Tölur eins og af annarri plánetu. Ofurþjóð og undirþjóð.

Tölurnar sem sjást í frétt af launum innan Giltnis Holdco eru eins og af annarri plánetu og eru enn eitt dæmið um sér hagkerfi ofurlaunafólks, sem engin bönd fá hamið. 

Innan hagkerfis okkar eru tvær þjóðir, annars vegar ofurþjóð, hin ósnertanlegu, og hin vegar undirþjóð. 

Ofurþjóðin tengist síðan stórum hluta þjóðarinnar, sem er um langt skeið búið að búa sér til hugtakið "sjálftökufólk". 

Með 85-100 þúsund krónur á tímann

Fjandsamleg yfirtaka.

Fjandsamleg yfirtaka heitir það þegar andstæðingar einhvers félags skipuleggja atburðarás, þar sem smalað er saman nógu mörgum til að fara inn á samkomu sem hefur stefnuvald, svo sem aðalfundur og stjórnin borin yfirliði í krafti fjölda. 

Þekkt var það í aðdraganda Eyjabakkadeilunnar þegar andstæðingar stjórnar náttúruverndarfélagsins, sem barðist gegn Fljótsdalsvirkjun, fjölmenntu á aðalfund félagsins til að taka völdin. 

Ekki man síðuhafi hverjar urðu lyktir þeirra deilna, en hugtakið fjandsamleg yfirtaka komst inn í umræðuna. 

Húðlitur þarf ekki að vera aðalatriðið í kynþáttadeildum. 

Meðan nasistar höfðu ekki byrjað fyrir alvöru það ætlunarverk sitt að hreinsa Evrópu af Gyðingum, þótti svörtum keppendum á Ólympíuleikunum í Berlín það sérkennilegt, að þar fengu þeir í fyrsta skipti á ævinni að gista á sama hóteli og hinir hvítu keppendur og fara í bað með hvítum og svörtum. 

Og frægt var tilsvar Muhammads Ali þegar hann neitaði að gegna herþjónustu af trúarástæðum Múslimatrúar, sem fælist í því að hann, svartur maður, færi til Víetnam til að drepa gulan mann og gera það fyrir hvítan mann sem hefði rænt landi af rauðum manni með því að drepa hann. 

Svartur nýnasistaleiðtogi á allra vörum

Íslendingar, tíu sinnum minni þjóð en Kýpverjar eru nú, gerðu þetta fyrir 72 árum!

Hlutur íslenskra frjálsíþróttamanna í því að bera hróður minnsta lýðveldis heims um víða veröld verður seint fullmetinn. Þetta gerðist á EM í Osló 1946 þegar Gunnar Huseby varð Evrópumeistari í kúluvarpi. 

Hann varði síðan titilinn glæsilega 1950 þegar glæstasti íþróttaflokkur, sem Íslendingar hafa nokkrun tíma sent á stórmót gerði garðinn frægan á EM í Brussel. 

1946 voru Íslendingar rúmlega 120 þúsund, eða tíu sinnum færri en Kýpverjar eru núna. 

Á spjöld sögunnar og rann á rassinn

Hluti af n.k. "unglingamótþróaskeiði" á Vesturlöndum.

Aðrar fréttir dagsins en sigur Hatara í gærkvöldi eru af svipuðum meiði. Í kjarabaráttunni ráða ferðinni þeir, sem nýttu sér óróa og mótrþróaskeið, sem er á Vesturlöndum og tóku völdin í stærstu verkalýðsfélögunum. 

Sósíalistaflokkurinn nú nýtur minna fylgis en hreinnn kommúnistaflokkur naut í Alþingiskosningunum 1937 en hinn nýi sósíalismi er þegar kominn lengra í valdatöku sinni en kommarnir þá. 

Gulstakkarnir í Frakklandi, fylgismenn Trumps í Bandaríkjunum og þjóðernissinnar í nokkrum Evrópulöndum eru dæmi um andóf úr ólíkum áttum þar sem ekki er hikað við að skipta út ást og setja inn hatur. 

Unglingamótþróinn er oft ekki rökvís eða samkvæmur sjálfum sér eins og nýja slagorðið að elska fyrst áður en hatrið muni sigra. 

Ráðist er að því sem hafa verið ríkjandi gildi úr fleiri en einni átt og við getum átt von á því að Hatarar muni bera fram misvísandi skilaboð. 

Macron Frakklandsforseti virðist hafa verið sá eini sem játaði að hafa haldið fram rangri stefnu og baðst afsökunar. Og ekki einu sinni er víst að það dugi. 

Hér heima hefðu slíkar yfirlýsingar átt að vera komnar ásamt aðgerðum iðrunar og yfirbótar fyrir löngu. 

 

Skoðun dómara gæti skipt miklu

Hverjir voru í stuði allt kvöldið?

Þegar starfsemi SÁÁ for að bera árangur kom það meðal annars fram í því að gamalt leiðindafyrirbrigði fór að verða sjaldgæfara; að fólk á skemmtistöðum var ekki komið í stuð fyrr en eftir klukkan tíu, og þetta stuð hélst ekki nema í um klukkustund; þá fór að halla á ógæfuhliðina vegna ölvunar. 

Samkomur hjá þeim, sem höfðu farið í meðferð, voru alltaf með fólkið í sama góða stuðinu. 

Flosi Ólafsson var afar fyndinn ræðumaður og var nokkrum sinnum fenginn til að halda ræðu í Þingvallaferð leikarafélagsins. 

Í fyrstu tvö skiptin klikkaði hann alveg vegna ölvunar. 

Þá fór hann í meðferð, gerðist þorstaheftur eins og hann orðaði það, og ræðan, sem hann hélt þá var skemmtilegasta tækifærisræða sem ég man eftir.

Hann sagði að hann hefði frétt á skotspónum eftir tvö fyrri skiptin að það hefði verið afar gaman í ferðinni, en hann myndi bara ekki neitt af því. 

Nú gæti hann hins vegar varla hamið sig fyrir hlátri þegar hann fengi loksins að vita, hvað hefði verið svona skemmtilegt. 

Algengt fyrirbæri hjá Íslendingum hefur löngum verið sá, sem "dettur í það" um hverja helgi, en vinnur vinnuna sína edrú virku dagana. 

Slíkur maður missir af hvorki meira né minna en meira en hundrað dögum árlega í ölvun og timburmenn. 

"Skyldudjammið" tekur margfaldan toll.

Fagnar 20 ára edrú afmæli

Sá ræður miklu sem vettvangnum og atburðarásinni ræður.

Í keppni af ýmsu tagi, allt frá hernaði til íþrótta og lista, ræður sá miklu sem vettvangnum og umræðunni ræður. 

Hatarar náðu þessu marki frá byrjun að láta umræðuna og skoðanaskiptin snúast um sig allt til enda. 

Það varð sífellt meira áberandi hve vel þeim tókst að láta sem flest snúast um sig og athyglisverð svör þeirra og uppákomur. 

Svo grunnmúrað var þetta orðið, að síðustu tvö viðtölin við Friðrik Ómar og Hatara, úrslitaviðtölin,, urðu gjörólík. 

Talað var við Friðrik Ómar um flutninginn sjálfan, en við Hatara um samband þeirra við áhorfendur og styrktaraðlia þar sem þeir stilltu sér upp fyrir framan fullan salinn. 

Hatari fulltrúi Íslands í Eurovision

Áhættunnar virði?

Rétt eins og 2006 förum við Íslendingar út í mikla óvissu ef við veljum Hatara sem okkar fulltrúa. 

2006 náði boðskapurinn i gegn hér heima, af því að hér hafði fólk tíma til að melta boðskap lagsins og túlkun Agústu Evu. 

Þegar á hólminn var komið ytra, var borin von að hægt yrði að má því fram vegna þess hve miklu minni tíma og tækifæri hundruð milljóna manna höfðu til að skilja lagið og túlkun þess. 

Það var synd, því að Ágústa Eva stóð sig fullkomlega en réði ekki við misskilninginn. 

Nú eru miklu stærri málefni í eldlínunni og ástandið gæti verið svo eldfimt, að allt saman spryngi framan í okkur. Þarna má varla orðinu halla. 

Eitt ráðið gæti falist í því að vera áfram jafn fámálir, en eitthvað verða þeir að segja samt. 

Úr því að keppnin var ekki siðgengin af okkur er sennilega of seint í rassinn gripið og hugsanlega ekki áhættunnar virði að halda áfram. 

Nú má sjá á mynd, að þeir halda á flösku með tæru vatni úr lindum Hálslóns. 
Eðlilega, því á risamynd af affalli þess lóns í Leifsstöð er því logið blákalt að ÖLL orka, sem framleidd er á Íslandi, sé 100% endurnýjanleg og hrein. 

Hið rétta er að í besta falli er þessi tala 70%. 

Og Hálslón er stærsti drullupollur í Evrópu og drullugasti drullupollur í heimi, gerður af mannavöldum. 

15 milljón tonn af leir steypast á sumri hverju í lónið, og skyggni í því síðsumars er um 10 sentimetrrar!

Ósammála nálgun Hatara

Það eru tímasprengjur í pökkunum.

Nú er verið að bjóða upp á þriðja orkupakkann, verkfallapakka og verkbannapakka. 

Í ljós er að koma, að eins og vænta mátti, að það eru sprengjur í öllum pökkunum, og hafa það verið tímasprengjur allan tímann.  

Bullandi ágreiningur er í öllum flokkum varðandi orkupakkann og einn sólarhringur án ræstingaþjónustu í hóteli jafngildir lokun. 

Miklu ollu þeir sjálftökuhópar og hástéttir í þjóðfélaginu sem hreyfðu ekki litla fingur gegn allt að 82 prósenta hækkunum þessara nýju aðalstétta. 

Það eru tvær þjóðir í landinu. Sjálftökuþjóðin sem ekkert fær stöðvað (forsetinn einn undanskilinn), er að hluta til með peningaeignir sínar og umsvif í erlendum gjaldeyri og býr í glæsivillum; -  og hins vegar lakar settari þjóðin, sem brýst um í krónuhagkerfinu með hávexti og svífandi hækkununum á húsææðisverði, sem gerir allt tal um aukinn kaupmátt að argasta öfugmæli. 

Það var marg búið að benda á þetta framferði sjálftökuaðalsins án þess að nokkuð væri að gert. 

Þetta skóp undirliggjandi óánægju og reiði sem skapaði tækifæri til að gera sósíalíska byltingu í verkalýðshreyfingunni og snúa klukkunni aftur um 60 ár til þess tíma, þegar kommúnistar og sósíalistar réðu mestu á þeim bæ á grundvelli kenninga Stalíns og Maó. 

Frestar orkupakka

Sylvía Nótt; gott og vel flutt lag, en boðskapurinn náði ekki í gegn.

Skrýtið er að ekkert sé minnst á lagið "Til hamingju Ísland", sem vann með yfirburðum hér heima 2006, en það gleymdist að hinn stóri fólksmassi sem horfir á Eurovision og greiðir atkvæði hefur afar takmarkaðan tíma til að kryfja tvíbentan boðskap til mergjar og ná að meta hann. 

Í keppninni hér heima fékk Ágústa Eva Erlendsdóttir nægan tíma til að skila hlutverkinu og boðskap þess vel til okkar, er því miður varð það meirihluti sem misskildi það hve afbragðs vel Ágústa Eva lék hlutverk hinnar hrokafullu og sjálfhverfu Sylvíu, sem var frábær ádeila á þeim tíma á hegðun okkar Íslendinga og fleiri þjóða.  

„Mér finnst allt í lagi að taka séns“

Stjörnustríðsdraumurinn um yfirráð í geimnum endurvakinn.

Á tíma Ronalds Reagan í Hvíta húsinu voru lagðir fram mikilfenglegir draumar um geimher og geimhernað að þær hlutu heitið "Stjörnustríðsáætlunin." 

Hún byggðist á þeirri hugsun að geimher og geimvarnir Bandaríkjanna yrðu svo með slíka yfirburði í geimnum, að engar eldflaugar óvinanna kæmust þar í gegn. 

Bein afleiðing þessa hefði auðvitað orðið sú, að Bandaríkin yrðu einráð í geimnum og gætu hótað hvaða þjóð sem væri útrýmingu án þess að óttast nokkra viðspyrnu. 

Þessi draumur tekur fram öllum fyrri draumum í mannkynssögunni um heimsyfirráð, því að jafnvel Hitler og Stalín óraði ekki fyrir að þeir gætu náð geimyfirráðum í viðbót við yfirráð yfir jörðinni.

Glæsilegra dæmi um að gera Bandaríkin "great again" er erfitt að hugsa sér.  

 

Tillaga um „geimher“ send til þingsins