en ekki um eintök einkamál sona og dætra fyrir löngu. 

Síðuhafi sá kappræður Kennedys og Nixons 1960 og hrökk svolítið við að sjá svipaða sjón, sólbakaðan og brúnan Trump og fölleitum Biden. Það hefði mátt farða Biden meira. 

En Biden vann það upp að mestu með yfirvegaðri framkomu en hefði samt þurft á örlítið meiri ákveðni og hikleysi að halda. 

En það er ekkert auðvelt að eiga við frekjuhund eins og Trump og í heildina tekið slapp Biden betur frá þeim átökum en búast hefði mátt við. 

Fyrstu kappræður Trumps og Bidens

Betra að hugsa lengra fram í tímann.

Margumræddur stöðugleiki í áratugi virtist vera að fjúka út um gluggan hjá SA þegar menn þar á bæ vildu segja lífskjarasamningnum upp og orðið höfðu hlutverkaskipti meðal aðila vinnumarkaðarinsl í þeim efnum. 

Þetta gerðist svo hratt að það var engu líkara en að menn hefðu gleymt því að hugsa málið til enda, hvernig ástandið yrði þegar allt yrði komið upp í loft í kjaramálum. 

Sem betur fór, var hætt við að fara út i þá háskalegu för, sem virtist blasa við. 

Lífskjarasamningurinn gildi áfram

"Þýska leiðin", fjórfalt færri smit?

Hér á síðunni var því lýst fyrir nokkrum dögum, hvernig svo virtist sem fyrirbærið lyfta gæti sýnt það hvernig smitleiðir eru í smitandi farsótt eins og COVID-19. 

Hliðstæða hins létta öndunarúða gæti verið ilmvatnslykt eða sígarettureykur. 

Áhugaverð grein í Morgunblaðinu fjallaði um eins konar þýska leið, sem leggur áherslu á að koma í veg fyrir að öndunarloft úr lungum berist á milli fólks. 

Er það eins konar útfærsla af orðum Þórs: "Á skal að ósi stemma."

Sé gríma nógu vel gerð virkar hún í báðar áttir og á, samfara nógu mikilli fjarlægð á milli fólks, að hindra að smitloft komist á milli einstaklinga.

Þegar fjöldi tilfella er skoðaður á Íslandi og í Þýskalandi hefur munurinn undanfarið verið fjórfaldur, Þjóðverjum í vil, þótt ferðafrelsi sé býsna mikið þar í landi. 

Það hefur verið sagt, að mjög harðar sóttvarnaraðgerðir okkar í vor hafi skilað árangri, og nú segja sumir, að harðari aðgerðir Þjóðverja en okkar varðandi grímunotkun og fjarlægðarregluna hafi skilað árangri. 

Starfsmenn LSH með grímu geta komist hjá sóttkví

"Allt virðist mögulegt í Vestmannaeyjum," líka þetta.

"Allt virðist mögulegt í Vestmannaeyjum" eru orð, sem höfð eru eftir fjármálaráðherranum okkar í frétt á mbl.is fyrr í dag af ævintýri mjaldranna þar, sem hann er stórhrifinn af.

Það er kaldhæðnisleg tilviljun að þessi orð virðast líka eiga við um fréttina um segja upp öllum þremur starfsmönnunum, sem hafa starfað þar fyrir Isavia, en þar með lýkur, að minnsta kosti í bili, meira en 70 ára sögu áætlunarflugs milli lands og Eyja. 

Síðuhafi man vel eftir hinni gróskumikilli flugstarfseminni, sem skóp samgöngubyltingu í Eyjum og hefði varla órað fyrir því að það kynni nokkurn tíma að stöðvast á þann hátt, sem nú hefur gerst. 

 

Öllum starfsmönnum Isavia í Eyjum sagt upp

Afturábak um sjötíu ár?

Það þarf sennilega að fara afturábak um sjötíu ár til þess að finna jafn litla flugumferð til og frá Íslandi og er nú um Keflavíkurflugvöll. 

Flugvöllurinn var á þeim tíma mest notaður til flugs yfir Atlantshaf og Bandaríkjamenn töldu sig þurfa það örugga aðstöðu þar vegna herja sinna á meginlandi Evrópu, að um það var gerður sérstakur milliríkjasamningur, Keflavíkursamningurinn svonefndi 1946.

Millilandaflug Íslendinga var stundað frá Reykjavíkurflugvelli, því að á þeim tíma komust Douglas DC-4 vélar og seinna Vickers Viscount og DC-6B vélar vel af með brautir allt niður í 1500 metra langar. 

"Nú er hún Snorrabúð stekkur" orti Jónas Hallgrímsson um Alþíngi hið forna. 

Nánast öllum flugferðum aflýst

Enn ekki í svipuðu horfi og var rétt fyrir upphaf Holuhraunsgossins.

Nokkrum dögum fyrir upphaf gossins í Holuhrauni haustið 2014 hóf hrina jarðskjálfta að éta sig til norðausturs frá Bárðarbungu undir Dyngjujökli í áttina til gamallar gígaraðar, sem var í Holuhrauni frá átjándu öld. 

Umbrotin nú hafa ekki tekið á sig þessa "þroskuðu" mynd ennþá, hvað sem síðar verður. 

Athygli vekja smáskjálftar nokkra kílómetra austur af Bárðarbungu, ofarlega í Dyngjujökli. 

En þeir eru það smáir, að vegna skorts á mælingum fyrr á tíð er líklega erfitt að spá nokkru um það, hvað þeir tákna nákvæmlega.  

Kvikustreymi í Bárðarbungu

Myndin: "Fegurð hins háa og fegurð hins smáa..."

"MYNDIN" í kvöld. Sjá ljóð fyrir neðan hana. 

 

 

 

 

 

 

 

 

 

 

 

 

 

MYNDIN.  

 

Leitaðu´ að fegurð og finndu´ hana,

fjöllin og sólroðnu tindana. 

Fegurð hins háa og fegurð hins smáa,

fangaðu´og reyndu að mynda´hana. 

 

Því stakt, líkt og stuttmynd er jarðarkíf; 

safn augnablika er okkar líf, 

sem ylja og gefa og sorgirnar sefa 

að síðustu verða´okkar von og hlíf.  

 

Leitum að kærleika´og ástaryl, 

eins þótt við þjáumst og finnum til. 

Með bjartsýni´og gleði blöndum þá geði; 

það brúar öll ævinnnar veðraskil. 

 

Já, mundu´eftir bjarma hins bjarta hér; 

blómum sem litskrúði skarta hér.  

Fegurð hins háa og fegurð hins smáa

fangaðu´og geymdu við hjarta þér. 

 

 

Ljósmynd gulls ígildi

Miðlæg og mögnuð megineldstöð.

Grímsvötn bera titilinn virkasta eldstöð Íslands.

En í raun er svæðið Grímsvötn-Bárðarbunga miðja annars af tveimur stærstu möttulstrókum jarðar;  hinn er undir Hawai-eyjum á Kyrrahafi. 

Það má tala um öxulinn Bárðarbungu-Grímsvötn og þessar tvær eldstöðvar sem eins konar öxulveldi í eldstöðvakerfi Íslands. 

Eðli Bárðarbungu fór ekki hátt í eldgosaumræðunni fyrr en undir síðustu aldamót, þegar gosið í Gjálp hristi upp í þeim vísindum.  

Þá var opinberlega farið að rifja upp, að Bárðarbunga er nokkurs konar miðstöð og aðalstjórandi kerfis, sem nær til suðvesturs til Torfajökuls og Hrafntinnuskers. 

Í aðdraganda Holuhraunsgossins var í fyrstu rætt um að Bárðarbunga væri norðausturendi þessa kerfis.

En með því að segja það og líta á Öskju sem stjórnanda styttra kerfis fyrir norðan Vatnajökul sást mönnum yfir gígaröð norður af Dyngjujökli, sem mikil skjálftahrina í Bárðarbungu hljóp yfir í um mánaðamótin ágúst-september 2014. 

Hún endaði með stærsta hraungosi hér á landi síðan í Skaftáreldum 1783-84. 

Þar með stimplaði Bárðarbunga sig endanlega inn sem nokkurs konar mafíuforingi íslenskra eldstöðva, miðlæg og mögnuð, en léti aðrar minni vinna stórvirkin fyrir sig á báða bóga. 

Síðustu tvö ár hafa skjálftar í Bárðarbungu virst færast aðeins austar en í upphafi skjálftanna 2014. 

Hvað það þýðir er sennilega erfitt að vita, því að til þess hefði þurft að hafa yfir að ráða sömu mælingatækni og hefur verið notuð síðustu ár. 

 

4,8 stiga skjálfti í Bárðarbungu

Þarf að fylgjast vel með því hvað er að gerast erlendis.

Það að mikil hætta steðji að íbúum Madridar vegna kórónaveirunnar og að þar stefni í svipað óefni og í fyrstu bylgju faraldursins er dæmi um það hversu miklar og stundum ólíkar sveiflur eru í baráttunni við vágestinn.  

Nú þegar er skilgreint hættuástand á Landsspítalanum hér, og ef ástandið versnar hér svipað og í Madrid, bætist ný hætta við hættuna af dauðsföllum af völdum kórónaveirunnar, hættan á ótímabærum dauðsföllum ef ekki er lengur hægt að anna þörfinni á lífsnauðsynlegum aðgerðum og umönnun varðandi aðra sjúkdóma. 

Mikil hætta steðji að íbúum Madrídar