Getur lyfta verið smitdreifari?

Nokkur skipti hjá síðuhafa í nánd við fólk, sem reykir eða notar ilmvötn, gefa sennilega einhverja vísbendingu um dreifingu kórónaveirunnar. 

Í þessum tilfellum nægði eins metra reglan engan veginn til að halda andrúmsloftinu hreinu, og tveggja metra reglan virtist að vísu gefa skárri vörn, en samt ekki algilda heldur. 

Vindáttin skipti máli í þeim tilfellum, þar sem staðið var utanhúss og lengja tvo metrana talsvert, og lyftur virtust búa yfir aðstæðum, þar sem mengað loft gæti verið kyrrstætt í lokuðu rými lengi. 

Í einu tilfellinu gekk manneskja út úr lyftunni með angandi loft sem lagðist yfir þá, sem mættu henni og þegar komið var inn í lyftuna, var lyktin alls ráðandi. 

Nokkrum mínútum síðar þurfti að nota lyftuna aftur, og þá var "stækjan" þar enn. 

Nú er slíkt loft líklegra léttara en mettað öndunarloft úr lungum fólks, en svona atvik vekja umhugsun um það, hve mikið vandaverk smitvarnir geta verið. 

 

 

Svona dreifir kórónuveiran sér

Heitt jarðhitavatn á Bárðarbungu sést vel í gegnum jökulinn.

Fyrir fjórum vikum var flogið yfir Bárðarbungu á leið til Sauðárflugvallar á Brúaröræfum. 

Þetta var 27. ágúst, skyggni mjög gott og hlýtt loft hafði verið yfir jöklinum á undan, þannig að sigkatlarnir tveir undir ísskildinum yfir Bárðarbungu, sáust vel eins og kemur vel fram á þessum ljósmyndum, sem teknar voru, en kom kannski enn betur fram á kvikmynd, sem tekin var. 

Á efstu ljósmyndinni hér sést vel, að eystri ketillinn er engin smásmíði, meira en kílómetri á breidd og líkast til meira en 200 metra djúpur. 

Grímsvötn sjást efst til vinstri og það sést í autt land efst til hægri, handan jökulsins. 

Á kvikmynd með miklum aðdrætti sást greinilega heitt vatnið undir jökulhettunni, sem virtist renna til austurs, eða var að minnsta kosti þakið ísmulningi. 

Það sést líka ef að er gætt á neðstu ljósmyndinni hér á síðunni, að þarna gæti verið heitt rennandi vatn í hæsta vatnsfalli á landinu. 

Á næst efstu myndinni sjást báðir sigkatlarnir, og Kverkfjöll eru í baksýn. 

Þessi staður er líklega hæst yfir sjó af jarðvarmasvæðum Íslands og þar af leiðandi mest snjókoma á öllum árstímum og kaldast loft. 

Sem þýðir, að jarðvarmasvæðið á Barðarbungu er býsna öflugt. 

 

Gufa í Bárðarbungu

Tugþúsundir lífeyrisþega langt innan við hálfdrættingar meðaljóna.

Tugþúsundir lífeyrisþega og öryrkja eru með mánaðartekjur, sem eru á bilinu 25-35 prósent af þeim meðaltekjum, sem greint er frá í tengdri frétt á mbl.is. 

Slefa yfir 200 þúsund á mánuði. 

Þúsundir lifa við skort ásamt þúsundum barna. Stjórnmálamenn landins hafa nær linnulaust á þessari öld sótt í að skerða lífsviðurværi þessa stóra hluta þjóðarinnar og hafa allir flokkar, sem átt hafa ráðherra í ríkisstjórnum þessara ára, tekið þátt í því.

Þetta er til skammar og magnað, að talsmenn ellilífeyrisþega skuli telja sig knúna til að leita réttar síns fyrir erlendum dómstólum.  

Á hátíðarstundum ræða ráðamenn samt fjálglega um það hve mikið fyrirmyndar velferðarríki Ísland sé.  

Helmingur með 533 til 859 þúsund í laun

Skurðlækningaþjónustan er kannski viðkvæmasta töfin.

Afleiðingar heimsfaraldursins birtast helst í ótal töfum á starfsemi og hindrunum. 

En þær eru misjafnlega alvarlegar. 

Líklega er versta töfin fólgin í skurðlækningaþjónustunni því að þar er svo oft um líf eða dauða að tefla. 

Þetta verður að hafa í huga þegar kvartað er yfir of hörðum sóttvarnaraðgerðum. 

Það er mikið til vinnandi að sú þjónusta lendi ekki í svipuðum vandræðum og gerðist svo víða í upphafi faraldurins á útmánuðum.  

Veiran hefur áhrif á starfsemi í skurðlækningaþjónustu

60 ár frá mótmælum Alis. Nú er hann farinn en ástandið ekki.

Muhammad Ali ólst upp í Lousville í Kentucky og var, vegna kjaftháttar og orðheppni kallaður "the Louisville lip." 

Þegar hann varð Ólympíumeistari í hnefaleikum 1960 í Róm en gramdist svo misréttið heima að þar, sem hann stóð á brú einni, henti hann Ólympíugullinu á ána. 

Það var fyrir miklu að berjast. 

Þegar hinn hörundsdökki Jesse Owens vann einhver frægustu afrek íþróttasögunnar á ÓL í Berlín 1936 fyrir framan nefið á Adolf Hitler fékk hann samt að gista á sama hóteli og fara í sömu sturtu og hvítir menn á hótelinu, þar sem hann gisti.  Það fékk hann ekki í heimalandi sínu, ekki einu sinni á ferð með landsliðinu eða félögum sínum í íþróttum. 

Roosevelt forseti vék frá venju varðandi heimboð afreksfólks í Hvíta húsið og bauð ekki Owens. 

Í New York fékk hann ekki að fara inn aðaldyramegin á stóra samkomu varðandi Ólympíuleikana, heldur var niðurlægður með því að þurfa að fara bakdyramegin. 

Ali var í fremstu röð baráttufólks gegn kynþáttamisrétti í heiminum og gegn Vietnamstríðinu, sem þvinga átti hann til að berjast í hinum megin á hnettinum. 

"Hví skyldi ég, svartur maður, fara yfir þveran hnöttinn til að drepa gulan mann fyrir hvítan mann, sem rændi landinu af rauðum manni?" var spurning, sem honum var eignuð. 

"Ég á ekkert sökótt við Viet Cong. Enginn þeirra hefur kallað mig niggara" sagði Ali. 

Hann var dæmdur í fangelsi og sviptur heimsmeistaratitli og öllum réttindum til að stunda íþrótt sína í hátt í fjögur ár á þeim tíma sem hann var á besta aldri. 

Hann þurfti að berjast harðri baráttu fyrir því að fá að breyta "þrælsnafni" sínu, Cassius Clay, í Muhammad Ali. 

Þrátt fyrir að vera rændur bestu árum ævi sinnar til íþróttaiðkunar, afrekaði hann það að eignast feril, sem gerði hann að "the greatest", og verða eini íþróttamaðurinn í hópi þeirra mestu snillinga 20. aldarinnar, sem Time útnefndi um síðustu aldamót. 

Hæstiréttur sneri dómi undirréttar við á þeim forsendum, að það meginatriði múslimatrúar að ástunda frið án ofbeldis og manndrápa, væri gild ástæða Alis til að neita að gegna herþjónustu. 

Ali ástundaði það atriði trúar sinnar og boðaði af kostgæfni alla tíð.  

Persónulega fékk hann þá uppreisn, að vera falið að tendra Ólympíueldinn í Atlanta 1996 með skjálfandi höndum.   

En fréttirnar frá Louisville 60 árum eftir táknræna athöfn hins 18 ára gamla blökkumanns, þá með þrælsnafnið Cassius Clay, eru þess eðlis, að það er eins og að ekkert hafi breyst. 

Ali er farinn, en ástandið ekki. 

 

Kröfðust réttlætis í Louisville

"Mannúðarsjónarmiðin" komu frá Sameinuðu þjóðunum.

Meðferðin á Khedr-fjölskyldunni braut æ meira í bága við mannúðarsjónarmið, sem ratað hafa í íslenska löggjöf í gegnum aðild okkar að Sameinuðu þjóðunum. 

Málið er ekkert einstakt hér á landi, því að fyrir Heimsstyrjöldina síðari var "óæskilegu" flóttafólki vísað úr landi héðan, svo sem barnafjölskyldu árið 1937. 

Fjölskyldan var Gyðingatrúar, og Gyðingar voru ofsóttir á þeim tíma sem ógnvaldar gagnvart öllum öðrum, "gyðinglegur bolsévismi í Sovétríkjunum og gyðinglegir heimsvaldasinnar í Bandaríkjunum. .  

Og rétt fyrir stríðið fengu norskir skógarhöggsmenn landvistarleyfi hér á sama tíma og margir hámenntaðir Gyðingar fengu það ekki.   

Að undanförnu hefur verið mikið skrifað hér á blogginu um nauðsyn svipaðra vinnubragða núna gagnvart "óæskilegu" flóttafólki og þess krafist að aðeins fái hér landvist hvítt og kristið fólk úr svipuðu umhverfi og er hér á landi, bæði landfræðilega og menningarlega. 

Í stað þess að veita þeim landvist, sem verst hafa verið leiknir svo sem í Sýrlandi og fleiri Arabalöndum, og nú síðast Venesuela, líkna þar sem neyðin er stærst, eigi að finna einhverja í kristnum löndum og þekkilegri. 

Með því að gera slíkt að aðalreglu er beðið um að láta ástæður þess, að þetta flóttafólk flosnaði upp engu skipta, heldur eigum við gefa okkur það að það sé sent hingað af múslimskum hryðjuverkasamtökum til þess að fremja hér valdarán af grófasta toga. 

Svo langt hefur verið gengið í þessum skrifum, að krefjast þess að Helga Vala Helgadóttir, Magnús Norðdal og fleiri verði tafarlaust handtekin og hneppt í gæsluvarðhald vegna aðildar sinnar að málinu.  

 

Khedr-fjölskyldan fær dvalarleyfi

Blönduð lausn er líklegust til árangurs.

Ef sú spá gengur eftir að einkabílum muni fjölga um tugi þúsunda á allra næstu árum á höfuðborgarsvæðinu, er augljóst, að ef ekkert breytist annað, verður vaxandi skortur á rými fyrir alla þessa viðbótar bíla og þar af leiðandi versnandi og meiri umferðartafir. 

Þótt sjálfsagt sé að endurbæta gatnakerfið og auka afköst þess, er ljóst, að það verða hvorki peningar né rými fyrir öll þau mislægu gatnamót og stækkandi umferðaræðar, sem þarf, til að taka á móti öllum þessum viðbótarbílum, sem fara auk þess stækkandi að jafnaði hver um sig, að því er séð veðrur, og flöskuhálsarnir verða fleiri og verri viðfangs. 

Óhjákvæmilegt er að leita nýrra og fjölbreyttra lausna auk aðgerða til að efla almenningssamgöngur og lausna fyrir gangandi og hjólandi. 

Frá einni þeirra hefur verið greint hér á síðunni, og felst í því, sem Volkswagen verksmiðjurnar ætla að gera í gegnum SEAT bílaverksmiðjurnar á Spáni. 

Ætlunin er að gera Barcelona að nokkurs konar miðstöð fyrir nýja tegund samgangna, sem byggist á smíði lítilla tveggja manna rafbíla með útskiptanlegum rafhlöðum í Barcelona, sem þegar hefur verið smíðað reynslueinktak af undir heitinu SEAT Minimo. 

Þeir muni ná 90 km hraða, komast 100 km á hleðslunni og hægt að leggja þremur þversum í eitt stæði. 

Þar að auki er bylting í gangi varðandi útskiptanlegar rafhlöður á léttum rafbifhjólum, og með því að fylgjast með því í Barcelona, hvernig þessi nettu farartæki létta á umferðarþunganum og minnka umferðartafir á álagstímum, sést gagnsemi þess að minnka það rými, sem einkafarartæki taka. 

Í Japan hefur um áratuga skeið verið kerfi svonefndra kei-bíla, sem eru styttri en 3,40 og mjórri en 1,48, og hafa með betri nýtingu rýmis í gatnakerfinu létt á umferðarþunganum í borgum landsins. 

Endurbætur á gatnakerfinu skila sér betur eftir því sem plássið, sem einkabílarnir taka, er minnkað.   

Borgarlína leysir ekki vanda

Göngum milli Siglufjarðar og Fljóta var hafnað með Héðinsfjarðargöngum.

Þegar Héðinsfjarðargöng voru ákveðin, var um tvær leiðir að ræða. 

Héðinsfjarðargöng, tvískipt göng, sem tengdu Siglufjörð og Ólafsfjörð innan Norðausturkjördæmis og lægju um botn eyðifjarðarins Héðinsfjarðar 

eða 

"Fljótagöng", sem væru líka tvískipt, annar hlutinn milli Ólafsfjarðar og Fljóta, og hinn hlutinn milli Fljóta og Siglufjarðar. 

Aðalkostur þeirra ganga var tvíþættur: Að tengja Siglufjörð við Fljótin, Skagafjörð og alla leiðina suður til Suðurnesja á tryggan hátt með stystu mögulegu leið. Einnig að gagnast byggðinni í Fljótum og tryggja gildi Héðinsfjarðar sem eina fullstóra eyðifjarðarins á ströndinni á milli Árneshrepps á Ströndum og austur um til Loðmundarfjarðar. 

Ókosturinn var um 15 kílómetrum lengri leið milli Siglufjarðar og Ólafsfjarðar en með Héðinsfjarðargöngum.  

Þingmenn Norðausturkjördæmis þrýstu mjög á að velja Héðinsfjarðargöng, þrátt fyrir að með því væri því fórnað að hafa bestu og stystu tenginguna við allan vesturhluta landsins, allt frá Vestfjörðum til Suðurlands. Einnig sætu menn áfram uppi með hinn langa óveg um Almenninga til Siglufjarðar og það, að þegar sú leið væri ófær, er 69 kílómetrum lengri leið til vesturs og suður um til Reykjavíkur en um Eyjafjörð. 

Notuð var sú aðferð að "reikna Fljótagöng út af borðinu" með því að krefjast þess að gangamunnarnir væru miklu neðar en á öðrum jarðgöngum, en með því móti var hægt að lengja þau svo mikið á teikniborðinu, að þau yrðu dýrari. 

Svipuð aðferð virðist hafa verið notuð við hugmyndina um göng undir Hjallaháls vestra, að hafa vestari gangamunninn alveg niðri í fjöruborði.  

Nú eru Siglfirðingar að vakna upp við vondan draum; þá staðreynd, að leiðin um Almenninga til vestur- og suðurhluta landsins er ekki aðeins lengri en hún þyrfti að vera, heldur er vegarstæðið hrikalegt, ekki bara útlitslega, heldur líka vegna þess að hlíðarnar, sem vegurinn liggur um, eru á einstæðu framskriði, sem kemur í veg fyrir að hægt sé að malbika hann, og getur orðið að risastóru framhlaupi hvenær sem er. 

„Hrikalegar“ aðstæður á Siglufjarðarvegi

Afturför um 74 ár og margfaldur ferðartími.

Ein fyrsta flugleiðin, sem áætlunarflug var tekið upp á,eftir Seinni heimsstyrjöldina var á milli Reyjavíkur og Vestmannaeyja. 

Bæði íslensku flugfélögin, Loftleiðir og Flugfélag Íslands, tóku upp áætlunarflug á þessari leið, og komst heilmikil samkeppni á í þessu flugi þar til misvitrir stjórnmálamenn skiptu öllu áætlunarflugi innanlands upp á milli félaganna á þann hátt, að 40 ára einokunartími Flugfélagsins var óhjákvæmileg afleiðing. 

En upphaf áætlunarflugs var samgöngubylting fyrir Eyjamenn, innreið nútímans. 

En nú er öldin önnur og stærsta afturför í sögu samgangna við Eyjar blasir við. 

Þrátt fyrir tilvist bæði Þorlákshafnar og Landeyjahafnar lengist ferðatíminn á þessari leið um tvær klukkustundir og fjórfaldast ef Landeyjahöfn er notuð og ferðatíminn lengist um fjórar klukkustundir og áttfaldast ef Þorlákshöfn er notuð.   

Áhyggjuefni að flugið leggst af

Hvað, ef talað væri um þrumur og eldingar í Reykjavíkinni og á Selfossinum?

Nú virðist það færast í aukana hjá veðurfræðingunum í Sjónvarpinu að nefna helst aldrei Vestfirði nema með greini. Og jafnvel líka Austfirði. 

Hámarki náði þetta í gærkvöldi þegar heitið Vestfirðir var nefnt með greini alls sex sinnum, og heitið beygt svona:  Vestfirðirnir - um Vestfirðina - Frá Vestfjörðunum - til Vestfjarðanna. 

Til þess að átta sig á eðli málsins, skulum  við segja sem svo, að þrumur og eldingar hefðu heyrst og sést í Reykjavík og á Selfossi. 

Þá myndi mörgum bregða í brún, ef fréttamaður segði að það hefði orðið vart við þrumur og eldingar í Reykjavíkinni og á Selfossinum.