Er flughermir Icelandair dýrmætasta eign flugfélagsins?

Fróðlegt hefur verið að fylgjast með umfjöllun í erlendum fjölmiðlum um þann vanda, sem Boeing verksmiðjurnar og flugfélögin, sem keyptu þær vélar, glíma við.  

Atburðarásin síðan vélarnar voru kyrrsettar er athyglisverð og boðar ekki gott, því að allt frá byrjun, hefur hver fresturinn á einstökum atriðum lausnar vandans rekið annan, og er sumt af því kunnuglegt frá því í Boeing 787 Dreamliner baslinu á sínum tíma. 

Listi einstakra aðgerða og áfanga við að leysa Max-vandann er óralangur, og kemur þar margt til, sem ókunnugir átta sig ekki á, svosem sú mikla töf sem kyrrstaða 787 nýrra Max þotna; 387, sem þegar voru komnar í notkun og 400, sem voru framleiddar eftir að flotinn var kyrrsettur. 

Farþegaþotur eru flókin samgöngutæki, sem eru hönnuð til að vera sífellt í notkun en ekki að standa mánuðum eða jafnvel árum saman kyrrar. 

Aðalástæða Max-vandans var upphaflega sú einbeitta stefna Boeing að ekki þyrfti að kosta til dýrrar auka þjálfunar flugmanna vegna MCAS-búnaðarins, og jafnvel að sleppa við hann að mestu. 

Sífelldar seinkanir á gangi endurræsingar þotnanna stafa meðal annars af því, að verksmiðjan þráast sem mest hún má til að ná upphaflega markmiðinu.  

Einn hluti vandans, sem verður þrautin þyngri að leysa, er fyrirsjáanleg notkun á flughermi fyrir þoturnar. Flughermar eru rándýr tæki og merkilega fá flugfélög fóru út í það að kaupa sér slíka, heldur trúðu því að þeirra væri lítil eða engin þörf til að hægt væri að fljúga með hinn "fullkomna" galdra tölvubúnað um borð. 

Er ljóst að miklar tafir eiga um síðir eftir að verða við að þjálfa flugmenn, sem er og verður aðal verkefnið og að þau flugfélög, sem eiga herma, eiga eftir að mala gull með þeim. 

Eitt af hinum fáu flugfélögum, sem nefnt er sem eigandi slíks hermis í erlendum umfjöllunum, er Icelandair. 

Það gæti verið skýringin á því, að þegar síðuhafi ákvað að láta slag standa og nota flugmiða með Boeing 737 Max í síðasta farþegaflugi hennar, fékk hann þær upplýsingar frá yfirflugstjóranum, að flugstjórar Icelandair væru svo vel þjálfaðir í notkun MCAS, að ekkert væri að óttast. 

Ekki er víst að aðalatriðinu í öllum viðskiptum verði samt fullnægt þegar og ef MAX þoturnar fá að fljúga á ný. 

Þetta grundvallaratriði snýr að því að eftirspurn verði eftir því að fljúga með þeim. 

Skoðanakönnun í Bandaríkjunum sýnir nefnilega að 70 prósent aðspurðra, segjast aldrei munu vilja fljúga með þessum vélum.  

Ríkisábyrgð veiti „óverðskuldað framhaldslíf“

Segir það ekkert að Reykjalundur annar ekki endurhæfingu?

Að undanförnu hafa þeir, sem telja COVID-19 smávægilega flensu, krafist þess að birtar séu tölur, sem sanni, að margir glími við slæm eftirköst veikinnar mánuðum saman. 

Meðan þessar tölur séu ekki birtar, sé ekkert sem bendir til þess að hægt sé að nota orðið "margir".  

Í lítilli frétt í gær var sagt frá því, að biðlisti væri eftir endurhæfingu á Reykjalundi fyrir umrætt fólk. 

Segir það ekki eitthvað?  

„Þetta er ógeðslega erfitt“

Ef spurningin er um keppinauta, hvað þá?

Svæðið sem innifelur Þórsmörk og aðliggjandi svæði, Almenninga og Goðaland,  milli Suðurjökla og Markarfljóts, er vafalaust meðal fegursta svæða á Íslandi. Í fjalllendi Skaftafells og Lónsöræfa og við Langasjó má þó finna verðuga keppinauta og einnig hér og þar í fjallendi annars staðar í heiminum. 

En tveir staðir á Íalandi eru þess eðlis að þeir eiga engar hliðstæður í veröldinni og þar með enga beina keppinauta, Grímsvötn og Kverkfjöll, vegna samspils eldvirkni, íss og jökla. 

Kverkfjöll hafa það fram yfir Grímsvötn, að þar er fegurðin sífelld og varanleg, en fegurð Grímsvatna er einkum fyrst eftir eldgos, áður en íshella Vatnajökuls nær að hylja hinar fögru og einstæðu eldstöðvar. 

Í flugi frá Reykjavík austur á Brúaröræfi í síðustu viku bar nokkur fyrirbæri fyrir augu, sem gætu verið keppinautar, og kannski verða myndir úr þessu flugi settar hér í rólegheitum inn á síðuna. 

Svo sem hið einstæða fjallavatn Langasjó, sem er girt með tveimur nánast þráðbeinum, tvöföldum gígaröðum eða móbergshryggjum, en það fyrirbæri finnst hvergi annars staðar á þurrlendi jarðar nema hér á landi.  

Fallegasti staður á Íslandi?

Stórhættulegur með sjö skot á hol í baki og lamaður fyrir neðan mitti.

Jakob Blake var talinn lífshættulegur þar sem hann var hálffallinn framfyrir sig í bíldyrum og því særður sjö holsárum með jafnmörgum skotum í bakið í sjálfsvörn þeirra lögreglumanna, sem skutu.    

Eitt af skotunum er sagt í fréttum, að hafi farið í mænuna og maðurinn því lamaður fyrir neðan mitti, hugsanlega ævilangt. 

En samkvæmt fréttum virðist hann hafa haldið áfram að vera hættulegur og jafnvel orðið enn hættulegri  eftir að komið var með hann á sjúkrahús, því að þar var hann handjárnaður við sjúkrarúmið í næstum viku með tvo fíleflda lögreglumenn yfir sér.

Og hvers vegna er verið að flytja fréttir af þessu?  Er ekki allt í góðu? 

Ekki lengur handjárnaður við sjúkrarúmið

Bretland: 85 þúsund dauðsföll samsvara um 500 dánum hér.

Talan 85 þúsund látnir í Bretlandi í vetur samsvarar, miðað við fólksfjölda Bretlands og Íslands, um 500 dánum hér. 

Hér hafa 10 látist fram að þessu, þannig að það verður bara að vona, að þessi ágiskunartala sé allt of há.  

En hættan er samt á, að hún geti hugsanlega verið skuggalega há, og hafa ber í huga, að í mörgum tilfellum eru eftirköst og afleiðingar veikinnar langvarandi, þótt langflestir sleppi fyrir horn. 

Í spönsku veikinni 1918 dóu um 500 manns hér á landi, sem samsvarar 1500 núna, af því að núna er þjóðin þrefalt fjölmennari en þá.  

Skýrslu sem bendir til 85.000 dauðsfalla lekið

Enginn einn orkugjafi getur mettað óseðjandi orkufíkn jarðarbúa.

Í öllum þeim mörgu athugunum á möguleikum mismunandi orkugjafa til að að metta sívaxandi og óseðjandi orkufíkn jarðarbúa hefur niðurstaðan verið sú, að enginn einn þeirra geti einn og sér leyst þann mikla vanda.

Um miðja síðustu öld var ríkjandi mikil bjartsýni varðandi það að hægt yrði að láta kjarnorkuna eina leysa vandann, og olli þessi glæsta framtíðarsýn meðal annars því, að á sjötta áratugnum var það ein af helstu röksemdunum fyrir því að Íslendingar flýttu sér að virkja vatns- og jarðvarmaorku landsins áður en kjarnorkan gerði þá orkugjafa ósammkeppnishæfa. 

Í öllum draumum kjarnorkuunnenda var skautað frá hjá þeirri staðreynd, að hún er ekki endurnýjanlegur orkugjafi til lengdar vegna þess að birgðir uranium 235 eru takmarkaðar á jörðinni. 

Ef kjarnorkan ætti að anna allri þeirri ört vaxandi orkuþörf, sem mannkynið er haldið og koma algerlega í staðinn fyrir jarðefnaeldsneytið, sem allt snýst um á yfirstandandi olíuöld, myndi það þýða slíka margföldun kjarnorkuframleiðslunnar, að hún gerði lítið meira en að endast út þessa öld. 

Nefnd hafa verið þóríum kjarnorkuver, sem sýnast hafa marga kosti fram yfir úranium verin, en svo virðist sem aldveg dæmigerður "ókostur" þeirra hamli því að stórveldin snúi sér að þessum kosti: Það er ekki hægt að smíða kjarnorkuvopn á þennan hátt.  

Aðrar lausnir eins og að nota jarðargróða til að framleiða etanól eða aðra slíka orkugjafa gætu heldur ekki leyst dæmið einir og sér vegna þess að ekki veitir af þessari ræktun handa sveltandi heimi. 

Í allri umræðunni um hina bráðnauðsynlegu orku er yfirleitt sneytt fram hjá því, að það sé í raun galið að nota alltaf ítrustu sókn í orkubruðl og orkusóun sem forsendu í stað þess að snúa sér að uppsprettu vandans: Sívaxandi eftirsókn og eftirspurn eftir orku.   

Þetta er kannski svolítið svipað fyrirbæri og þegar öll viðleitnin til að fást við fíkniefnavanda heimsins felst í því að refsa framleiðendunum og herja á þeim, en gleyma því alveg, hvað það er sem knýr hina miklu fíkniefnaframleiðslu og sölu áfram. 

En það blasir raunar við; sívaxandi og óseðjandi eftirspurn neytendanna.  

Kjarnorkuver í byggingu í 7 Evrópuríkjum

Þegar hraði og þægindi eru peningar, miklir peningar, og töf þýðir tap, mikið tap.

Hraði er uppspretta mikilla fjármuna, hvar sem litið er í nútíma þjóðfélagi. Tafir þýða tap og jafnvel algert hrun. 

Stundum virðist eins og að hraðaaukning skili sér best á vissu bili, eins og þegar Fokker skrúfuþotur styttu flugið milli Reykjavíkur og Akureyrar úr 70 mínútum niður í 45 mínútur. 

Tæpum áratug fyrr hafði ferðatíminn milli þessara tveggja staða styst um 20 mínútur þegar hægt var að lenda á nýjum Akureyrarflugvelli í stað flugvallar á Melgerðismelum, en áhrifin ekki eins geysimikil og 1964. 

Eftir á að hyggja, var sagt, að ef menn hefðu vitað fyrirfram, hve farþegum fjölgaði stórkostlega með hinum hraðskreiðu vélum, búnum jafnþrýstibúnaði, hefðu þær verið keyptar fyrr 

Annað dæmi er sú töf, sem verður á ferðum rafbíla vegna þess tíma, sem fer í að hlaða rafhlöðurnar. 

Nú hillir undir byltingu í gerð rafhjóla og lítilla rafbíla með útskiptanlegum rafhlöðum, sem tekur aðeins nokkrr sekúndur að skipta um á sérbúnum skiptistöðum í stað þess að eyða til þess dýrmætum tíma, jafnvel með því að bíða þar að auki í biðröð eftir því að komast að. 

Fyrstu bílarnir í sögunni voru hægfara sömuleiðis fyrstu flugvélarnar. Framfarir, einkum í hreyflasmíði, breyttu þessu. 

Nú er það ákall uppi, vegna gríðrlegra tafa í umferð flugfarþega um flugstöðvar heimsins, að þessar tafir og óþægindi verði kveðnar niður með nýrri tækni. 

Í upphafi hins löturhæga flugs Wright-bræðra og annarra frumkvöðla, óraði engan fyrir þeim ógnar hraðaframförum, sem framundan væru.   

Núna eru menn á byrjunarreit varðandi greiningu á smiti á drepsóttum, og það eru svo gríðarlegir fjármunir í húfi, að það getur varla verið spurning, að fundnar verði leiðir til að auka hraða og öryggi skimana stórlega.  

 

Skila niðurstöðum um smit á 20 sekúndum

Frakkland: Samsvarar 162 látnum alls á Íslandi og 40 smituðum sl.sólarhring.

10 hafa látist hér á landi úr COVID-19, en 30.000 í Frakklandi. Miðað við fólksfjölda landanna samsvarar dánartalan í Frakklandi því að 162 hefðu látist hér á landi. 

Dánartíðnin hefur verið 16 sinnum meiri en hér á landi og smittíðnin sl. sólarhring er margfalt meiri en hér hefur verið. 

Veikin virðist enn vera í sókn hjá Frökkum eins og fleiri þjóðum. 

Þótt dánartíðnin sé líklega mikilvægari og gefi réttari mynd, er smittíðnin afar lúmsk tala, því að það sýnast lítil takmörk fyrir því hvernig áhrif og afleiðingar eru af hverju smiti fyrir sig. 

Og þegar þjóðir setja önnur lönd á rauðan lista eru það smitin, sem notast er við sem viðmið varðandi aðgerðir, sem bitna á ferðamannaumferðinni hjá báðum þjóðum. 

Reynslan hefur sýnt að staða veikinnar hjá öðrum þjóðum, sem við höfum samskipti við, er lítið minna áhyggjuefni fyrir okkur heldur en staðan hjá okkur sjálfum. 

Aðeins þurfti eitt eða tvö ný smit með nýrri gerð veirunnar til þess að skapa þá bylgju númer tvö, sem nú er glímt við hér á landi. 

Smitfjöldi nær hæstu hæðum í Frakklandi

Hópflug er eitt dæmið um fjölbreytnina í ferðalögum.

Þegar upplifun á náttúrunni er annars vegar, er hægt að nota margar aðferðir; ganga, fara á reiðhjóli eða rafhjóli, hesti, bíl eða á flygildum, allt frá eins manns flygildum upp í margra sæta vélar, að ekki sé nú talað um þyrlurnar. 

Í gær tók fjórir flugmenn sig saman og fóru í hópflug eftir endilöngu hálendinu.

Slíkt flug er ekki aðeins gefandi í alla staði, heldur liður í þvi að viðhalda tilskilinni færni og reynslu til að halda flugliðaréttindum.  

Tveir komu frá Tungubökkum í Mosfellsbæ og tveir komu frá bænum Forsæti í Flóa. 

Hér sjást flugvélarnar fjórar á mynd, sem tekin var ákvörðunarstaðnum,  Sauðárflugvöll á Brúaröræfum með Snæfell í baksýn í fjarska. 

Vélarnar eru, talið frá hægri til vinstri:  TF-ULF, 5 sæta Jodel Ambassador , sem Jón Karl. Snorrason var á: þá TF-ALB; Beryl 750 tveggja sæta flugvél, nýsmíðuð af Alberti Sigurjónssyni;  þar næast TF-OLA, 4 sæta Cherokee Warrior Ólafs Sigurjónssonar, bróður Alberts;  og loks TF-ROS, 4 sæta Jodel Dr.1050, sem síðuhafi flaug.   

Á Sauðárflugvelli snæddu menn nesti sitt og stönsuðu í rúmar tvær klukkustundir í prýðis veðri, sunnan golu eða kalda og um ellefu stiga hita undir heiðskírum himni. 

Þegar leið á daginn fór hitinn í 13 stig, en geta ber þess, að völlurinn er í 660 metra hæð yfir sjávarmáli, sömu hæð og tindur Vífilsfells.  

Þetta var önnur ferðin af tveimur til þremur föstum ferðum síðuhafa á hverju sumri til þess að gera úttekt á vellinum og yfirfara hann, merkingarnar á brautunum fimm, og ástandi þeirra, auk þess sem venjulega er valtað til þess að halda þeim í sem bestu standi. 

Í fyrri ferðinni er völlurinn valtaður eftir þörfum og séð um að merkingar, vindpoki og annað tilskilið sé í góðu lagi. 

Þetta gerist venjulega byrjun júní eða lok maí, oftast nokkrum vikum fyrr en fært verður þana um á bílum. 

Síðuhafi er umsjónarmaður og ábyrgðarmaðuri vallarins sem er alþjóðlega skráður og viðurkenndur með samtals tæplega fimm kílómetra löngum fimm flugbrautum og algjörlega náttúrugerður.   

Oftast er stansað á vellinum í tvær til þrjár nætur, en ef flogið er frá Reykjavík, er stundum hægt að afgreiða ferðina á einum degi, eins og var gert í gær. 

Ferðafélagar mínir hjálpuðu til við að dytta að ýmsu meðan stansað var, og á leiðinni austur var tekin býsn af myndum, því að allir flugmennirnir eru miklir áhugamenn um myndatökur og skilyrði á miðhálendinu góð, eins og þær myndir bera með sér, sem hér verða birtar frá þessum dýrðardegi. 

Kverkfjöll eru í flugleiðinni og heilla ævinlega í veðri eins og var í gær. 

Gosið í Holuhrauni 2014 til 2015 var aðeins um kortérs flugleið frá vellinum og sannaði völlurinn gildi sitt þá. 

Það gæti hann gert á ný ef Bárðarbunga lætur til skarar skríða á ný eftir að hafa verið að undirbúa gos síðustu misserin. 

Á myndinni af henni, sem tekin var í gær, sést yfir alla öskjuna með Köldukvíslarjökul í forgrunni, en Kverkfjöll í baksýn. 

Í suðausturhluta öskjunnar undir ísnum, eru tveir sigkatlar, sem birtust fyrir tveimur árum, en þar hefur mikill jarðhiti brætt sig upp í gegnum ísinn, sem þarna er sennilega um 200 metra þykkur. 

Eystri ketillinn er líklega rúmlega kílómetri í þvermál á milli ystu sprungna og það er að sumu leyti óhugnanlegt að horfa niður um opið í átt til inngangs í víti, ef hugsað er til forns hugsunarháttar varðandi Heklu og annarra eldfjalla. 

Þarna sést rennandi heitt vatn með íshröngli á botni ketilsins. 

Jón Karl og hans fjölhæfileikafólk, og bræðurnir Ólafur og Albert hafa verið tryggir gestir um langt árabil á Sauðárflugvelli á hverju sumri. 

Heimasmíðaða vélin hans Albert er dýrleg flugvél, aðeins 1100 pund, eða 500 kíló að þyngd, og knúin 160 hestafla hreyfli sem gefur henni 1200 feta klifur á mínútu og mun meiri flughraða en flestum öðrum vélum í þessum stærðarflokki. 

Þeir bræður eru landskunnir þúsundþjalasmiðir, hagleiksmenn og snillingar og ekki ónýtt að hafa þrjá laghenta og úrræðagóða menn í heimsókn á vellinum í gær. 

Þrjár af flugvélunum fjórum, sem voru á stjái í gær, eru ekki byggðar úr áli, heldur úr undraefni sem nefnist tré, þ.e. krossviði. 

Sumir hafa á orði að slíkar flugvélar séu fljúgandi vindlakassar!      

 

„Ákváðu að gefa veirunni nýtt nafn“

Hvítabjörninn - magnað tákn heimskautasvæða og loftslagshlýnunar.

Tilvera hvítabjarna á heimskautssvæðinu er glæsilegt dæmi um mátt lífsins og móður náttúru við óblíðustu skilyrði á hnettinum. 

Tegundin hefur þróast með því að líkamsbygging þess hefur aðlagast umhverfinu, fimbulkulda þess og ís á einstæðan hátt.  

Fjölmargt á síðustu árum sýnist benda til þess að hlýnun loftslags ógni lífsskilyrðum hvítabjarnarins og lífsbjörg harðgerðra íbúa, varðandi veiðar á landi og sjó.   

Í hitteðfyrra kom hópur horaðra hvítabjarna sem gerðu sig heimakomna í bæ í Síberíu þar sem slíkt hafði ekki gerst áður, og víðar gerist svipað.  

Enginn Íslendingur hefur kynnt sér jafn rækilega bráðnun íss á landi og sjó á heimskautssvæðinu en Ragnar Axelsson, sem hefur hlotið alþjóðlegar viðurkenningar fyrir frábærar myndir sínar og frásagnir, sem sýna hið versnandi ástand einkar vel. 

En Ragnar og aðrir þeir, sem hafa rannsakað þetta á fjölbreyttan hátt, meðal annars með mælingum, mega þola ásakanir frá mönnum, sem afneita bæði því að hlýnun sé í gangi og afleiðingum þess. 

Þvert á móti hafa þeir um árabil haldið því fram að loftslagið fari kólnandi og ísinn og jöklarnir séu jafnvel að vaxa! 

Myndum af stærð jökla sé snúið við þannig að í raun séu myndir af jöklunum í fyrri stærð teknar núna, en myndir sem sagðar séu teknar núna, sýni jöklana eins og þeir voru. 

Vaxandi árásir og ferðir hvítabjarna inn á byggð svæði séu augljós merki þess, að þá skorti mat, eingöngu vegna þess hve þeim fjölgi mikið!  

 

Ísbjörn drap mann á Svalbarða