"Svona gengur það. Svona er það..."

Í gegnum tíðina hef ég stundum fengið samkomugesti til að taka undir viðlag frumsamins lags með texta, nokkurs konar öfugmælavísu, sem Brynjólfur heitinn Jóhannesson fór stundum með, svo hljóðandi: 

Svona gengur það.

Svona er það.

Allir vita það

en enginn sér það. 

 

Svei mér ef það er ekki kominn tími til að skjótast í upptöku í hljóðver með Hauki Heiðari og bæta við nýju erindi í tilefni af umfjöllun þáttarins Kveiks í gærkvöldi um meðferðina á mörgum útlendingum á Íslandi. 

Fyrsta erindið yrði eins og það hefur verið í áratugi: 

 

Skattasvindlið er svakalegt, 

menn sveia því lon og don

en segja´að þetta sé þjóðaríþrótt 

og það sé ei nema von. 

 

Svona gengur það. 

Svona er það. 

Allir vita það

en enginn sér það. 

 

Og inn á milli gömlu erindanna í þessum söng, gæti komið eitt nýtt: 

 

Útlent vinnuafl okkur bjargar 

svo innfæddir græði vel

en láti þrælana líða oft við

að lepja dauðann úr skel. 

 

Svona gengur það. 

Svona er það. 

Allir vita það

en enginn sér það.

 

Brynjólfur fór einu sinni með upprunalega textann í útvarpsþætti Svavars Gests, en ekki var þess getið þá, hver hefði gert þann texta. 

Ef einhver veit eitthvað meira um það væri fróðlegt að vita um það. 

„Í sömu gildru og hundruð annarra“

Þeir negldu Al Capone á skattsvikum. En ekki Trump.

Löggunni tókst ekki að sanna neitt misjafnt á Al Capone fyrr en hún komst yfir gögn, sem sýndu nýleg skattsvik hans og gátu sett hann í margra ára fangelsi fyrir vikið. 

Nú segjast þeir hjá New York Times hafa gögn um stórfelld skattsvik Donalds Trumps um mjög langt skeið. 

Trump neitar öllu en lætur sig samt hafa það að vera fyrsti forsetinn sem ekki vill gera skattamál sín opinber. 

Ekki fylgir sögunni á hve mörgum árum skattsvik fyrnast vestra, en ef meint skattsvik vegna erfðafjárskatts eru fyrnd sleppur Trump í því máli og sennilega fleirum ef ekki öllum. 

Al Capone var að sönnu harðsvíraðasti stórglæpamaður Bandaríkjanna í kringum 1930 og því ekki sambærilegur við neinn, allra síst venjulega borgara. 

Þó má ætla að sömu skattalög gildi samt um alla vestra. Líka forsetann.  

 

Aðstoðaði foreldrana við skattsvik

Almennur misbrestur og sleifarlag í umferðinni.

Í umferð á fjölförnum gatnamótum í borginni ríkir lausung, sem eykur stórlega slysahættu. 

Þar leiðir oft eitt af öðru. 

Ekki þarf að dvelja lengi við gatnamót með beygjuljósum til að sjá margar tegundir af slakri hegðun bílstjóra, sem draga oft dilk á eftir sér. 

1. Drulluhalaháttur við að fara af stað á grænu ljósi. Stundum er hann svo alger, að aðeins einn eða tveir bílar komast yfir á grænu ljósi, en það leiðir oft að sér að öftustu bílarnir, sem fara yfir, gera það á eldrauðu ljósi.  

2. Þegar menn drattast svona hálfsofandi yfir, verður oft til röð bíla í aftari hluta beygjuraðarinnar, sem loka fyrir umferðina á götunni sem liggur þvert á, svo sem á Kringlumýrarbraut við gatnamót Háaleitisbrautar, sem annars kæmist yfir á grænu ljósi.

3. Stundum nær algerlega vanrækt að gefa stefnuljós og eru gatnamót Fellsmúla og Grensásvegar gott dæmi um það, þar sem bílar þurfa að bíða í stað þess að komast yfir gatnamótin, vegna þess að enginn, sem ætlar að beygja í umferðinni á móti, nennir að láta vita af því hvað hann ætlast fyrir. 

Þegar umferðin um flókin gatnamót er meira og minna í ólestri vegna slælegrar frammistöðu ökumanna veldur það óþarfa hættu og slysum. 

Fór yfir á rauðu ljósi

Í meira en 90% árekstra rekast tveir bílar hvor á annan.

Létt fyrirsögn í tengdri frétt vekur bros: "Tveggja bíla árekstur á gatnamótum."

Óvenjuleg fyrirsögn því að þegar bílar rekast hverjir á aðra, rekst langoftast einn bíll á annan bíl.

Það eru sem sagt tveir bílar, sem lenda í árekstrinum og þessi fjöldi, tveir bílar, er því varla frétt, því að fyrirbærið frétt heitir á nærtækum erlendum málum "nýtt", svo sem "nyhed", "news", og táknar yfirleitt eitthvað sem er nýstárlegt, óvenjulegt eða það mikilsvert, að það snerti marga. 

Það hefur verið sagt til að lýsa eðli frétta, að það sé ekki frétt ef hundur bítur mann, en hins vegar frekar frétt ef maður bítur hund. 

Það liggur við að það, að tala um tveggja bíla árekstur, sé svipað og að segja tvær manneskjur hafi orðið hjón. 

En svo má líka segja, að fyrirsögnin "tveggja bíla árekstur" sé svo óvenjuleg, að hún sé fréttnæm út af fyrir sig og liti hversdaginn.  

P.S.  Nú sést í fréttum síðdegis, að það voru þrír bílar sem lentu þarna í hörðum árekstri, þannig að tveggja bíla fyrirsögnin virðist hafa byggst á röngum upplýsingum eða misskilningi. 

 

 

Þriggja bíla árekstur á gatnamótum

Vestfirðir áfram lengra og lengra á eftir í fluginu?

Vestfirðir hafa lengi skorið sig úr öðrum landshlutum varðandi flugsamgöngur. Um þetta hefur ítrekað verið fjallað á þessari bloggsíðu. 

Segja má að fjórðungurinn dragist alltaf lengra og lengra aftur úr, því að í grundvallaratriðum hefur ástandið ekkert skánað í meira en 50 ár, eða síðan Ísafjarðarflugvöllur var tekinn í notkun. 

Allir aðrir landshlutar voru þá búnir að fá flugvelli, sem hægt var að lenda á allan sólarhringinn og þar með orðið fullgildir flugvellir allan ársins hrings og fyrir flug bæði innanlands sem utan. 

Á kosningafundi á Vestfjörðum 2007 vakti það hlátur fundarmanna sem alger fjarstæða þegar bent var á, að með heilsárs landsamgöngum milli norðanverðra og sunnanverðra Vestfjarða gætu opnast möguleikar fyrir stórum flugvelli á Barðaströnd, sem væri fær allan sólarhringinn allt árið um kring og að þaðan yrði aðeins rúmlega klukkustundar akstur til Ísafjarðar. 

Þó er vitað, að í slæmum hríðarverðum í norðanátt er Bíldudalsflugvöllur oft eini flugvöllurinn á norðanverðu landinu sem er opinn. 

Sömuleiðis benti Egill heitinn Ólafsson á það, að Patreksfjarðarflugvöllur væri ekki einasta eini flugvöllurinn á Vestfjörðum, sem gæti haft almennilegt blindaðflugskerfi, heldur gæti þverbraut í Sauðlauksdal haft sömu eiginleika og Bíldudalsflugvöllur í norðlægum vindáttum. 

Bæði við Brjánslæk og Haga á Barðaströnd er rými fyrir almennilega flugvelli, sem hefðu þennan kost, en auk þess væri mun styttra þaðan til Ísafjarðar en frá Patreksfirði. 

Ofangreind hugmynd 2007 var byggð á 40 ára reynslu af flugi allan ársins hring fyrir vestan, en var hlegin út af borðinu í beinni útsendingu í sjónvarpi. 

Að minnsta kosti hefur málið haldið áfram að vera steindautt. 

Í gegnum tíðina hafa komið fram hugmyndir um heilsdagsflugvelli við Sveinseyri í Dýrafirði og við Hnífsdal. 

Slíkar flugbrautir hefðu þann kost að vera svo stutt frá Ísafirði, að þær væru í raun hluti af brautarkerfi Ísafjarðarflugvallar. 

Nú, þegar Guðjón S. Brjánsson vill velta þessum málum upp, hefur íbúum Vestfjarða fækkað úr því að vera 7 prósent landsmanna fyrir hálfri öld niður í 2 prósent og þar með aukast erfiðleikar við að benda á þá skammarlegu staðreynd, að flugsamgöngur við Vestfirði eru því miður nokkurs konar fornaldarfyrirbrigði í aðstöðu til nútíma flugs hér á landi. 

P. S. Það getur ekki kostað mikla peninga að lengja norðausturenda brautarinnar á Ísafirði um 150 metra. Hér á síðunni hefur áður verið rakið hvernig þessi litla lenging gæti skipt sköpum við aðflug og fráflug á vellinum við ákveðnar aðstæður, við flugtak inn fjörðinn og í lendingarbruni og flugtaki út fjörðinn. 

 

 

Sparaði sér 226.000 kílómetra akstur

"Aukning í magni fjölda ferðamanna."

Ofangreind orð féllu af vörum manns í útvarpsviðtali. Öðruvísi gat hann ekki lýst því að "ferðamönnumm hefði fjölgað."

Orðið "aukning" er komið langt með að útrýma sagnorðunum "að vaxa" eða "að fjölga." 

Þegar annar maður í útvarpsviðtali vildi lýsa gangi mála í ferðaþjónustunni, gat hann ekki lýst helstu staðreyndum öðruvísi en að bæta við fyrir framar þessar staðreyndir tískuorðunum "við eum að sjá."  Við erum að sjá þetta og við erum að sjá hitt. 

Einn okkar ágætu veðurmanna í sjónvarpsfréttum bætir æ ofan í æ við orðunum "kemur til með að" fyrir framan staðreyndirnar "sem við sjáum" á skjánum. 

Það kemur til með að myndast lægð sem kemur til með að vaxa og kemur til með að fara yfir landið, svo að það kemur til með að kólna og hvessa. 

"Kemur til með að..." er algerlega óþörf viðbót, sem lengir málið, en það var eitt af einkennum svonnefnds kannsellístíls, sem tröllreið íslensku ritmáli á 19. öldinni og var kennt við stjórnkerfið danska. 

Veðurmaðurinn hefur komist upp í það að segja "...kemur til með að..." sjö sinnum i einu stuttu veðurspjalli. 20 sekúndur samtals í vaskinn á dýrasta útsentingartímanum. 

Nú sækir á eins konar enskuskotinn ný-kannsellístíll, engu skárri en hinn danskættaði var og bæði þessi fyrirbæri virðast eiga að gefa til kynna háar stöður og mikla menntun og upphefð þeirra sem rita eða tala í þessum stíl. 

Nýlega söfnuðust til feðra sinna fjölmiðlamennirnir Eiður Guðnason og Jónas Kristjánsson, sem notuðu afburða skýrt, rökvíst og fagurt íslenskskt mál í umfjöllun sinni um menn og málefni. 

Er þar skarð fyrir skildi.  

Þess má geta, að "aukning í fjölda nýskráðra bíla" er orðið nær alrátt orðalag um vöxt eða fjölgun, en síðan sá ég síðar í morgun, að komin var önnur mun betur skrifuð frétt um svipað efni á mbl.is.  

Ber að þakka það sem vel er gert. 

 

34% aukning í nýskráningu rafbíla

Allra bragða neytt.

Nú eru að verða tvö ár síðan Stundin ætlaði að fjalla um mál, sem varðandi almenning og kjörna fulltrúa hans. 

Þetta voru greinilega mál, sem viðkomandi málsaðilar töldu mikilvægt að almenningur kæmist ekki á snoðir um. 

Og lagatæknar fundu ráð til þess að stöðva birtinguna fyrirfram með því að krefjast lögbanns á hana. 

Og lagatæknarnir fundu dómara, sem gerði það sem um var beðið þótt auðséð væri, að rökin fyrir lögbanninu héldu ekki vatni. 

Þessi atbeini réttarkerfisins tryggði það að málið myndi velkjast svo lengi í dómskerfinu, að gagnvart fréttaflutningum jafngilti það ritskoðun og broti gegn grundvallaratriðum lýðræðisríkja. 

Dæmi um viðleitni valdaafla til að fara sínu fram er það, að Ísland hefur verið viðundur meðal Evrópuþjóða varðandi það að lögfesta Árósasáttmálann, sem snýst um það að í umhverfis- og náttúruverndarmálum eigi samtök og félög almennings svonefnda lögaðild að framkvæmdum, en ekki einungis landeeigendu, stofnanir og fyrirtæki. 

Flest Evrópulönd höfðu lögfest samninginn fyrir tuttugu árum, en Íslendingar drógu lappirnar, og tókst meira að koma í veg fyrir það í Gálgahraunsdeilunni að mörg hundruð eða jafnvel þúsunda manna samtök náttúruverndarfólks ættu lögaðild að deilunni. 

Í því efni þjónuðu dómstólar valdalöflunum á svipaðan hátt og í máli Stundarinnar. 

 

Vilja stöðva fréttir fyrir fram

Svo einfalt en samt... Núið, sem skapar framtíðina.

Ef maður labbar út úr búð með tíu kíló í höndunum fyrir helgina, getur verið ágætt að hugsa til þess, hve miklu auðveldara væri að hlaupa upp næstu tröppu án þess að rogast með þessa þyngd. 

En hugsa síðan næst til þess, að maður er kannski samt að rogast með óþarfa tíu kíló af fitu utan á sér allan daginn, og það getur hefnt sín að vera ekki meðvitaður um þetta, heldur búinn að samlagast því og orðinn samdauna því. 

Og það flýgur í gegnum hugann: Er óþarfa fitan, sem maður rogast með, virkilega svona þung?

Munurinn á búðarvöruburðinu og fituburðinum er sá, að búðarvöruburðinn er hægt að leggja frá sér eða hætta við að kaupa hann, og það er ákvörðun, sem tekur bara augnablik að taka svo að hún svínvirki. 

Það að taka af sér tíu kíló af fitu er hins vegar víðsfjarri því að svínvirka á sama augnablíki, heldur mun það taka langan tíma með samfelldri röð af samskonar ákvörðunum í núi hvers augnabliks að skapa þá framtíð, sem verði betri, - þetta er langt langt langhlaup.  

Lífið er röð af óendanlega mörgum augnablikum, sem hvert um sig kemur og fer, - á einu augnabliki, - en er samt hvert fyrir sig dýrmætur hluti af forsendu fyrir betri líðan um langan tíma.  

Var orðin óvinnufær vegna ofþyngdar