Tvískinnungurinn í náttúruverndarmálum.

Tvö náttúruverndarmál, sem koma upp á sama tíma, varpa ljósi á ákveðinn tvískinnung í þeim málum hjá okkur. 

Annars vegar heilög vandlæting Íslendinga gagnvart erlendum ferðamönnum, sem fóru inn á hálendisleið, sem í ljós kom að ekki hafði verið lokað opinberlega af vegagerðinni, en útlendingarnir brutu sannanlega reglur með þvi að aka utan leiðarinnar þar sem skafl lokaði henni.

Fyrir þetta þóttu þessir erlendu gestir liggja sérlega vel við höggi og sóttu sérstöku aðkasti.

Hins vegar var það fréttin um að veiða stórhveli, sem var ekki aðeins stórhveli, heldur að hálfu leyti hvalur, sem er er skilgreindur í útrýmingarhættu. 

Þar hefur athæfið haft slæmar afleiðingar á umræðu um Ísland sem náttúruverndarþjóð sem gumar af ást sinni á náttúruvernd. 

Svo langt gengur auglýsingin á innilegri ást Íslendingar á ósnortinni náttúru, að enginn erlendur gestur kemst inn í landið um Leifsstöð né aftur til baka úr landi, nema að ganga fram hjá risavaxinni montauglýsingu um það að öll orka sem Íslendingar framleiða sé endurnýnanleg og hrein. 

Hið rétta er að í mesta lagi er hægt að segja að 75 prósent orkuöflunarinnar standist þessa kröfu og rányrkja Íslendinga í gegnum gufaflsvirkjanir á háhitasvæðum nemur í raun stærri hlutdeild en samsvari notkun Íslendinga til eigin fyrirtækja og heimila.   

 

Afbóka ferðir vegna blendingshvalsins

Dettifoss nr 3 og Gullfoss nr 8. Eldvirki hluti Íslands dýrmætari en Yellowstone.

Í nýlegum lista yfir stórkostlegustu fossa heims er Dettifoss nr.3 og Gullfoss nr. nr. 8. 

Á vandaðri bók sambands félaga bíleigenda í Bandaríkjunum yfir 100 stórkostleg undur jarðar, bæði náttúruundur og mannvirki er hinn elvirki hluti Íslands meðal 40 náttúruundra. 

Aðeins 7 náttúruundur eru í Evrópu og aðeins tvö á Norðurlöndum. 

Yellowstone, sem bandarískur sérfræðingur um gufuaflsvirkjanir taldi að Bandaríkjamenn myndu aldrei snerta til jarðvarmanýtingar af því að þessi elsti þjóðgarður heims væri "heilög vé," kemst ekki á blað í þessari bók. 

Það sýnir ólík viðhorf Íslendinga og Bandaríkjamanna að Yellowstone ásamt 100 þúsund ferkílómetra svæði í kringum þjóðgarðinn skuli vera alfriðuð varðandi jarðvarmavirkjanir og hvers kyns borandir á sama tíma og að hið gagnstæða skuli vera uppi á borðinu hér á landi og stefnt að því að fara hamförum um Reykjanesskagann í rányrkju á gufuafli. 

Upphafið á kaflanum um hinn eldvirka hluta Íslands er: "Iceland is a land like no other." 

Ekkert annað hinna 100 undra fær viðlíka umsögn. 

Hringvegurinn í sjötta sæti

Á svipaðri leið og Suður-Afríka?

Á síðustu öld átti sér stað ákveðin þróun í Suður-Afríku sem fólst í síminnkandi réttindum blökkumanna og auknum sérréttindum hvítra.

Slíkt hlýtur ævinlega að vera áhyggjuefni, jafnvel þótt mikill munur sé á Ísrael dagsin í dag og Suður-Afríku fyrri hluta síðustu aldar. 

Svona hægt og bítandi þróun er varasöm, vegna þess að dropinn holar steininn og eftir því sem lengra er gengið í misréttisátt, eykst hættan á æ hraðari breytingum í slæma átt.  

Lög um „þjóðríki gyðinga“ samþykkt

"Enginn er með meðfætt hatur; fólk lærir að hata, en kærleikurinn er eðlislægari."

Einhvern veginn svona voru ummæli Nelsons Mandela sett fram í lok góðarar myndar um þann einstaka mann í sjónvarpinu í kvöld, sem byggð er á ævisögu hans um leiðina til frelsisins. 

En einmitt núna er ein öld frá fæðingu hans. 

Hin "Suður-Afríska lausn" Mandela er eitt magnaðasta stjórnmálaafrek sögunnar. 

Hann byggði hana á afar einföldum rökum, að eina leiðin út úr ástandi kúgunar, manndrápa, árása og hefndaraðgerða, væri byrja alveg nýja vegferð þar sem fyrirgefning og endurlausn í kjölfar starfs sérstakrar "sannleiksnefndarf" yrðu aðalatriðin en ekki hefnd og refsingar. 

Þessi leið, hrein byrjun með hreinsað borð, væri eina lausnin. 

Kannski hafa orð, boðskapur og árangur Mandela sjáldan átt jafn mikið erindi við jarðarbúa og núna á tímum hatursorðræðu, manndrápa og hefndaraðgerða. 

Árás á fjölmennan markað

Margar magnaðar sögur af ríkum Rússum.

Það er alveg í stíl við ótrúlegar sögur af ríkum Rússum hér á landi, að þeir panti ekki aðeins þyrlur og hvers kyns bruðlkennda þjónustu í ferðum sínum til Íslands, heldur geti afpantanirnar orðið jafn tilkomumiklar og margbrotnar. 

Í sumum tilfellum eru sögurnar þannig, að engu er líkara en að heilu ferðirnar og tilstandið hjá gestgjöfum og gestum hafi verið stanslaus drykkju- og svallgleði frá upphafi til enda og að þeir varla vitað hvað þeir ættu að gera við alla peningana sína. 

Uppátæki og umfangi í svona ferðum eru að vísu kunnugleg í frásögnum af ferðum Íslendinga, en ríku Rússarnir eru bara miklu ríkari en Íslendingar af svipuðu sauðahúsi, og geta því farið mun stórfelldari hamförum í flippinu en áður hefur þekkst hér á landi, nema ef vera skyldi á þeim tíma sem svonefndir útrásarvíkinga slógu heldur betur um sig.   

Rússar afbóka 100 milljóna kr. ferð

Ef slóðarnir eru meira en 20 þúsund kílómetrar er í mörg horn að líta.

Viðfangsefnið "vegaslóðar" og "hálendisvegir" er búið að vera vandamál síðan á síðustu öld. 

Þannig var það svo fyrir rúmu áratug að ekki var á hreinu hvort þetta "vegakerfi" væri alls 20 þúsud kílómetrar eða hvort það slagaði upp í 30 þúsund. 

Til samanburðar má geta þess, að skammt frá einum helsta torfæruakstursbæ í Bandaríkjunum, Mojabe, er þjóðgarðurinnn Canyonlands eða Giljalönd, þar sem menn hafa sérhæft sig í því að útbúa og hafa stjórn á jeppaumferð um alls 1600 kílómetra langar leiðir. 

Algerlega er bannað að fara út fyrir þessar leiðir og séð til þess að engin leið sé að brjóta bannið á þeim forsendum að ferðamenn hafi ekki verið látnir vita um hvað var lokað og hvað ekki. 

Þykjast menn þarf hafa í nóg horn að líta að hafa eftirlit með akstrinum um þessar leiðir. 

Sumar eru býsna þekktar, svo sem "Shafers Trail", og við bæinn Mojabe eru haldin einhver helsta torfærukeppni Ameríku. 

Frægasta leiðin af slíku tagi í Bandaríkjunum heitir Rubicon og til þess að leggja áherslu á öflugasta Wrangler-jeppann, sem hægt er að kaupa hjá framleiðandanum, heitir sú gerð Jeep Wrangler Rubicon. 

Hann er meðal annars með millikassa með 1:4 deilingu, sem þýðir að lægsti gír er með hlutfallið 1:64, sem er tvöfalt hærri tala og meiri deiling / lægra drif en er til dæmis á Suzuki Jimny og var á gamla Nissan Patról. 

Svæðið ekki lokað á hálendiskorti

Hugsið ykkur hvað margt hefur breyst

Eitt af því sem er stórt atriði í kjarabaráttu ljósmæðra er aukin menntun þeirra. Þær eru komnar langan veg frá því sem var fyrir u.þ.b. 100 árum.  Og það er þessum framförum að þakka að barnadauði er minnstur á Íslandi í heiminum. 

Gamansaga sem afi minn sagði mér frá Vestmannaeyjum bregður ljósi á hversu miklar framfarir hafa orðið.  

Útgerðarmaður í Vestmannaeyjum sem hét Guðlaugur þótti afar nískur.  Hann þurfti að fara á sjó en kona hans átti þá von á barni.  Var hún beðin um að senda skeyti en fara sparlega með kostnað vegna þess. 

Nú varð konan léttari og var Guðlaugi sent skeyti svohljoðandi:  Drengur fæddur.  Berta sótt.  Blind, billegri.

En þá voru ljósmæður í eyjum fleiri en ein en sú þeirra sem var blind tók minna fyrir viðvikið. Þess vegna var hún sótt fyrir hinn aðhaldsama föður.

Mótmælin hafin á Austurvelli

Mikil og afdrifarík harmsaga.

Saga og endalok síðustu keisarafjölskyldu Rússlands varð dramatísk og afdrifarík. 

Rússar voru í bandalagi við vesturveldin, Frakkland og Bretland, og samkomulag varð um að til þess að létta á vesturvígstöðvunum skyldi rússneski herinn fara í mikla sókn á sunnanverðum vigstöðvunum og herja einkum á Austurríkismenn.  

Talið er að ein af ástæðum þess að meðal Þjóðverja var talið skárra að hefja stríðið 1914 en ekki einhvern tíma síðar væri sú, að Rússum fjölgaði meira en öðrum stórþjóðum Evrópu og landið bjó yfir miklum auðlindum, sem áttu eftir að koma sér vel í Seinni heimsstyrjöldinni. 

Þessi sókn varð eina sóknin í báðum heimsstyrjöldunum, sem kennd var við hershöfðingja og nefndist Brusilov-sóknin. 

Hún gekk í fyrstu vel og en síðan fóru veikleikar hersins að koma æ betur í ljós og þar réði miklu um, að keisarinn sjálfur tók að sér yfirstjórnina, sem varð honum alveg ofviða. 

Aldrei verður hægt að finna út, hverju það hefði breytt, ef Rússar hefðu haft afburða keisara á þessu mikilvæga tíma í sögu þjóðarinnar. 

Á sama hátt og Rússar hafa mjög í hávegum "sterka stjórnendur" eins og Katrínu miklu, Pétur mikla og jafnvel Lenin og Stalín, er hörmungarsagan í lok keisaraveldisins þeim ofarlega í huga. 

Öld frá morðinu á síðasta keisaranum

Menn einbeittum brotavilja geta menn "ruglast á" langreyði og steypireyði.

Það sannar ekkert út af fyrir sig að segja að "ekki sé hægt að ruglast á langreyði og steypireyði" eins og Kristján Loftsson forstjóri Hvals hf. heldur fram. 

Meðan tæknilega er hægt að veiða steypireyði, er hugsanleg veiði á steypireyði ekki útkljáð mál.

Það er ekki að fullu upplýst fyrr en búið er að rannsaka það til hlítar. 

Hitt er svo annað mál, að varðandi það hvort steypireyður hafi verið veidd í trássi við bann og þar með stundað sakhæft athæfi, gildir meginregla réttarfars um það að allur vafi skal túlkaður sakborningi í vil. 

Stórhvalaveiðar Íslendinga sýna hins vegar alvarlega brotalöm í þjóðfélagi okkar, þar sem níðþröngir hagsmunir og úrelt viðhorf fá enn að leika lausum hala á kostnað heildarmyndarinnar og almannahagsmuna. 

Sektir eða fangelsi reynist dýrið friðað

Trump líklegur til að "taka Harley-Davidson á" BMW og fleiri?

Donald Trump sagði um daginn að hann myndi setja alveg sérstaka refsitolla eða skatta á Harley-Davidson fyrir að ætla að flýja með framleiðslu sína frá Bandaríkjunum til að vera samkeppnisfærir í Evrópu. 

Til að "gera Ameríku máttuga á ný setti Trump meira en 200 prósenta tolla á innfluttar smáþotur frá Kanada, af því að Kanadamenn eru greinilega ekki þess verðugir að vera taldir með Ameríkönum sem geri Ameríku máttuga á ný. 

Glæpur þeirra fólst í því að höfða til ákveðins markhóps kaupenda á 70-140 farþega þotum með nýrri og hugvitsamlegri hönnun, sem áður hefur verið lýst hér á síðunni. 

Sem sagt: Hiklaust refsað fyrir amerískt hugvit og hönnunarsnilli ef hún kemur ekki frá Bandaríkjunum. 

Nú framleiða bílaverksmiðjur í eigu BMW, Benz og fleiri 1,8 milljón bíla árlega í Bandaríkjunum, og Trump hyggst gera Ameríku máttuga á ný með því að hrekja þessa framleiðslu úr landi! 

 

BMW flytur hluta framleiðslunnar frá BNA